Google search engine
28 C
Guwahati
Monday, August 2, 2021
Google search engine
Homeমনোৰঞ্জনপাকিস্তানত আছে প্ৰয়াত দিলীপ কুমাৰৰ পৈতৃক গৃহ

পাকিস্তানত আছে প্ৰয়াত দিলীপ কুমাৰৰ পৈতৃক গৃহ

মুম্বাই : কিংবদন্তী অভিনেতা দিলীপ কুমাৰৰ বিয়োগৰ লগে লগে অন্ত পৰিল হিন্দী ছবিৰ এটা সোণালী যুগৰ। এজন ফল বিক্ৰেতাৰ পৰা হিন্দী ছবি উদ্যোগৰ মহানায়কলৈ এটা সংগ্ৰামী আৰু বৰ্ণাঢ্য যাত্ৰা আছিল দিলীপ কুমাৰৰ। দিলীপ কুমাৰ অথবা মহম্মদ ইউছুফ খানৰ জীৱন পৰিক্ৰমা আৰম্ভ হৈছিল বৰ্তমানৰ পাকিস্তানৰ পেছোৱাৰ চহৰৰ কিচ্ছা খাৱানি বজাৰত।

পিতৃ-মাতৃ গোলাম ছাৰৱাৰ খান আৰু আয়েছা বেগমৰ ১২টা সন্তানৰ অন্যতম ইউছুফ খানৰ জন্ম হৈছিল ১৯২২চনৰ ১১ ডিচেম্বৰত। পিতৃ গোলাম ছাৰৱাৰ খান আছিল ফল ব্যৱসায়ী। যাৰ বাবে শৈশৱ সুখৰেই আছিল ইউছুফ খানৰ। পেছোৱাৰৰ প্ৰতিপত্তিশীল ব্যৱসায়ী গোলাম ছাৰৱাৰৰ আছিল বিশাল হাৱেলী। সেই হাৱেলীতে পাৰ হৈছিল ইউছুফৰ শৈশৱকাল। ১৯৩০ চনত অৱশ্যে ছাৰৱাৰে পৰিয়ালটোক লৈ ব্যৱসায়িক কাৰণত মুম্বাইলৈ আহে। এৰি আহে পেছোৱাৰৰ আড়ম্বৰপূৰ্ণ বাসভৱন।

পৰিত্যক্ত হৈ আহিবলৈ ধৰে দিলীপ কুমাৰৰ হাৱেলী

১৯৪৭ চনলৈকে পেছোৱাৰৰ সৈতে গোলাম ছাৰৱাৰ খানৰ পৰিয়ালৰ যোগসূত্ৰ আছিল যদিও দেশ বিভাজনৰ পাছত সম্পৰ্ক প্ৰায় ছিন্ন হৈ পৰে। যাৰ বাবে পৰিত্যক্ত হৈ আহিবলৈ ধৰে দিলীপ কুমাৰৰ হাৱেলী। আনকি কাষৰীয়া বাসিন্দাসকলে ঘৰটোত পেলাবলৈ ধৰে জাবৰ-জোঁথৰ। হাৱেলীটো পৰিণত হয় ডাম্পিং গ্ৰাউণ্ডলৈ। পাছলৈ দিলীপ কুমাৰৰ বাসভৱনৰ দুৰৱস্থাৰ খবৰটো পাকিস্তানৰ চৰকাৰৰ দৃষ্টিগোচৰ হয়।

২০১৩ চনত পাকিস্তানৰ প্ৰধানমন্ত্ৰী নৱাজ শ্বৰীফে হাৱেলীটোৰ মেৰামতি কৰিবলৈ দায়িত্ব দিয়ে ৰাষ্ট্রীয় স্মাৰক মন্ত্ৰণালয়ক। ২০১৪ চনত পাকিস্তানৰ চৰকাৰে বাসভৱনটোক ঘোষণা কৰে ঐতিহ্যস্থল হিচাপে। অৱশ্যে চৰকাৰৰ নিৰ্দেশৰ যথোপযুক্ত কাৰ্য ৰূপায়ণ নকৰিলে প্ৰশাসনে। যাৰ বাবে সময় বাগৰাৰ লগে লগে হাৱেলীটো ভাগি পৰিবলৈ ধৰে। শেহতীয়াকৈ বিগত জুন মাহত হাৱেলীটোৰ চোৱা-চিতাৰ দায়িত্ব লৈছে দেশখনৰ খাইৱাৰ পখটুনখাৱা প্ৰদেশৰ চৰকাৰে।

প্ৰাদেশিক চৰকাৰখনে ঐতিহ্যপূৰ্ণ বাসভৱনটোক সংগ্ৰহালয় হিচাপে গঢ়ি তুলিব বুলি ঘোষণা কৰিছে। প্ৰাদেশিক চৰকাৰখনে ঘোষণা কৰা মতে কাম কৰিলে হাৱেলীটোৱে পুনৰ আটকধুনীয়াকৈ মূৰ দাঙি উঠিব বুলি আশা কৰা হৈছে। আজি দিলীপ কুমাৰৰ বিয়োগৰ দিনটোত পেছোৱাৰৰ বাসভৱনটো মহান অভিনেতাজনৰ স্মৃতি যুগমীয়া কৰিব পৰাকৈ উজলি উঠিব বুলি আশা কৰিছে ভাৰতৰ লগতে পাকিস্তানৰ অনুৰাগীসকলে।

RELATED ARTICLES

LEAVE A REPLY

Please enter your comment!
Please enter your name here

Today's Weather

Guwahati
mist
28 ° C
28 °
28 °
89 %
0kmh
75 %
Mon
31 °
Tue
28 °
Wed
31 °
Thu
33 °
Fri
33 °

Watch latest Movies & TV Series on Prag Play

Most Popular