• নিস্তাৰ নাই ৰাজ কুন্দ্ৰাৰ! অপৰাধ শাখাৰ আবেদনলৈ আদালতৰ সঁহাৰি

    ৰাষ্ট্ৰীয়

    মু্ম্বাই : চেলিব্ৰিটি ব্যৱসায়ী তথা অভিনেত্ৰী শিল্পা শেট্টীৰ স্বামী ৰাজ কুন্দ্ৰাৰ আকাশৰ পৰা ডাৱৰ আঁতৰা নাই। কুন্দ্ৰাৰ জামিন আবেদনৰ শুনানি আদালতে ২০ আগষ্টলৈ পিছুৱাই দিয়াৰ লগে লগে তেওঁৰ কাৰাবাসৰ ম্যাদো বৃদ্ধি পালে। পৰ্ন’গ্ৰাফিক ছবি নিৰ্মাণ আৰু প্ৰচাৰৰ গোচৰত ১৯জুলাইতে গ্ৰেপ্তাৰ হৈছিল ৰাজ কুন্দ্ৰা। তেওঁৰ ১৪ দিনীয়া ন্যায়িক জিম্মাৰ ম্যাদ মঙলবাৰে অন্ত পৰিছিল যদিও সত্ৰ আদালতে তেওঁৰ জামিন আবেদনৰ শুনানি ২০ আগষ্টলৈ পিছুৱাই দিয়ে।

    মু্ম্বাই আৰক্ষীৰ অপৰাধ শাখাই তেওঁৰ জামিনৰ বিৰোধিতা কৰি ১৯টাকৈ কাৰণ দৰ্শোৱাৰ পাছতে কুন্দ্ৰাৰ আবেদনৰ শুনানি পিছুৱাই দিয়ে আদালতে। অপৰাধ শাখাই আদালতক জনাইছে যে, ৰাজ কুন্দ্ৰাই তদন্ত প্ৰক্ৰিয়াত সহযোগ কৰা নাই। তদন্তকাৰীয়ে লগতে কয় যে, ভালেমান তথ্য-প্ৰমাণ এতিয়াও সংগ্ৰহ কৰিবলৈ বাকী আছে আৰু বহু সাক্ষী তথা ভুক্তভোগী লোকে কুন্দ্ৰাৰ বিৰুদ্ধে সাক্ষ্য দিবলৈ আগবাঢ়ি আহিছে।

    কুন্দ্ৰা এজন প্ৰভাৱশালী লোক আৰু তেওঁ প্ৰমাণ নষ্ট কৰাৰ লগতে সাক্ষীক প্ৰভাৱিত কৰাৰ আশংকা আছে বুলিও অপৰাধ শাখাই আদালতক অৱগত কৰে। কুন্দ্ৰা যিহেতু এজন বৃটিছ নাগৰিক সেয়েহে তেওঁ দেশ এৰি পলাই যোৱাৰ সম্ভাৱনা থকাৰ কথাও আদালতক উনুকিয়াই দিয়ে অপৰাধ শাখাই। এনে পৰিপ্ৰেক্ষিতত ৰাজ কুন্দ্ৰাৰ কাৰাবাসী জীৱন অধিক দীঘলীয়া হৈ পৰিল। ২০ আগষ্টৰ শুনানিৰ পাছতহে তেওঁৰ ভাগ্য নিৰ্ধাৰণ হ’ব।

    Weather Forecast