মই খোনা আছিলো, প্ৰেমিকা দূৰৰ কথা মোৰ কোনো বন্ধুও নাছিল! হৃত্বিক ৰোশনে জনালে বুকুৰ বেদনা

হৃত্বিকে কয় যে শৈশৱত তেওঁ কথা কওঁতে বহুত খোনাইছিল যাৰ বাবে স্কুলত তেওঁক সমনীয়াই বহুত জোকাইছিল। হৃত্বিকে কয় যে এটা সময়ত তেওঁ খোনা আছিল বাবে গাৰ্লফ্ৰেণ্ড দূৰৰ কথা তেওঁৰ কোনো বন্ধু-বান্ধৱীও নাছিল। সেই সময়খিনি তেওঁৰ বাবে ইমানেই বেয়া আছিল যে তেওঁ অকলে বহি ঘণ্টাৰ পাছত ঘণ্টা ধৰি কান্দিছিল। অৱশ্যে সময়ৰ লগে লগে হৃত্বিকে নিজৰ ওপৰত আত্মবিশ্বাস গঢ়ি তুলিছিল আৰু হিন্দী চলচ্চিত্ৰ জগতৰ ছুপাৰষ্টাৰ হিচাপে পৰিগণিত হৈছিল।

ইয়াৰ বাহিৰেও হৃত্বিকে এই সমস্যাবোৰৰ সন্মুখীন হৈ কেনেদৰে আগবাঢ়ি গৈছিল আৰু অভিনেতা হিচাপে নিজকে প্ৰতিষ্ঠা কৰিছিল সেই কথাও কৈছে। তেওঁ ক'লে - ''মোৰ মেৰুদণ্ডত এটা সমস্যা হৈছিল যাৰ বাবে মই নাচিব পৰা নাছিলোঁ। ডাক্তৰে মোক কৈছিল যে মই কেতিয়াও অভিনেতা হ’ব নোৱাৰো।

কেইবামাহো মই হতাশাত থাকিলোঁ যদিও কিছুদিনৰ পাছত মানসিক আৰু শাৰীৰিক স্বাস্থ্যৰ কাম আৰম্ভ কৰিলোঁ আৰু সময়ৰ লগে লগে নিজকে সলনি কৰিবলৈ সক্ষম হ’লোঁ৷ মানুহে কৰিম বুলি ভাবিলে কোনোৱে বাধা দি ৰাখিব নোাৱাৰে।''

সঁচাকৈয়ে মানুহে নিজক গঢ়িম বুলি ভাবিলে কোনোৱে বাধা দি ৰাখিব নোৱাৰে, সেই কথা হৃত্বিকৰ ৰোশনৰ জীৱনলৈ চালেই বুজিব পাৰি। এটা সময়ত সকলোৱে জোকোৱা ল'ৰাজনে এতিয়া কোটি কোটি মানুহৰ হৃদয়ত বাস কৰিছে।