• যুঁজি যোৱাৰ অংগীকাৰ ৩ আফগান কন্যাৰ

    ৰাষ্ট্ৰীয়

    কাবুলঃ তালিবানক বান্ধি দিয়া সময়সীমা উকলি যোৱাৰ পূৰ্বেই আমেৰিকা যুক্তৰাষ্ট্ৰৰ সেনাই আফগানিস্থান ত্যাগ কৰিছে। বিমল আনন্দ লাভ কৰিছে তালিবানে। আফগানিস্তানত তেওঁলোকৰ নিয়ন্ত্ৰণৰো কথা সজোৰে দাবী কৰিছে। আমেৰিকাই লুটি-বাগৰ মাৰিলেও আফগানিস্তানৰ মহিলাসকলে নতি স্বীকাৰ কৰিবলৈ অনিচ্ছুক। ২০বছৰ পিছুৱাই যোৱাৰ বিপৰীতে মৃত্যুলৈকে যুঁজাৰ দৃঢ় সংকল্প লৈছে আফগান মহিলাসকলে। তালিবানে কাবুল দখল কৰাৰ পাছত মহিলাৰ স্বাধীনতা খৰ্ব নকৰাৰ আশ্বাস দিছিল। কিন্তু পৰৱৰ্তী সময়ত বোৰ্খা পৰিধান নকৰা একাংশ মহিলাক বন্দী কৰি হত্যা কৰিছিল তালিবানে। শেহতীয়াকৈ আফগান মহিলাসকলে জাঙুৰ খাই উঠিছে তালিবানী বৰ্বৰতাত।

    আমেৰিকা যুক্তৰাষ্ট্ৰৰ এক সংবাদ মাধ্যমক দিয়া এক সাক্ষাৎকাৰত ৩ আফগান মহিলাই তেওঁলোকৰ শেহতীয়া অভিজ্ঞতাৰ ভাগ-বতৰা কৰা পৰিলক্ষিত হৈছে। তালিবানসকলে আফগানিস্তান দখলৰ পাছত তেওঁলোকৰ মনৰ আশংকা প্ৰকাশ কৰিছে।’ উল্লেখ্য যে, তালিবানৰ কাৰ্যকলাপত ভীতি-সন্ত্ৰস্ত হৈ পেৰালিম্পিকত অংশগ্ৰহণৰ পৰা বিৰত আছিল দেশখন। জাকিয়া খুদাদী, হাছান ৰাছাউলীৰ স্বপ্নভংগৰ সমান্তৰালকৈ বক্সাৰ সীমা ৰেজাইও ক্ষোভ প্ৰকাশ কৰিছে। তালিবানী ত্ৰাসৰ মাজতে অনাগত সময়ত অনুশীলন কৰি যাব বুলি অংগীকাৰ সীমাৰ।

    ক্ৰীড়াৰ লগতে মৌলবাদী সংগঠনটোৱে সংগীতো নিষিদ্ধ কৰিছে দেশখনত। জনপ্ৰিয় পপ তাৰকা আৰিয়ানা ছাইদে প্ৰাণৰ মমতাত দেশ ত্যাগ কৰাৰ বিপৰীতে জনপ্ৰিয় ইউটুবাৰ সাদিকা মাদাগৰে আফগানত থাকিয়েই কাম কৰি যাব বুলি জনাইছে। শেহতীয়াকৈ তালিবানে সংবাদ মাধ্যমৰ ওপৰতো চোকা নজৰ ৰাখিছে। তালিবান বিৰোধী সংবাদ পৰিৱেশনত কঠোৰ বিধি-নিষেধ বান্ধি দিয়া বুলি সংবাদ মাধ্যমত প্ৰকাশ পাইছে। আফগানিস্তানত সংবাদ সংস্থাৰ শোচনীয় অৱস্থাৰ প্ৰতি লক্ষ্য ৰাখি এগৰাকী মহিলা সাংবাদিক সৰব হৈ পৰা দেখা গৈছে। নাম প্ৰকাশত অনিচ্ছুক মহিলাগৰাকীয়ে কয়, ‘বিগত ৬বছৰ ধৰি সাংবাদিক হিচাপে মই কৰ্মৰত। শিৰচ্ছেদ হ’লেও নিৰ্ভীকতাৰে সংবাদ সেৱা আগবঢ়াই যোৱাই মোৰ সংকল্প।’


    বিজ্ঞানৰ পৰশ পৰা কোনো সচেতন নাগৰিকে তালিবানৰ ওচৰত নতজানু হ’ব নোৱাৰে। বিশ্বৰ সামগ্ৰিক প্ৰেক্ষাপটত মহিলাই বিশেষ ভূমিকা পালন কৰি আহিছে। আফগানিস্থানৰ সাময়িক পৰিস্থিতিৰ সৈতে মোকাবিলা কৰিবলৈ এতিয়া মহিলাসকলে আগবাঢ়ি আহিছে। অনাগত সময়ত মহিলাৰ পুনঃজাগৰণে দেশখনক কিদৰে প্ৰভাৱিত কৰে সেয়াহে হ’ব লক্ষ্যণীয়!

    Weather Forecast