কাৰাগাৰত আৰিয়ান, কম্পিত বাদশ্বাহৰ সাম্ৰাজ্য,তথাপি ৰাম গোপাল বাৰ্মাৰ মুখত ‘জয় এনচিবি’…কিয়?

0
7037
আৰিয়ান
কাৰাগাৰত আৰিয়ান, কম্পিত বাদশ্বাহৰ সাম্ৰাজ্য, তথাপি ৰাম গোপাল বাৰ্মাৰ মুখত ‘জয় এনচিবি’... কিয়?

ডিজিটেল ডেস্ক : ‘ছবিৰ নাম, ৰকেট। হীৰোৰ ৰূপত আত্মপ্ৰকাশ শ্বাহৰুখ খানৰ পুত্ৰ আৰিয়ান খান। ছবিৰ প্ৰযোজক, নাৰ্কোটিক্স কণ্ট্ৰ’ল ব্যুৰো। সহ-প্ৰযোজক কেইটামান ৰাজনৈতিক দল। ছবিৰ পৰিচালক একাংশ সংবাদ মাধ্যম।’ এই ঘোষণা কৰিছে হিন্দী ছবিজগতৰ এগৰাকী প্ৰখ্যাত চলচ্চিত্ৰ নিৰ্মাতা ৰাম গোপাল বাৰ্মাই। শ্বাহৰুখ পু্ত্ৰ আৰিয়ানক এনচিবি-এ গ্ৰেপ্তাৰ কৰি কাৰাগাৰলৈ নিক্ষেপ কৰাৰ পাছত এনচিবিৰ বিৰুদ্ধে সৰৱ হৈ পৰিছে বলীউডৰ বিভিন্ন তাৰকা। অভিনেতাৰ পৰা পৰিচালকলৈ সকলো ঠিয় হৈছে শ্বাহৰুখৰ কাষত। আৰিয়ানক ষড়যন্ত্ৰমূলকভাৱে গ্ৰেপ্তাৰ কৰাৰ অভিযোগেৰে সৰৱ হৈ উঠিছে সকলো। ইয়াৰ মাজতে তীক্ষ্ন কটাক্ষৰে এনচিবিক আক্ৰমণ কৰিছে ৰাম গোপাল বাৰ্মাই।

তেওঁ আন এটা টুইটত লিখিছে, ‘শ্বাহৰুখ খানৰ সঁচা আৰু বু্দ্ধিমান অনুৰাগীসকলে মহান এনচিবিক ধন্যবাদ জনোৱা উচিত। কাৰণ এনচিবি-এ ছুপাৰষ্টাৰ শ্বাহৰুখৰ পুত্ৰক ছুপাৰ ডুপাৰ ষ্টাৰত পৰিণত কৰিলে। শ্বাহৰুখৰ এগৰাকী’ প্ৰকৃত অনুৰাগী হোৱা সূত্ৰে মই মাত্ৰ ক’ব খোজোঁ, জয় এনচিবি!’ তেওঁ লগতে কয় যে, এই কথাক লৈ মই বাজি লগাব পাৰোঁ যে, এদিন আৰিয়ানে ক’ব যে, তেওঁ কাৰাগাৰত থাকি আৰু এনচিবিৰ পৰা পিতৃ শ্বাহৰুখৰ পৰা শিকাতকৈ বহু বেছি কথা শিকিছে।

উল্লেখ্য যে, কেৱল ৰাম গোপাল বাৰ্মাই নহয়, স্বাৰা ভাস্কৰৰ পৰা চলচ্চিত্ৰ পৰিচালক ৰাহুল ধোলাকিয়া, হনছল মেহতালৈকে সকলো সৰৱ হৈ পৰিছে এনচিবিৰ বিৰুদ্ধে। শ্বাহৰুখ তনয় আৰিয়ানক ‘ষড়যন্ত্ৰমূলক’ ভাৱে গ্ৰেপ্তাৰ কৰা কাৰ্যক সহজভাৱে লোৱা নাই বলীউডে। স্পষ্টবাদী অভিনেত্ৰী স্বাৰা ভাস্কৰে ইয়াক পোনপটীয়াকৈ ‘বিশুদ্ধ হাৰাশাস্তি’ আখ্যা দিছে। ৰাহুল ধোলাকিয়াই টুইটাৰত লিখিছে যে, তেওঁ আৰিয়ানক দীঘলীয়া সময় কাৰাগাৰত ৰখাক লৈ অসন্তুষ্ট। আনহাতে হানচল মেহতাই টুইটাৰত নিজৰ প্ৰতিক্ৰিয়া ব্যক্ত কৰি লিখিছে, বহু দেশত গাঞ্জাৰ দৰে নিচা নিষিদ্ধ নহয়। বিপৰীতে আমাৰ দেশত ই সেৱন কৰাতকৈ নাৰ্কোটিক্স কণ্ট্ৰোলৰ নামত হাৰাশাস্তি কৰাতহে বেছি ব্যৱহাৰ কৰা হয়।

উল্লেখ্য যে, ২ অক্টোবৰত বিলাসী জাহাজৰ ড্ৰাগছ পাৰ্টীত অংশ লোৱাৰ অভিযোগত এনচিবিৰ জালত পৰিছিল শ্বাহৰুখ তনয় আৰিয়ান। ৮ অক্টোবৰৰ পৰা তেওঁ আছে কাৰাগাৰত। আৰিয়ানৰ বিৰুদ্ধে কোনো অভিযোগ প্ৰমাণ নোহোৱাৰ পাছতো তেওঁক কাৰাগাৰৰ চাৰিবেৰৰ মাজত আবদ্ধ ৰখাক লৈ এতিয়া সৰ্বত্ৰে প্ৰতিক্ৰিয়াৰ সৃষ্টি হৈছে আৰু এই একধৰণে ৰাজনৈতিক ৰূপো ল’বলৈ আৰম্ভ কৰিছে। আৰু স্বাভাৱিকতেই চলচ্চিত্ৰ মহল ঠিয় দিছে শ্বাহৰুখ আৰিয়ানৰ কাষত।