১,৫৭৮ কোটি টকাৰ বিশাল সম্পত্তিৰ গৰাকী বচ্চন দম্পতী ! ৰাজ্যসভাৰ মনোনয়নত জয়া বচ্চনৰ তথ্য

২০০৪ চনত জয়াই সমাজবাদী পাৰ্টীত যোগদান কৰে। ৰাজ্যসভাৰ সদস্য হিচাপে নিজৰ নাম ঘোষণা কৰাৰ পাছত জয়াই ঘোষণা কৰে যে অমিতাভ আৰু তেওঁৰ মুঠ সম্পত্তিৰ পৰিমাণ প্ৰায় ১৫৭৮ কোটি টকা। অমিতাভ আৰু জয়াৰ শপতনামা অনুসৰি দুয়োৰে স্থাৱৰ সম্পত্তি প্ৰায় ৮৫০ কোটি টকা। আনহাতে, তেওঁলোকৰ চলনশীল সম্পত্তিৰ পৰিমাণ ৭২৯ কোটি ৭৭ লাখ টকা। জয়াৰ বেংক একাউণ্টত জমা আছম ১০ কোটিৰো অধিক টকা। আনহাতে অমিতাভৰ ক্ষেত্ৰত এই ধনৰাশি ১২০ কোটি ৪৫ লাখ ৬২ হাজাৰ ৮৩ টকা।

বচ্চন পৰিয়ালৰ আড়ম্বৰপূৰ্ণ জীৱনশৈলী কাৰো বাবে অচিনাকি নহয়।জয়া বচ্চনৰ ব্যক্তিগত গহনাসমূহৰ মূল্য ৪০ কোটি ৯৭ লাখ টকা। ইয়াৰ বাহিৰেও তেওঁৰ এখন গাড়ী আছে যাৰ মূল্য ৯ লাখ ৮২ হাজাৰ টকা। আনহাতে অমিতাভৰ অলংকাৰৰ মুঠ মূল্য ৫৪ কোটি ৭৭ লাখ টকা। ইয়াৰ লগে লগে অমিতাভৰ ব্যক্তিগত সংগ্ৰহত মুঠ ১৬খন গাড়ী আছে। ইয়াৰ ভিতৰত দুখন মাৰ্চিডিজ আৰু এখন ৰ’লছ ৰয়েচ গাড়ীৰ মুঠ বজাৰ মূল্য ১৭ কোটি ৬৬ লাখ টকা।

উল্লেখ্য যে ২৭ ফেব্ৰুৱাৰীত ৰাজ্যসভাৰ নিৰ্বাচন। য'ত ১৫ খন ৰাজ্যৰ বাবে ৫৬ খন আসনত নিৰ্বাচন অনুষ্ঠিত হ’ব।সমাজবাদী পাৰ্টীয়ে জয়া বচ্চনৰ উপৰিও ৰাজ্যসভাৰ নিৰ্বাচনৰ বাবে প্ৰাক্তন সাংসদ ৰামজীলাল সুমন আৰু অৱসৰপ্ৰাপ্ত আই এ এছ বিষয়া আলোক ৰঞ্জনৰ নাম ঘোষণা কৰিছে।