• তালিবানী ত্ৰাস : আক্ৰমণত নিহত শীৰ্ষ আফগান বিষয়া

    আন্তঃৰাষ্ট্ৰীয়

    কাবুল : আফগানিস্তানত তালিবানৰ সন্ত্ৰাসে অনিয়ন্ত্ৰিত ৰূপ লৈছে। তালিবানৰ আক্ৰমণত প্ৰাণ হেৰুৱাইছে আফগান চৰকাৰৰ ‘মিডিয়া ইনফৰ্মেচন চেণ্টাৰ’ৰ মুৰব্বীগৰাকীয়ে। আফগান চৰকাৰে সদৰি কৰা মতে আজি দেশখনৰ ৰাজধানীত থকা এটা মছজিদত তেওঁক তালিবানে গুলীয়াই হত্যা কৰে। চৰকাৰৰ প্ৰতিনিধি আৰু শীৰ্ষ বিষয়াবৰ্গক আক্ৰমণৰ লক্ষ্য কৰি লোৱাৰ সতৰ্কবাণী প্ৰেৰণৰ পাছতে এই ভয়ংকৰ আক্ৰমণ সংঘটিত কৰে ইছলামিক মৌলবাদী অতি নৃশংস এই সংগঠনটোৱে।

    এই ঘটনাৰ পাছতে দেশখনৰ গৃহমন্ত্ৰনালয়ৰ মুখপাত্ৰ মিৰৱাইছ ষ্টানিকজায়ে প্ৰতিক্ৰিয়া প্ৰকাশ কৰি তালিবানৰ এই আক্ৰমণক কাপুৰুষালি আখ্যা দিয়ে। তেওঁ কয়, ‘দুৰ্ভাগ্যজনকভাৱে এই নৃশংস সন্ত্ৰাসবাদী সংগঠনটোৱে আন এটা কাপুৰষালিভৰা কাণ্ড সংঘটিত কৰিলে আৰু এগৰাকী দেশপ্ৰেমিক আফগান শ্বহীদ হ’বলগীয়া হ’ল।’ তালিবানৰ গুলীত প্ৰাণ হেৰুওৱা আফগান শীর্ষ বিষয়াগৰাকী হৈছে দাৱা খান মেনাপল। তালিবানে এই আক্ৰমণৰ দায়িত্ব স্বীকাৰ কৰিছে।

    তালিবানৰ মুখপাত্ৰ জাবিহুল্লাহ মুজাহিদে সংবাদ মাধ্যমলৈ এটা বাৰ্তা প্ৰেৰণ কৰি কয় যে, মুজাহিদিনৰ এটা বিশেষ আক্ৰমণত তেওঁক হত্যা কৰা হৈছে। উল্লেখ্য যে, বিগত মে’ মাহৰ পৰা তালিবানে আফগানিস্তানত নিজৰ সন্ত্ৰাস বৃদ্ধি কৰিছে আৰু দেশখনৰ সীমান্তৱৰ্তী আৰু প্ৰান্তীয় অঞ্চলবোৰৰ নিয়ন্ত্ৰণ নিজৰ দখললৈ আনিছে। কেৱল এয়াই নহয় সম্প্ৰতি দেশখনৰ ভালেমান বৃহৎ মহানগৰতো তালিবানে আফগান সামৰিক বাহিনীক প্ৰত্যাহ্বান জনাবলৈ আৰম্ভ কৰিছে। আফগানিস্তানৰ পৰা মাৰ্কিন সেনা প্ৰত্যাহাৰৰ পাছতে দেশখনৰ পৰিস্থিতিৰ দ্ৰুত অৱনতি ঘটিছে।

    Weather Forecast

    ASSAM WEATHER