ডিজিটেল ডেস্কঃ 777 চাৰ্লি ছবিখনে মুক্তিৰ লগে লগে দৰ্শকৰ বিপুল সমাদৰ লাভ কৰিবলৈ সক্ষম হৈছে। এই ছবিখন এখন হৃদয়স্পৰ্শী ছবি হিচাপে চিহ্নিত হৈছে। এই ছবিখনত এটা লেব্ৰাডৰ জাতিৰ কুকুৰে অভিনয় কৰিছে। ছবিখনত কুকুৰটোৰ নাম দিয়া হৈছে চাৰ্লি। চাৰ্লি ছবিখনৰ অন্যতম আকৰ্ষণ। এই ছবিখনৰ জনপ্ৰিয়তাৰ লগে লগে ৰাইজৰ মাজত লেব্ৰাডৰৰ প্ৰতি উন্মাদনা বাঢ়িছে। হঠাতে বৃদ্ধি পাইছে লেব্ৰাডৰ কুকুৰৰ চাহিদা। শেহতীয়াকৈ কৰ্ণাটকৰ মাংগালুৰু চহৰৰ আৰক্ষীয়ে তেওঁলোকৰ নতুন কুকুৰটোৰ নাম চাৰ্লি ৰাখিছে।
আৰক্ষী আয়ুক্ত এন শশী কুমাৰে জনোৱা মতে, নতুন কুকুৰটোক বিস্ফোৰক ধৰা পেলাবলৈ প্ৰশিক্ষণ দিয়া হ’ব। আনকি এই ছবিখনে কৰ্ণাটকৰ মুখ্যমন্ত্রী বাসৱৰাজ বম্মাইক চকুলো টুকিবলৈ বাধ্য কৰাইছিল৷ কাৰণ এই ছবিখন চাই তেওঁৰ মনত পৰিছিল তেওঁৰ পোহনীয়া কুকুৰটোলৈ, যি যোৱা বছৰ মৃত্যুমুখত পৰিছিল। লেব্ৰাডৰ মতা জাতৰ দাম প্ৰায় ৯ হাজাৰৰ পৰা ১২-১৩ হাজাৰলৈ বৃদ্ধি পাইছে আৰু মাইকী লেব্ৰাডৰৰ দাম চলি আছে ৮ হাজাৰ টকা। বু ৱেগী কেনেলছৰ কলন ডি’ছ’জাই কয় যে ছবিখন মুক্তি পোৱাৰ পিছত নিশ্চিতভাৱে লেব্ৰাডৰৰ চাহিদা বৃদ্ধি পাইছে।
777 Charlie ছবিখনৰ পৰিচালক হৈছে কিৰণৰাজ। ই কানাড়া ভাষাত নিৰ্মিত কমেডী-ড্ৰামা ফিল্ম। ইয়াত মুখ্য চৰিত্ৰত অভিনয় কৰিছে ৰক্ষিত শ্বেট্টী, সংগীতা শৃংগেৰী, ৰাজ বি শ্বেট্টী, ডেনিছ সৈত আৰু ববি সিমহা। পৰমৱাহ ষ্টুডিঅ’ৰ অধীনত ইয়াৰ প্ৰযোজনা কৰিছে ৰক্ষিত শ্বেট্টী আৰু জি এছ গুপ্তাই। ১০ জুনত ছবিখনে মুক্তি লাভ কৰিছে। এজন অকলশৰীয়া কাৰখানাৰ কৰ্মী আৰু এটা লেব্ৰাডৰ কুকুৰৰ মাজত হোৱা যাত্ৰা আৰু বন্ধনৰ কাহিনী এই ছবিখনত প্ৰকাশ পাইছে।
মূল চৰিত্ৰটোৰ নাম হৈছে ধৰ্ম, যি এজন অকলশৰীয়া আৰু মানুহৰ লগত সামাজিকভাৱে মিলিত নোহোৱা এজন মানুহ। তেওঁ এটা ফেক্টৰীত কাম কৰি সময় পাৰ কৰে। চাৰ্লি নামৰ এটা লেব্ৰাডৰ কুকুৰে ধৰ্মৰ জীৱনলৈ সম্পূৰ্ণ পৰিৱৰ্তন আনে। লিটিল চাৰ্লিৰ সৈতে মিলি ধৰ্মই জীৱনৰ উদ্দেশ্য বিচাৰি পায় আৰু নিজকে এগৰাকী উন্নত ব্যক্তিলৈ বিকশিত কৰে। এয়াই ছবিখনৰ মূল কাহিনী, যিয়ে দৰ্শকৰ হৃদয় চুই আৱেগিক কৰিবলৈ সক্ষম হৈছে।
Leave A Comment