২১ খন ৰাজ্য আৰু কেন্দ্ৰীয় শাসিত অঞ্চলৰ ১০২ টা সংসদীয় সমষ্টিৰ বাবে আৰম্ভ হ’ল মনোনয়নপত্ৰ দাখিল প্ৰক্ৰিয়া

অৱশ্যে বিহাৰত  মনোনয়ন পত্ৰ দাখিলৰ সময়সীমা ২৮  মাৰ্চলৈ বৃদ্ধি কৰা হৈছে। প্ৰাৰ্থীসকলে  নিৰ্ধাৰিত সময়সীমাৰ ভিতৰত  তেওঁলোকৰ মনোনয়ন প্ৰত্যাহাৰ কৰাৰো ব্যৱস্থা এইবাৰো পূৰ্বৰ দৰেই ৰখা হৈছে।   প্ৰাৰ্থিত্ব প্ৰত্যাহাৰৰ অন্তিম তাৰিখ  বেছিভাগ সমষ্টিৰ বাবে হৈছে ২০ মাৰ্চ আৰু বিহাৰৰ বাবে ২ এপ্ৰিল। ২০২৪ চনৰ লোকসভা নিৰ্বাচন সাত পৰ্যায়ত  অনুষ্ঠিত হ'ব। 

পৰ্যায়সমূহ ১৯  এপ্ৰিলৰ পৰা আৰম্ভ হ'ব আৰু ১ জুনত সমাপ্ত হ'ব। প্ৰতিটো পৰ্যায়ত বিভিন্ন ৰাজ্য আৰু কেন্দ্ৰীয় শাসিত অঞ্চলৰ বিভিন্ন সমষ্টি সামৰি লোৱা হ'ব। নিৰ্বাচনৰ ফলাফল ৪ জুনত ঘোষণা কৰা হ'ব৷ প্ৰথম পৰ্যায়ৰ ভোটগ্ৰহণত অৰুণাচল প্ৰদেশ, অসম, বিহাৰ, ছত্তীশগড়, মধ্য প্ৰদেশ, মহাৰাষ্ট্ৰ, ৰাজস্থান, তামিলনাডু, উত্তৰ প্ৰদেশ, পশ্চিম বংগ, জম্মু-কাশ্মীৰ, লক্ষদ্বীপ আৰু পুডুচেৰী আদি ৰাজ্য অন্তৰ্ভুক্ত হৈ আছে৷ চাৰিখন ৰাজ্যত একেলগে লোকসভা আৰু বিধানসভাৰ নিৰ্বাচনো অনুষ্ঠিত হ'ব। সেই ৰাজ্য কেইখন হৈছে ক্ৰমে  ছিকিম, ওড়িশা, অৰুণাচল প্ৰদেশ,  আৰু অন্ধ্ৰ প্ৰদেশ। জম্মু -কাশ্মীৰ ২০১৮ চনৰ পৰা ৰাষ্ট্ৰপতি শাসনৰ অধীনত আছে। 

ৰাজ্য খনত  নিৰাপত্তাজনিত কাৰণতেই লোকসভা নিৰ্বাচনৰ সময়ত  একেলগে নিৰ্বাচন অনুষ্ঠিত কৰা নহ'ব। বিহাৰ, গুজৰাট, হাৰিয়ানা, ঝাৰখণ্ডকে ধৰি একাধিক ৰাজ্যৰ ২৬  খন বিধানসভা আসনৰ বাবে উপ-নিৰ্বাচনো অনুষ্ঠিত হ'ব।  নিৰ্বাচন আয়োগে নিৰপেক্ষ আৰু স্বচ্ছ নিৰ্বাচন নিশ্চিত কৰাৰ বাবে বহু  ব্যৱস্থা গ্ৰহণ কৰিছে। 

 ৮৫  বছৰৰ অধিক বয়সৰ  ভোটাৰ আৰু বিকলাঙ্গ ব্যক্তিসকলৰ বাবে বিশেষ ব্যৱস্থা কৰা হ’ব।  যাৰ ফলত তেওঁলোকে ঘৰৰ পৰাই ভোট দিব পাৰিব।এইবেলি ৮৫ বছৰৰ অধিক বয়সৰ প্ৰায় ৮২ লাখ ভোটাৰ আছে।