ডিজিটেল ডেস্কঃ ওজন কমোৱাৰ অস্ত্ৰোপচাৰ কৰি মৃত্যুমুখত পৰিল এজন যুৱক। ২৩ এপ্ৰিল মঙলবাৰে নিশা তামিলনাডুৰ চেন্নাইত ওজন হ্ৰাসৰ নিৰ্ধাৰিত অস্ত্ৰোপচাৰৰ বাবে এনাস্থেচিয়া দিয়াৰ পিছত পুডুচেৰীৰ এজন ২৬ বছৰীয়া আই টি কৰ্মীৰ মৃত্যু হয়। বিপাকীয় আৰু বেৰিয়াট্ৰিক (ওজন হ্ৰাস) অস্ত্ৰোপচাৰ কৰিছিল যুৱকজনে। যুৱকজনৰ ওজন আঠিল ১৫০ কেজি।
কিন্তু অপাৰেচনৰ বাবে তেওঁক এনাস্থেচিয়া দিয়াত জটিলতা আহি পৰে। এই জটিলতাৰ ফলতে মৃত্যুক সাবটে এছ হেমাচন্দ্ৰন নামৰ যুৱকজনে।
হেমাচন্দ্ৰনৰ পিতৃ ডি চেলভানাথনে থিৰুৱল্লুৱ নগৰত ডাঃ পেৰুংগো আৰু তেওঁৰ সহায়কৰ লগতে পম্মালৰ বি পি জৈন চিকিৎসালয়ৰ বিৰুদ্ধে এজাহাৰ দাখিল কৰিছে।
যোৱা বছৰৰ এপ্ৰিল মাহত চিকিৎসকগৰাকীৰ ইউটিউব ভিডিঅ’ চোৱাৰ পিছত চেলভানাথান আৰু তেওঁৰ পুত্ৰই ওজন হ্ৰাসৰ অস্ত্ৰোপচাৰ সন্দৰ্ভত ৰেলা হাস্পতালত ডাঃ পেৰুংগোৰ সৈতে সাক্ষাৎ কৰে। চেলভানাথানে দাবী কৰে যে ওজন কমাবলৈ অস্ত্ৰোপচাৰ কৰাৰ পূৰ্বে চিকিৎসকে তেওঁৰ ডায়েবেটিছ ৰোগী পুত্ৰক কেইবাটাও পৰীক্ষাৰ মাজেৰে যাবলৈ পৰামৰ্শ দিছিল। তেওঁ দাবী কৰে যে চলিত বৰ্ষৰ ফেব্ৰুৱাৰী মাহত পুনৰ এবাৰ চিকিৎসকৰ ওচৰলৈ গৈছিল আৰু তেওঁক কোৱা হৈছিল যে তেওঁ এই প্ৰক্ৰিয়াৰ বাবে ধন দিব নোৱাৰে।
কিন্তু যেতিয়া চিকিৎসকৰ পি এয়ে তেওঁৰ সৈতে যোগাযোগ কৰে তেতিয়া চেলভানাথনক জনোৱা হয় যে বি পি জৈন হাস্পতালত এই প্ৰক্ৰিয়াটোৰ বাবে মাত্ৰ ৪ লাখ টকা খৰচ হ’ব, আনহাতে ৰেলা হাস্পতালত ৮ লাখ টকা খৰচ হ’ব।
চেলভানাথানে দাবী কৰে যে চিকিৎসক আৰু কৰ্মচাৰীয়ে উল্লেখ কৰা সকলো প্ৰয়োজনীয় সাৱধানতা তেওঁৰ পুত্ৰক অস্ত্ৰোপচাৰৰ বাবে ভৰ্তি কৰাৰ পিছত পৰিয়ালে গ্ৰহণ কৰিছিল। তেওঁ চিকিৎসালয়খনৰ লগতে ইয়াৰ লগত জড়িত চিকিৎসা পেছাদাৰীসকলৰ বিৰুদ্ধে কঠোৰ ব্যৱস্থা ল’বলৈ আৰক্ষীক আহ্বান জনায়।
Leave A Comment