শেষ হ'ল নেকি শীতল যুদ্ধ? 'পাঠান'ৰ ধুমুহাৰ মাজতে ৭ বছৰ পাছত আমিৰৰ ঘৰত ছলমান খান

শ্বাহৰুখ খানৰ পাঠান ঢৌৱে সমগ্ৰ দেশক আগুৰি ধৰাৰ সময়তে ভাইৰেল হৈ পৰিছে ছলমান খানৰ কিছু অভাৱনীয় ছবি। মঙলবাৰে নিশা নিজৰ গাড়ীৰ সন্মুখৰ চিটত বহি মুম্বাইৰ আমিৰৰ ঘৰত উপস্থিত হয় ছলমান খান। পাপাৰাজীয়ে ছলমানক ক’লা টি-চাৰ্ট আৰু ৰূপালী কাণফুলিৰে ছলমান খানক ধৰা পেলায়।  কিন্তু ছলমান অকলশৰীয়া নহয়, পৰিচালক মহেশ ভাটকো আমিৰৰ ঘৰত প্ৰৱেশ কৰা দেখা গ’ল। আৰু তেতিয়াৰ পৰাই আৰম্ভ হৈছে জল্পনা-কল্পনা।‌ ছলমান-আমিৰে দূৰত্ব অতিক্ৰম কৰি আকৌ এবাৰ এটা ফ্ৰেমত  লগ হ'ব নেকি? অৱশ্যে আমিৰে বন্ধু-বান্ধৱীৰ বাবে পাৰ্টি আয়োজন কৰা বুলি জানিব পৰা গৈছে। য'ত ছলমান, মহেশ ভাটকে আদি কৰি বহুকেইজন বলীউডৰ অভিনেতা অভিনেত্ৰীক নিমন্ত্ৰণ কৰা হৈছিল।

আমিৰ আৰু ছলমান বলীউডত প্ৰৱেশ কৰাৰ আগতেই বন্ধু। টিম আপ কৰি ‘আন্দাজ আপনা আপনা’ৰ দৰে ছুপাৰহিট ছবিও উপস্থাপন কৰিছে। কিন্তু খবৰ ওলাইছিল যে ২০১৬ চনত তেওঁলোকৰ মাজত ফ’লিং আউট হৈছিল। ছলমানৰ ‘চুলতান’ ছবি মুক্তি পোৱা একে বছৰতে মল্লযুঁজৰ ওপৰত নিৰ্মিত আমিৰৰ ছবি দংগল মুক্তি পালে। সেই কথাত অসন্তুষ্ট আছিল ছলমান। যদিও বলীউডৰ ভাইজানে কৈছিল, এই খবৰ সম্পূৰ্ণ ভিত্তিহীন। আমিৰ খানৰ লগত তেওঁৰ কোনো সংঘাত নাই। কিন্তু তেতিয়াৰ পৰা দুয়োকে তেনেকৈ একেলগে দেখা পোৱা নাই। গতিকে শেহতীয়াকৈ প্ৰকাশ পোৱা এনে দৃশ্যই সকলোকে আচৰিত কৰি তুলিছে।

বুধবাৰে মুক্তি পোৱা শ্বাহৰুখৰ ‘পাঠান’ ছবিখনে বক্স অফিচত ধুমুহাৰ সৃষ্টি কৰে। কিন্তু আমিৰৰ ‘লাল সিং চদ্দা ’ ছবিখনে দৰ্শকক আকৰ্ষণ কৰাত ব্যৰ্থ হয়। এতিয়া বলীউডৰ আন এজন খান ছলমানৰ আগন্তুক ছবি ‘কিছি কা ভাই কিছি জানেও দৰ্শকৰ সমাদৰ লাভ কৰিবলৈ সক্ষম হৈছে। মুঠতে তিনিজন খানে বহুদিনৰ মূৰত পুনৰ বলীউডত খিতাপি লৈছে।