ডিজিটেল ডেস্কঃ মাহে ৩০০ টকাকৈ মেট্ৰিক পৰীক্ষাৰ্থীক দিব ৰাজ্য চৰকাৰে। পৰীক্ষাৰ ছমাহ আগৰ পৰাই দিয়া হ’ব এই ধন।
বিহালীত এই কথা ঘোষণা কৰিলে মুখ্যমন্ত্ৰী হিমন্ত বিশ্ব শৰ্মাই।
উদ্যমী মহিলাক লাখপতি বাইদেউলৈ ৰূপান্তৰ কৰাৰ লক্ষ্যৰে ৰাজ্য চৰকাৰে হাতত লোৱা মুখ্যমন্ত্রী মহিলা উদ্যমিতা অভিযানৰ শুভাৰম্ভৰ দিনটোতে মেট্ৰিক পৰীক্ষাত অৱতীর্ণ হ'বলগীয়া শিক্ষার্থীসকলে টিউশ্যন লোৱাত সহায় হোৱাকৈ ছমাহৰ আগৰ পৰা তিনিশ টকাকৈ প্রদান কৰাৰ কথা ঘোষণা কৰে মুখ্যমন্ত্রীগৰাকীয়ে।
মেট্ৰিক পৰীক্ষাত অৱতীৰ্ণ হওতে যাতে কোনো ছাত্ৰ-ছাত্ৰীয়ে টিউশ্যনৰ পৰা বঞ্চিত হ’বলগীয়া নহয় তাৰবাবে এই ব্যৱস্থা কৰাৰ সিদ্ধান্ত লৈছে ৰাজ্য চৰকাৰে।
মুখ্যমন্ত্ৰীগৰাকীয়ে কয় যে মেট্ৰিক পৰীক্ষাৰ্থীক মাহে ৩০০ টকাকৈ দিয়াটো গুৰুত্বপূৰ্ণ সিদ্ধান্ত। ৩০০ টকাটো মেট্রিক পৰীক্ষাৰ্থীক টিউশ্যন ফিজ হিচাপে দিয়া হ'ব বুলি ঘোষণা কৰে মুখ্যমন্ত্রী ড° হিমন্ত বিশ্ব শর্মাই।
বহুলোকে চৰকাৰৰ এই সিদ্ধান্তক সঁহাৰি জনোৱাৰ লগতে বহুলোকে বিৰোধিতাও কৰিছে কাৰণ টিউশ্যনত গুৰুত্ব দিয়াতকৈ বিদ্যালয়তহে শিক্ষণ পদ্ধতি উন্নত কৰিব লাগে যাতে টিউশ্যন নোলোৱাকৈ ছাত্ৰ-ছাত্ৰীয়ে বিদ্যালয়তে শিক্ষা আহৰণ কৰিব পাৰে।
Leave A Comment