ডিজিটেল ডেস্ক: চেক গণৰাজ্যৰ সুন্দৰীলৈ ২০২৪ৰ বিশ্বসুন্দৰীৰ খিতাপ৷ ক্ৰিষ্টিনা পিস্জ’কোভাৰ শিৰত জিলিকিল বিশ্বসুন্দৰীৰ মুকুট৷ মুম্বাইৰ জিঅ’ ৱ’ৰ্ল্ড কনভেনচন চেণ্টাৰত শনিবাৰে অনুষ্ঠিত হয় ২০২৪ বৰ্ষৰ বিশ্বসুন্দৰী প্ৰতিযোগিতা৷ জাকজমকতাৰে সম্পন্ন হ’ল ৭১ সংখ্যক মিছ ৱৰ্ল্ড প্ৰতিযোগিতা৷ য’ত অংশগ্ৰহণ কৰিছিল বিশ্বৰ ১১৫খন দেশৰ সুন্দৰীয়ে৷ সৌন্দৰ্যৰ সমাহাৰ ঘটা জিঅ’ ৱৰ্ল্ড কনভেনচন চেণ্টাৰত শেষ হাঁহি মাৰিবলৈ সক্ষম হ’ল চেক গণৰাজ্যৰ ২৪ বছৰীয়া যুৱতী ক্ৰিষ্টিনাই৷
২০২২ৰ বিশ্বসুন্দৰী পোলেণ্ডৰ কেৰ’লিনাই ক্ৰিষ্টিনাৰ শিৰত পিন্ধাই দিলে বিজয়ৰ মুকুট৷ এইবাৰৰ মিছ ৱৰ্ল্ড প্ৰতিযাগিতাত ১২ গৰাকী বিচাৰকৰ ভিতৰত আসন শুৱনি কৰিলে বহুকেইগৰাকী ভাৰতীয় চেলিব্ৰিটীয়ে৷ বিচাৰকৰ আসনত দেখা গ’ল বলীউডৰ ছবি নিৰ্মাতা ছাজিদ নাডিয়াৱালা, অভিনেত্ৰী কীৰ্তি ছেনন, পূজা হেগৰে তথা ক্ৰিকেটাৰ হৰভজন সিঙৰ দৰে তাৰকাসকলক৷
আনহাতে শনিবাৰৰ অনুষ্ঠানত ঘোষকৰ ভূমিকাত আছিল কৰণ জোহৰ৷ অনুষ্ঠানত বলীউডৰ গায়ক ছান আৰু নেহা কক্কৰৰ সংগীতানুষ্ঠানে মোহাচ্ছন্ন কৰিছিল উপস্থিত অতিথিসকলক৷ প্ৰতিযোগিতা লেবাননৰ য়াছমিন জেটুনে নিৰ্বাচিত হয় প্ৰথম ৰানাৰ আপ হিচাপে৷ আনহাতে মিছ ৱৰ্ল্ড ২০২৪ত ভাৰতক প্ৰতিনিধিত্ব কৰিছিল সুন্দৰী মডেল শ্বিনা ছেট্টীয়ে৷ কিন্তু প্ৰতিযোগিতাখনৰ প্ৰথম চাৰিটা স্থানলৈ উত্তীৰ্ণ হোৱাত ব্যৰ্থ হ’ল ভাৰতীয় সুন্দৰীগৰাকী৷ আনহাতে চেক গণৰাজ্যৰ খিতাপ বিজয়ী ক্ৰিষ্টিনা হৈছে আইন আৰু MBA পাঠ্যক্ৰমৰ এগৰাকী ছাত্ৰী৷ এগৰাকী আন্তঃৰাষ্ট্রীয় মডেলৰূপে পৰিচিত ক্ৰিষ্টিনাই দৰিদ্ৰ লোকৰ সহায়ৰ বাবে গঠন কৰিছে এক দাতব্য সংস্থা৷ যাৰ জৰিয়তে এইগৰাকী সুন্দৰীয়ে তাঞ্জানিয়াৰ দৰে পিছপৰা দেশত বঞ্চিত শিশুৰ বাবে গঢ়ি তুলিছে ইংৰাজী মাধ্যমৰ বিদ্যালয়৷
Leave A Comment