ডিজিটেল ডেস্কঃ কোৱা হয় যে জন্ম,মৃত্যু আৰু বিবাহ ঈশ্বৰৰ লিখন। মানুহৰ যোৰাটো ওপৰতে নিৰ্ণয় কৰি থোৱা হয় বুলি আমাৰ সমাজে বিশ্বাস কৰে। কিছুমান কাহিনীলৈ চালে এই কথা সত্য যেন অনুভৱ হয়।
শেহতীয়াকৈ হোৱা এখন বিবাহে সকলোতে চৰ্চা লাভ কৰিছে।
বিহাৰৰ(Bihar) ভাগলপুৰৰ এহাল দৰা-কইনাই সকলোৰে দৃষ্টি আকৰ্ষণ কৰিছিল। এই বিয়াখনলৈ হাজাৰ হাজাৰ অনিমন্ত্ৰিত আহিছিল কিয়নো সকলোৱে এই দৰা-কইনাহালক ওচৰৰ পৰা চাব বিচাৰিছিল। সকলোৱে তেওঁলোকক আশীৰ্বাদ দিয়াৰ লগতে কইনা আৰু দৰাৰ সৈতে চেলফিও লৈছিল আৰু তেওঁলোক দুয়োৰে সফল বিবাহিত জীৱনৰ বাবে শুভকামনা জনাইছিল।
বিয়াখন অতি বিশেষ আছিল কাৰণ দৰাৰ উচ্চতা আছিল মাঁথো ৩৬ ইঞ্চি আৰু কইনাৰ উচ্চতা আছিল ৩৪ ইঞ্চি। দৰাৰ নাম মুন্না ভাৰতী। মুন্নাৰ বয়স ২৬। কইনাৰ নাম মমতা আৰু মমতাৰ বয়স ২৪। দৰা আৰু কইনা দুয়ো ভাগলপুৰ জিলাৰ বাসিন্দা। দৰাচলতে বিয়াখন অতি বিশেষ হৈ পৰিছিল কিয়নো ৩৬ ইঞ্চিৰ মুন্নাই তেওঁৰ বাবে উপযুক্ত জীৱনসংগী বিচাৰি পাইছিল।
মমতাৰ সৈতে মুন্নাৰ যুটিক সকলোৱে ঈশ্বৰৰ আশীৰ্বাদ বুলি অভিহিত কৰিছে। বিবাহথলীত উপস্থিত থকা সকলোৱে তেওঁলোকৰ কেমেৰাত এই নৱ দম্পতীৰ ফটো বন্দী কৰি আছিল। বিয়াৰ সময়ত, 'ৰব নে বানা দি জোড়ি' গানটো ডিজেত বজোৱা হৈছিল আৰু মানুহে গানটোত মতলীয়া হৈ নৃত্য কৰিছিল। হাজাৰ হাজাৰ স্থানীয় লোক বিয়াখনত উপস্থিত আছিল। বিয়াখন সমগ্ৰ এলেকাত আলোচনাৰ বিষয় হৈ পৰিছে।
Leave A Comment