জি-২০কোনো ৰাজনৈতিক দলৰ বৈঠক নহয় : প্ৰধানমন্ত্ৰী মোদীক সোঁৱৰাই দিলে মমতা বেনাৰ্জীয়ে

ৰাষ্ট্ৰপতি ভৱনত বিভিন্ন ৰাজনৈতিক দলৰ নেতাসকলৰ সৈতে জি-২০ সন্দৰ্ভত প্ৰধানমন্ত্ৰীৰ বৈঠকত মমতা বেনাৰ্জীকে ধৰি বিৰোধীয়ে এনে দাবী উত্থাপন কৰে।টিএমচি নেত্ৰীৰাকীয়ে  তিনিদিনীয়া দিল্লী ভ্ৰমণৰ কাৰ্যসূচীৰে কালিয়েই দিল্লীত উপস্থিত হৈছে।  তেওঁ ৰাষ্ট্ৰপতি ভৱনৰ সভাত উপস্থিত থাকি কয় যে ভাৰতে জি-২০ৰ সভাপতিত্ব কৰাটো  অতি ভাল খবৰ। আমি  এই সুযোগটো যিমান সম্ভৱ ব্যৱহাৰ কৰিব লাগিব। আমি সকলোৱে একেলগে কাম কৰিব লাগিব।

তেওঁ লগতে  কয় যে জি-২০ কাৰ্যসূচীয়ে দেশৰ স্বাৰ্থ পূৰণ কৰিব লাগিব, কোনো বিশেষ  পক্ষৰ নহয়। তেওঁ বিভিন্ন সময়ত বহুদলীয় প্ৰতিনিধি দলৰ সৈতে বিদেশ ভ্ৰমণৰ স্মৃতিও স্মৰণ কৰে। মমতাই কয় "বৈদেশিক নীতিৰ বিষয়ত সকলো পক্ষই একত্ৰিত হোৱাটো বাঞ্ছনীয়।  বৈঠকত উপস্থিত থকা চিপিআই নেতা ডি ৰাজাৰ কথা উল্লেখ কৰি মমতাই কয় যে এবাৰ তেওঁ আৰু ৰাজা একেটা প্ৰতিনিধি দলতে ভিয়েটনামলৈ গৈছিল।

কংগ্ৰেছ, বাওঁপন্থী আৰু ডিএমকেৰ দৰে বিৰোধী দলসমূহেও মোদী চৰকাৰক দেশখনৰ স্বাৰ্থক  দলৰ স্বাৰ্থতকৈ  আগত ৰাখিবলৈ আহ্বান জনাইছে। একে সময়তে, বিৰোধী দলবোৰেও বৈদেশিক নীতি আৰু জি-২০ সন্মিলনত কেন্দ্ৰৰ কাষত থিয় দিয়াৰ আশ্বাস দিছে। অ-বিজেপি ৬ জন মুখ্যমন্ত্ৰী আৰু ৫ জন প্ৰাক্তন মুখ্যমন্ত্ৰীয়ে  উক্ত বৈঠকত বক্তব্য ৰাখে। সামগ্ৰিকভাৱে জি-২০ক সমৰ্থন কৰাৰ আশ্বাস দিয়া স্বত্বেও কংগ্ৰেছ আৰু চিপিএমৰ  নেতাসকলে   কিছু সমালোচনাও কৰে। 

বৈঠকত  উপস্থিত থকা কংগ্ৰেছ সভাপতি মল্লিকাৰ্জুন খাৰ্গেই কয় যে এই সন্মিলন কোনো নিৰ্দিষ্ট চৰকাৰ , নেতা বা ব্যক্তিৰ সফলতা নহয়। ইন্দিৰা গান্ধীৰ সময়ত ভাৰত জোঁটবিহীন ৰাষ্ট্ৰসমূহৰ গোটৰ (এনএএম) সভাপতি হৈছিল। একে সময়তে তেওঁ কয় যে আমেৰিকা যুক্তৰাষ্ট্ৰৰ ভিছা পাবলৈ ছয় মাহ সময় লাগে। ইয়াক কূটনৈতিকভাৱে সমাধান কৰিব লাগিব। চিপিআই(এম)ৰ নেতা সীতাৰাম য়েচুৰীয়ে কয় যে ধনী দেশসমূহে জি-২০ৰ সুবিধা ল'বলৈ চেষ্টা কৰি আছে আৰু উন্নয়নশীল দেশসমূহৰ মূৰত বোজা জাপি দিছে।

কংগ্ৰেছ আৰু বাওঁপন্থীসকলৰ মতে কেন্দ্ৰই দেশৰ আভ্যন্তৰীণ সমস্যা যেনে অৰ্থনৈতিক মন্দাৱস্থা, মূল্যবৃদ্ধি, নিযুক্তিৰ বিষয়ে চিন্তিত নহয়। বৈঠকত অৰবিন্দ কেজৰিৱাল, এম কে ষ্টালিন, জগনমোহন ৰেড্ডী, দেৱগৌড়াৰ দৰে নেতাসকলো উপস্থিত থাকে।  নীতিশ কুমাৰ আৰু কে চন্দ্ৰশেখৰ ৰাও অৱশ্যে  বৈঠকত উপস্থিত নাছিল।