ডিজিটেল ডেস্কঃ কাশ্মীৰৰ বিধানসভা নিৰ্বাচনলৈ আৰু বেছি দিন নাই, তাৰিখ ঘোষণা নহ'লেও ৰাজ্য খনত লোকসভা নিৰ্বাচনৰ পিছতে বিধানসভা নিৰ্বাচন অনুষ্ঠিত কৰিব লাগিব চৰকাৰে। এনেসময়তে প্ৰধানমন্ত্ৰী নৰেন্দ্ৰ মোদীয়ে শুকুৰবাৰে জম্মুৰ ধমপুৰত এক ৰেলী সম্বোধন কৰি কয় যে কাশ্মীৰৰ বিধানসভা নিৰ্বাচনলৈ বেছি দিন নাই । কাশ্মীৰে পুনৰ ৰাজ্যৰ মৰ্যাদা ওভতাই পাব ।
কংগ্ৰেছক আক্ৰমণ কৰি প্ৰধানমন্ত্ৰীয়ে কয় যে কংগ্ৰেছে ক্ষমতাৰ লোভতে অনুচ্ছেদ ৩৭০ বাহাল ৰাখিছিল। মোদীৰ চৰকাৰে ৫ আগষ্ট, ২০১৯ ত কাশ্মীৰৰ বিশেষ ৰাজ্যৰ মৰ্যাদা প্ৰত্যাহাৰ কৰিছিল আৰু উপত্যকাটোৰ জম্মু আৰু কাশ্মীৰ আৰু লাডাখক দুটা কেন্দ্ৰীয় শাসিত অঞ্চলত বিভক্ত কৰা হৈছিল। পিছত উচ্চতম ন্যায়ালয়ে ৰায় দিছিল যে অনুচ্ছেদ ৩৭০ বাতিল কৰাটো এটা আইনী প্ৰক্ৰিয়া। অৱশ্যে, উচ্চতম ন্যায়ালয়ে স্পষ্ট কৰি দিছিল যে কাশ্মীৰক তৎক্ষণাৎ পূৰ্ণ ৰাজ্যৰ মৰ্যাদা ঘূৰাই দিয়া উচিত।
আদালতে এই বছৰৰ ৩০ ছেপ্টেম্বৰৰ ভিতৰত ৰাজ্যখনত বিধানসভা নিৰ্বাচন অনুষ্ঠিত কৰিবলৈও নিৰ্দেশ দিছিল। বিশেষ সূত্ৰই প্ৰকাশ কৰা অনুসৰি, লোকসভা নিৰ্বাচন ২০২৪ শেষ হোৱাৰ পিছতহে কাশ্মীৰত নিৰ্বাচন প্ৰক্ৰিয়া আৰম্ভ হ'ব। বহুতে ধাৰণা কৰিছে যে আজিৰ দিনটোত মোদীৰ ভাষণে ৰাজ্য খনত বিধানসভা নিৰ্বাচনৰ সম্ভাৱনা উজ্জ্বল কৰি তুলিছে। উধমপুৰত এক ৰেলীত ভাষণ প্ৰদান কৰি প্ৰধানমন্ত্ৰীয়ে কয়, "মোদীয়ে দূৰ-দূৰলৈ চিন্তা কৰে। কাশ্মীৰৰ বিধানসভা নিৰ্বাচনলৈ আৰু বেছি দূৰ নাই। নিৰ্বাচনৰ লগতে কাশ্মীৰে এখন ৰাজ্যৰ মৰ্যাদাও ঘূৰাই পাব। আপোনালোকে আপোনালোকৰ মন্ত্ৰী আৰু বিধায়কসকলৰ সৈতে একেলগে সপোন দেখিব পাৰিব। "
প্ৰাক্তন মুখ্যমন্ত্ৰী ওমৰ আব্দুল্লাই অৱশ্যে মোদীক তীব্ৰ সমালোচনা কৰি কয় "প্ৰধানমন্ত্ৰীয়ে নিজাববীয়াকৈ কাশ্মীৰত বিধানসভা নিৰ্বাচনৰ ব্যৱস্থা কৰিলে ভাল হ'লহেঁতেন। এতিয়া উচ্চতম ন্যায়ালয়ৰ নিৰ্দেশ আছে, সেয়েহে বিধানসভা নিৰ্বাচন অনুষ্ঠিত কৰিবই লাগিব।" অৱশ্যে, অৱগত মহলে প্ৰশ্ন কৰিছে যে নিৰ্ধাৰিত সময়ৰ ভিতৰত বিধানসভা নিৰ্বাচন অনুষ্ঠিত হ'লেও, ৰাজ্যৰ স্থিতি ওভতাই দিয়া নহ'বও পাৰে । মোদীয়ে লোকসভা নিৰ্বাচনৰ আগত ৰাজনৈতিক লাভ লাভ অৰ্জন কৰিবলৈ ৰাজ্যৰ মৰ্যাদা পুনৰুদ্ধাৰ কৰাৰ কথা কৈছে নেকি তাকেলৈ বহুতে প্ৰশ্ন উত্থাপন কৰিছে।
Leave A Comment