ডিজিটেল ডেস্কঃ মানুহে দৈনিক ৮ গিলাচ পানী খাব লাগে। বহুতৰে পৰা এনে উপদেশ পোৱাটো সাধাৰণ কথা, কিন্তু সচাঁকৈয়ে আমাৰ শৰীৰক প্ৰতিদিনে ইমান পানীৰ প্ৰয়োজন হয়নে? শেহতীয়াকৈ ২৩খন দেশত কৰা এক গৱেষণাৰ পৰা জানিব পৰা গৈছে যে বৈজ্ঞানিক দৃষ্টিকোণৰ পৰা এই পৰামৰ্শ শুদ্ধ নহয়।
কিছুমান লোকে ২ লিটাৰৰ পৰিৱৰ্তে ১.৫ৰ পৰা ১.৮ লিটাৰ পানীহে খাব লাগে। শৰীৰৰ প্রয়োজনীয় পানীৰ আধাতকৈ অধিক খাদ্য সামগ্রী, চাহ-কফি, অন্যান্য পানীয়, চুপ, দাইল আদিৰ দ্বাৰা পূৰণ হয়। এনে পৰিস্থিতিত দৈনিক ৮ গিলাচ পানী খোৱাৰ ওপৰত গুৰুত্ব দিয়া উচিত নহয়।
গৱেষকসকলে ইয়াৰ বাবে ৮ বছৰৰ পৰা ৯৬ বছৰ বয়সৰ ৫ হাজাৰৰো অধিক লোকৰ ওপৰত বৈজ্ঞানিক পদ্ধতিৰে অধ্যয়ন কৰিছিল। ইয়াৰ ফলাফল বিজ্ঞান আলোচনীত প্ৰকাশ পাইছে। চৰ্চালৈ আহিল যে সকলো মানুহৰ মাজত পানীৰ প্ৰয়োজনীয়তা বেলেগ বেলেগ। এজন ব্যক্তিৰ বাসস্থান, ঋতু, উষ্ণতা, উচ্চতা, আৰ্দ্ৰতা আদি কাৰকে পানীৰ প্ৰয়োজনীয়তা নিৰ্ধাৰণ কৰে।
ব্যক্তিগত পৰ্যায়ত এজন ব্যক্তিৰ কাম, লিংগ, বয়স, ওজন আৰু ফিটনেছৰ দ্বাৰা পানীৰ প্ৰয়োজনীয়তা প্ৰভাৱিত হয়। ২০ৰ পৰা ৩০ বছৰীয়া পুৰুষ, খেলুৱৈ আৰু শাৰীৰিক শ্ৰম কৰা লোকক অধিক পানীৰ প্ৰয়োজন। উন্নয়নশীল দেশৰ কৃষকসকলৰ পানীৰ প্রয়োজন ঔদ্যোগিক দেশতকৈ অধিক৷
একেদৰে উচ্চ উষ্ণতা থকা দেশত বাস কৰা লোকসকলকো অধিক পানীৰ প্ৰয়োজন। গৰ্ভৱতী আৰু দুগ্ধপান কৰা মহিলাসকলকো অধিক পানীৰ প্ৰয়োজন। যদিও বহুতে পিয়াহ লাগিলেহে পানী খায়।
অধ্যাপক জন স্পিকমেনে কয় যে অধিক পানী খোৱাৰ কোনো ক্ষতি নাই, কিন্তু ব্ৰিটেইনৰ ৪ কোটি প্ৰাপ্তবয়স্ক লোকে যদি প্ৰতিদিনে আধা লিটাৰ অধিক পানী খায়, তেন্তে প্ৰতিদিনে ২০ কোটি লিটাৰ বিশুদ্ধ পানীৰ প্ৰয়োজন হ’ব।
Leave A Comment