৪০০ কিলোমিটাৰ দূৰৰ থানালৈ হেৰোৱা জোতা আনিবলৈ যাবনে? আৰক্ষী বিষয়াই ভুক্তভোগীক জনালে- থানালৈ আহি আপোনাৰ জোতাযোৰ লৈ যাওক

প্ৰায় ৪০০ কিলোমিটাৰ ভ্ৰমণ কৰাৰ পাছত এজন ভক্তই কৃষ্ণৰ মন্দিৰ দৰ্শন কৰিবলৈ গৈছিল। বাহিৰলৈ ওলাই আহি তেওঁ দেখে যে তেওঁৰ জোতাযোৰ হেৰাইছে। পৰৱৰ্তী সময়ত ভুক্তভোগীগৰাকীয়ে জোতা চুৰিৰ অভিযোগ দাখিল কৰিছিল আৰক্ষী চকীত৷ তাৰ পাছত সময় বাগৰিল৷ 

সাত বছৰৰ পাছত মানুহজনে আৰক্ষীৰ পৰা এটা ফোনকল পাইছিল। আৰক্ষী থানাৰ পৰা তেওঁক থানালৈ আহি জোতাবোৰ চিনাক্ত কৰিবলৈ কৈছিল।

ঘটনাটো ৰাজস্থানৰ চিতোৰগড়ৰ। তাত এটা বিখ্যাত মন্দিৰ আছে। সাৱাৰীয়া শেঠ মন্দিৰ। মানুহে দূৰদূৰণিৰ পৰা ভ্ৰমণ কৰিবলৈ যায়। মধ্য প্ৰদেশৰ শিৱপুৰীত বাস কৰা মহেন্দ্ৰ কুমাৰ দুবেয়েও দৰ্শন কৰিছিল মন্দিৰটো৷ ২০১৭ৰ ১৪ জানুৱাৰীত তেওঁ মন্দিৰটোত উপস্থিত হৈছিল। তাতেই তেওঁৰ জোতা চুৰি হৈছিল। মহেন্দ্ৰই মানসফিয়া আৰক্ষী থানাত চুৰিকাৰ্যৰ লিখিত অভিযোগ দাখিল কৰিছিল। জোতাযোৰ বিচাৰি নাপায় মহেন্দ্ৰ ঘৰলৈ উভতি আহিছিল।

এতিয়া মহেন্দ্ৰ দুবে জোতাযোৰ ঘূৰাই আনিবলৈ ইমানদূৰ যাবনে নাই সেই বিষয়ে দ্বিধাগ্ৰস্ততাত আছে। তেওঁ কয় যে জোতাৰ মূল্যতকৈ যাতায়াতৰ বাবে অধিক ধন ব্যয় কৰা হ’ব। উদ্ধাৰ হোৱা জোতাবোৰত তেওঁৰ নিজৰ জোতাযোৰ থাকেনে নাই তাৰো কোনো নিশ্চয়তা নাই৷ 

মহেন্দ্ৰই আৰক্ষীজনক জোতাৰ ফটোবোৰ প্ৰেৰণ কৰিবলৈও কৈছিল, কিন্তু তেওঁক কোৱা হৈছিল যে তেওঁ আৰক্ষী চকীলৈ আহিহে তেওঁক চিনাক্ত কৰিব লাগিব।