ডিজিটেল ডেস্কঃ বিপৰ্যয়ৰ গ্ৰাসত বলীউডৰ কুইনখ্যাত কংগনা ৰাণাৱটৰ অভিনয় কেৰিয়াৰ৷চৰকাৰৰ কাষ চাপিও কংগনাৰ ইখনৰ পাছত সিখন চলচ্চিত্ৰ ফ্লপ হিচাপে চিহ্নিত হৈছে৷সামাজিক মাধ্যমত চৰকাৰৰ পৰোক্ষ মুখপাত্ৰ বুলি বহুসময়ত অভিযোগ থকা কংগনাই বক্স অফিচত মুখঠেকেচা খাইছে৷
কালি অৰ্থাৎ ২০২৩ চনৰ ২৭ অক্টোবৰ শুকুৰবাৰে ছবিগৃহত মুক্তি পালে কংগনা ৰাণাৱটৰ অভিনীত ছবি ‘তেজছ’। কংগনাৰ এই ছবিখনে সমালোচক আৰু দৰ্শকৰ পৰা মিশ্ৰিত সমালোচনা লাভ কৰিছে। ছবিখনত কংগনাই আইএএফৰ যুঁজাৰু বিমানৰ পাইলটৰ চৰিত্ৰত অভিনয় কৰিছে। এই ছবিখনৰ পৰা কংগনাৰ বহু আশা আছিল যদিও ‘তেজছ’ ছবিখনে প্ৰথম দিনাই বক্স অফিচত ফ্লপ প্ৰমাণিত হয়।
কংগনা ৰাণাৱটৰ ছবি ‘তেজছ’ৰ ট্ৰেইলাৰে খুব ভাল সঁহাৰি লাভ কৰিছিল যদিও মুকলিৰ পাছত বাণিজ্যিক সফলতা লাভ কৰাত ব্যৰ্থ কৰে।এই ছবিখন ছবিগৃহত মুক্তি হোৱাৰ লগে লগে দৰ্শকে কোনো ধৰণৰ প্ৰশংসা কৰাৰ পৰা দূৰত অৱস্থান কৰে।
∝ মুক্তিৰ প্ৰথম দিনাই ‘তেজছ’এ ১.২৫ কোটি টকা সংগ্ৰহ কৰে৷
∝Sacknilk ৰ আৰম্ভণিৰ প্ৰতিবেদন অনুসৰি মুক্তিৰ দ্বিতীয় দিনা তেজছে ১.৫০ কোটি টকা সংগ্ৰহ কৰিব৷যদিও এইসমূহ আনুমানিক পৰিসংখ্যা, তথাপিও চৰকাৰী সংখ্যা অহাৰ পাছত সামান্য পৰিৱৰ্তন হ’ব পাৰে।
অৱশ্যে কংগনাৰ অনুৰাগীসকলৰ মতে সম্প্ৰতি বহু ছবি ছবিগৃহত উপলব্ধ। ফুকৰে ৩ৰ পৰা গণপটলৈকে ছবিগৃহত চলি আছে৷ইপিনে মুক্তিৰ ৫০ দিনৰ পাছতো বক্স অফিচত ধন উপাৰ্জন কৰি আছে শ্বাহৰুখ খানৰ জৱানে। ইমানবোৰ ছবিৰ ভিৰৰ মাজত যেন কংগনাৰ তেজছৰ বাবে বৰ্তমান ধন উপাৰ্জন কৰাটো যথেষ্ট প্ৰত্যাহ্বানজনক।অৰ্থাৎ বহু চলচ্চিত্ৰ সমালোচকৰ বাবে এয়া হ’ব পাৰে কংগনাৰ অভিনয় কেৰিয়াৰৰ পৰিসমাপ্তি৷
Leave A Comment