মুম্বাই : সকলোকে কন্দুৱাই অৱশেষত পঞ্চভূতত বিলীন হ’ল জনপ্ৰিয় অভিনেতা সিদ্ধাৰ্থ শুক্লা। মুম্বাইৰ অ’ছিৱাৰা শ্মশানত ব্ৰহ্মাকুমাৰী নীতি-নিয়মেৰে শেষকৃত্য সম্পন্ন কৰা হয় সিদ্ধাৰ্থৰ। কুপাৰ হাস্পতালত মৰণোত্তৰ পৰীক্ষাৰ পাছত পোনে পোনে সিদ্ধাৰ্থৰ নশ্বৰ দেহ লৈ অহা হয় শ্মশানলৈ।
প্ৰয়াত অভিনেতাজনৰ পাৰ্থিৱ শৰীৰ শ্মশান আহি পোৱাৰ পাছতে শোকাকুল পৰিৱেশৰ সৃষ্টি হয়। পুত্ৰক শেষ বিদায়ৰ বাবে অহা সিদ্ধাৰ্থ শুক্লাৰ মাতৃ আৰু প্ৰেয়সী শ্বেহনাজ গীলৰ হিয়াভগা ক্ৰন্দনে উপস্থিত সকলোৰে চকু সিক্ত কৰি তোলে। সিদ্ধাৰ্থৰ শেষকৃত্যৰ বাবে শ্মশানস্থলীত উপস্থিত থাকে গুৰমীত চৌধুৰী, বিকাশ গুপ্তা, ৰাহুল মহাজন, দিব্যাংক দহিয়াৰ উপৰি বহু কলা-কুশলী।
ইফালে, প্ৰৱল বৃষ্টিপাতকো আওকান কৰি শ্মশানৰ প্ৰৱেশদ্বাৰত দুপৰীয়াৰে পৰা অপেক্ষা কৰি থাকে সিদ্ধাৰ্থৰ বহুসংখ্যক গুণমুগ্ধই। আৰক্ষীৰ বাধা নামানিও বহু সময় অপেক্ষা কৰি থকা গুণমুগ্ধসকলে অভিনেতাজনৰ নশ্বৰ দেহত শেষ শ্ৰদ্ধাঞ্জলি জনায়।
Leave A Comment