• তালিবান প্ৰসংগত পুটিনৰ সৈতে মোদীৰ টেলিফোনিক বাৰ্তালাপ

    ৰাষ্ট্ৰীয়

    কাবুলঃ তালিবানে আফগানিস্তানত ক্ষমতা দখল কৰাৰ পাছত ভাৰততো ক্ৰমাৎ বৃদ্ধি পাইছে উদ্বেগ আৰু উৎকন্ঠাৰ লহৰ। মুছলমান অধ্যুষিত চুবুৰীয়াই দেশৰ নতুন চৰকাৰক স্বীকৃতি দিব নে নাই সম্প্ৰতি তাক লৈ জল্পনা-কল্পনা চলিছে সৰ্বত্ৰে। এনে উদ্বিগ্নতাৰ মাজতে দেশৰ প্ৰধানমন্ত্ৰী নৰেন্দ্ৰ মোদীয়ে মঙলবাৰে ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সৈতে আফগানিস্তান আৰু তালিবান প্ৰসংগত মত বিনিময় কৰে।

    প্ৰায় ৪৫মিনিটৰ টেলিফোনিক বাৰ্তালাপত কেতবোৰ গুৰুত্বপূৰ্ণ বিষয়ত আলোকপাত কৰা বুলি জানিবলৈ পোৱা গৈছে। দুয়োগৰাকী ৰাষ্ট্ৰপ্ৰধানে ৪৫ মিনিটৰ বাৰ্তালাপত আফগানিস্তানৰ প্ৰসংগত বিতং আলোচনাৰ কথা সদৰী কৰিছে। ইয়াৰ পূৰ্বেও দেশৰ প্ৰধানমন্ত্ৰী নৰেন্দ্ৰ মোদীয়ে জাৰ্মান চেঞ্চেলৰ এঞ্জেলা মাৰ্কেলৰ সৈতে আফগানিস্তানকে ধৰি কেইবাটাও বিষয়ত টেলিফোনযোগে মত বিনিময় কৰিছিল।


    উল্লেখ্য যে, চীনে ইতিমধ্যে তালিবানৰ সৈতে বন্ধুত্বপূৰ্ণ সম্পৰ্কৰ কথা মুকলিকৈ প্ৰকাশ কৰিছে। আফগানিস্তানত চীনা ৰাষ্ট্ৰদূতে কান্দাহাৰ ভ্ৰমণ কৰা বুলিও জানিবলৈ পোৱা গৈছে। এনে পৰিপ্ৰক্ষিতত ভাৰতৰ কপালত চিন্তাৰ ভাঁজ যে দীঘলীয়া হৈ আহিছে সেয়া অনস্বীকাৰ্য। গতিকে, ৰাছিয়াৰ ৰাষ্ট্ৰপতিৰ সৈতে দেশৰ প্ৰধানমন্ত্ৰীগৰাকীৰ বাৰ্তালাপে ভৱিষ্যতে কিমান সুদূৰপ্ৰসাৰী হয় সেয়াহে হ’ব লক্ষ্যণীয়!

    Weather Forecast