সকলো আচৰিত! 'অৱতাৰ ২'ৰ কাহিনীৰ হুবহু মিল আছে ধনুষৰ এই ছবিখনৰ সৈতে

প্ৰযোজক-পৰিচালক জেমছ কেমেৰনৰ ছবি 'অৱতাৰ: দ্য ৱে অৱ ৱাটাৰ'ৰ কাৰিকৰী দিশটোৱে সকলোকে চমকিত কৰি তুলিছে যদিও ইয়াৰ কাহিনী আৰু চিত্ৰনাট্যক লৈ কিছু প্ৰশ্ন নিশ্চিতভাৱে উত্থাপন হৈছে। বহুতে ছবিখনৰ স্ক্ৰীপ্টৰ ক্ষেত্ৰত নিৰ্মাতাসকল অলপ দুৰ্বল বুলি অনুভৱ কৰিছে।

বৰ্তমান সময়ত ছ’চিয়েল মিডিয়াত চৰ্চালৈ আহিছে যে 'অৱতাৰ: দ্য ৱে অৱ ৱাটাৰ'ৰ কাহিনী আৰু ২০১৯ চনত মুক্তি পোৱা তামিল ছবি 'অসুৰন'ৰ কাহিনীৰ মাজত এক আকৰ্ষণীয় সাদৃশ্য আছে। এই কথাটোৱে মানুহক আচৰিত কৰি তুলিছে। দুয়োটা কাহিনীৰ প্লট একেই। 

দুয়োখন ছবিৰ কাহিনীতে এজন পিতৃয়ে নিজৰ শত্ৰু আৰু শ্ৰেণী সংগ্ৰামৰ পৰা পৰিত্ৰাণ পাবলৈ পৰিয়ালটোক এঠাইৰ পৰা আন ঠাইলৈ স্থানান্তৰিত কৰিছে। দুয়োখন ছবিৰ ক্লাইমেক্সত অৱশেষত শত্ৰুৱে পৰিয়ালটোৰ ওচৰ পায়গৈ আৰু কাজিয়া আৰম্ভ হয়। দুয়োটা কাহিনীতে পিতৃয়ে পুত্ৰক হেৰুৱাইছে, কিন্তু শেষত যুদ্ধত জয়ী হয়। 'অসুৰন'ত দুটা জাতিৰ যুঁজ আনহাতে 'অৱতাৰ ২'ত দুটা গ্ৰহৰ বাসিন্দাৰ মাজত যুঁজ হয়। 'অসুৰন'ৰ মুখ্য চৰিত্ৰত অভিনয় কৰিছিল ধনুষে। 

এই ছবিখনত ধনুষে শ্ৰেষ্ঠ অভিনেতাৰ বঁটাকে ধৰি দুটা ৰাষ্ট্ৰীয় বঁটা লাভ কৰে। ২০২১ চনত তেলেগু ভাষাত পুনৰ নিৰ্মাণ কৰা হৈছিল  'অসুৰন'। তেলেগু ৰিমেক 'নৰপ্পা'ত মুখ্য চৰিত্ৰত অভিনয় কৰিছিল ভেংকটেশে। অ’টিটি প্লেটফৰ্ম প্ৰাইম ভিডিঅ’ত হিন্দী ভাষাত চাব পাৰিব 'অসুৰন'।

চল্লিশ বছৰ পূৰ্বে তামিল সাহিত্যিক পূমানীয়ে ৰচনা কৰা 'ভেক্কাই' উপন্যাসৰ আধাৰত নিৰ্মাণ কৰা হৈছিল 'অসুৰন'। সাহিত্য অকাডেমী বঁটা লাভ কৰা এইখনেই আছিল পূমানীৰ প্ৰথম উপন্যাস। বহুতে ছ’চিয়েল মিডিয়াত এতিয়া ধেমালি কৰি আছে যে জেমছ কেমেৰনৰ 'অৱতাৰ ২'ৰ কাহিনী কেনেবাকৈ 'অসুৰন'ৰ দ্বাৰা অনুপ্ৰাণিত নহয়টো? 'অৱতাৰ ২'ৰ কাহিনীটো ২০০৯ চনত লিখা হৈছিল। যিয়েই নহওক, 'অৱতাৰ ২' আৰু 'অসুৰন'ৰ কাহিনীৰ মাজত যে এক প্ৰচণ্ড সাদৃশ্য আছে সেয়া নিশ্চিত।