ঢেকিয়াজুলিত বিনামূলীয়া NEET 'ছুপাৰ ৩০' কোচিং কেন্দ্ৰ, মন্ত্ৰী অশোক সিংহালৰ ঘোষণা

ঢেকিয়াজুলি: চিকিৎসা বিজ্ঞানৰ পঢ়া-শুনা কৰি ভৱিষ্যত গঢ়িব বিচৰা ঢেকিয়াজুলিৰ মেধাৱী ছাত্ৰ-ছাত্ৰীসকলে অচিৰেই এক নতুন সুবিধা লাভ কৰিব। অসমৰ কেবিনেট মন্ত্ৰী তথা স্থানীয় বিধায়ক অশোক সিংহালে বৃহস্পতিবাৰে ঘোষণা কৰিছে যে পৰমানন্দ ইন্দুুমতী সিংহাল ফাউণ্ডেশ্যনৰ উদ্যোগত এখন বিনামূলীয়া NEET 'ছুপাৰ ৩০' কোচিং কেন্দ্ৰ স্থাপন কৰা হ'ব।

ঢেকিয়াজুলিৰ বিধায়ক সেৱা কেন্দ্ৰত অনুষ্ঠিত এক সংবাদমেলত মন্ত্ৰী সিংহালে জনাইছিল যে এই কেন্দ্ৰই নিৰ্বাচিত ছাত্ৰ-ছাত্ৰীসকলক ৰাষ্ট্ৰীয় যোগ্যতা তথা প্ৰৱেশ পৰীক্ষা (NEET) ৰ বাবে বিনামূলীয়া প্ৰশিক্ষণ আৰু সুসংগঠিত নিৰ্দেশনা প্ৰদান কৰিব। এই কাৰ্যসূচী ছেপ্টেম্বৰ মাহৰ প্ৰথম সপ্তাহৰ ভিতৰত আৰম্ভ হোৱাৰ সম্ভাৱনা আছে বুলিও তেওঁ উল্লেখ কৰে।

মন্ত্ৰীগৰাকীয়ে লগতে কয় যে এই 'ছুপাৰ ৩০' উদ্যোগটোৰ মূল লক্ষ্য হৈছে স্থানীয় মেধাৱীসকলক উচ্চ শিক্ষাৰ সুযোগ প্ৰদান কৰা আৰু তেওঁলোকক দেশৰ আগশাৰীৰ চিকিৎসা প্ৰতিষ্ঠানসমূহত প্ৰৱেশৰ বাবে প্ৰস্তুত কৰা। ইয়াৰ দ্বাৰা অঞ্চলটোৰ শিক্ষাৰ মান উন্নত হোৱাৰ লগতে বহু দুখীয়া অথচ মেধাৱী ছাত্ৰ-ছাত্ৰী উপকৃত হ'ব বুলি আশা কৰা হৈছে।

পৰমানন্দ ইন্দুুমতী সিংহাল ফাউণ্ডেশ্যনে কেৱল NEET প্ৰশিক্ষণতেই সীমাবদ্ধ নাথাকি সমষ্টিটোৰ যুৱক-যুৱতীসকলৰ বাবে আন কেইবাটাও প্ৰশিক্ষণ কাৰ্যসূচী চলাই আছে। বৰ্তমান ঢেকিয়াজুলি চহৰৰ সমীপৰ ভোটপাৰা ষ্টেডিয়ামত প্ৰায় ৪০০ যুৱকে আৰক্ষী আৰু সশস্ত্ৰ বাহিনীত নিযুক্তিৰ বাবে প্ৰশিক্ষণ গ্ৰহণ কৰি আছে বুলিও মন্ত্ৰী সিংহালে সংবাদমেলত সদৰি কৰে। এই সমূহ উদ্যোগে যুৱ প্ৰজন্মৰ মাজত স্বাৱলম্বিতা আৰু উচ্চাকাংক্ষা বৃদ্ধি কৰাত সহায় কৰিব বুলি তেওঁ বিশ্বাস ব্যক্ত কৰে।