তিনি বছৰৰ পাছত মণিপুৰত ইম্ফল-ডিমাপুৰ-গুৱাহাটী বাছ সেৱা পুনৰ আৰম্ভ

গুৱাহাটী: জাতিগত হিংসাগ্ৰস্ত মণিপুৰত তিনি বছৰতকৈ অধিক সময়ৰ পাছত ইম্ফল-ডিমাপুৰ-গুৱাহাটী বাছ সেৱা শুকুৰবাৰৰ পৰা পুনৰ চলাচল আৰম্ভ হৈছে। ৰাজ্যখনত শান্তি আৰু স্বাভাৱিক অৱস্থা ঘূৰাই অনাৰ বাবে চৰকাৰে দীৰ্ঘদিন ধৰি কৰি অহা প্ৰচেষ্টাৰ এয়া এক গুৰুত্বপূৰ্ণ পৰিণতি। ২০২৩ চনৰ ৩ মে'ত মেইতেই আৰু কুকি সম্প্ৰদায়ৰ মাজত জাতিগত সংঘৰ্ষ আৰম্ভ হোৱাৰ পাছৰে পৰা এই গুৰুত্বপূৰ্ণ ৰাজহুৱা পৰিবহণ সেৱা স্থগিত ৰখা হৈছিল।

প্ৰাপ্ত তথ্য অনুসৰি, শুকুৰবাৰে মুঠ ১২৫ গৰাকী যাত্ৰীয়ে দুখন বাছ আৰু পাঁচখন উইঙ্গাৰ বাহনেৰে এই পথত যাত্ৰা কৰে। বাতৰি লিখা পৰলৈকে, বাহনকেইখন কুকি অধ্যুষিত কাংপকপি জিলা অতিক্ৰম কৰিছিল। কাংপকপিৰ পাছত নগা অধ্যুষিত সেনাপতি জিলা আৰু তাৰ পাছত নাগালেণ্ড পৰে। এই সেৱা পুনৰ আৰম্ভ হোৱাৰ ফলত ৰাজ্যখনৰ জনসাধাৰণে স্বস্তিৰ নিশ্বাস পেলাইছে।

ৰাষ্ট্ৰীয় ঘাইপথ ২ (ইম্ফল-ডিমাপুৰ পথ) আৰু ৰাষ্ট্ৰীয় ঘাইপথ ৩৭ হৈছে মণিপুৰৰ বাবে জীৱনৰেখা স্বৰূপ। যাত্ৰী আৰু পৰিবহণকাৰী উভয়ৰে বাবে ৰাষ্ট্ৰীয় ঘাইপথ ২ অধিক পচন্দৰ, কাৰণ এইটো চুটি পথ। আনহহাতে, দক্ষিণ অসমৰ বৰাক উপত্যকাৰ পৰা মণিপুৰত প্ৰৱেশ কৰা ৰাষ্ট্ৰীয় ঘাইপথ ৩৭ ত বিভিন্ন সংস্থাৰ বাধা আৰু ধন দাবীৰ বাবে চলাচল প্ৰায়ে ব্যাহত হয়। এই বাছ সেৱা পুনৰ আৰম্ভ হোৱাটোৱে মণিপুৰত দীৰ্ঘদিনীয়া উত্তেজনা হ্ৰাস কৰি জনসাধাৰণৰ মাজত আস্থা ঘূৰাই অনাত সহায় কৰিব বুলি আশা কৰা হৈছে।