ডিজিটেল ডেস্ক: স্বামী-স্ত্ৰীৰ মাজত বিবাদৰ খবৰবোৰ সাধাৰণ। কিন্তু কেতিয়াবা এই বিষয়টো থানালৈও যায়। বুধবাৰেও ৰাজধানী পাটনাতো এনেধৰণৰ ঘটনা সংঘটিত হয়। ঠাণ্ডাত পত্নীয়ে স্বামীৰ চুৱেটাৰটো ধুবলৈ পানীত ভৰাই দিলে। এই কথাত স্বামী ইমানেই ক্ষুব্ধ হৈ পৰিল যে গোটেই ঘৰখনতে জুই লগাই দিলে। অগ্নিকাণ্ড সংঘটিত হোৱাৰ পাছতে আতংকৰ সৃষ্টি হয়। ইমান হঠাতে সকলোবোৰ সংঘটিত হৈছিল যে পত্নীয়ে ধৰিবই নোৱাৰিলে। ইফালে জুইৰ শিখাও তীব্ৰতৰ হৈ পৰে। কেইমিনিটমানৰ ভিতৰতে গোটেই ঘৰখনতে জুই বিয়পি পৰিল।
এই সমগ্ৰ বিষয়টো ৰাজধানী পাটনাৰ গান্ধী মৈদান থানা এলেকাৰ পীৰমুহানি অঞ্চলৰ। এই ঘটনা কালি অৰ্থাৎ বুধবাৰে নিশা প্ৰায় ২.৩০ বজাত সংঘটিত হয়। আচলতে পীৰমুহানি অঞ্চলৰ এজন উকীলৰ ঘৰত এহাল দম্পতিয়ে ভাড়াতীয়া হিচাপে থাকে। মহিলাগৰাকীয়ে স্বামীক চুৱেটাৰটো ধুবলৈ পানীত ভৰাই থোৱাৰ কথা কোৱাৰ পাছতে স্বামীয়ে চুৱেটাৰটো দাবী কৰে। ইফালে চুৱেটাৰটো ধোৱাৰ বাবে পানীত ভৰাই থোৱা আছিল।
এই কথা শুনি স্বামীৰ খং উঠিল। খঙৰ কৱলত স্বামীয়ে আন কাপোৰত জুই লগাই দিলে। পত্নীয়ে স্বামীক কিবা বুজাই বাধা দিয়াৰ আগতেই জুই বিয়পিবলৈ ধৰিলে। পত্নীয়ে বাধা দিয়াৰ চেষ্টা কৰিলেও সফল হ’ব নোৱাৰিলে। কেইমিনিটমানৰ ভিতৰতে জুইৰ শিখা বিয়পি পৰিল। অগ্নিনিৰ্বাপক বাহিনীক খবৰ দিয়ে ৰাইজে। অৱশ্যে কিছু সময়ৰ পাছতে জুই নিয়ন্ত্ৰণ কৰিবলৈ সক্ষম হয়।
ঘটনাৰ পাছত আৰক্ষীয়েও এই বিষয়ে তথ্য লাভ কৰে। গান্ধী মৈদান থানাৰ আৰক্ষীয়ে মহিলাগৰাকীৰ স্বামীক জিম্মাত লয়। এই গোচৰত গান্ধী মৈদান থানাৰ মুৰব্বী অৰুণ কুমাৰে জনোৱা মতে, জিম্মাত লোৱা ব্যক্তিজনক জেৰা কৰা হৈছে। জানিব পৰা মতে তেওঁৰ মানসিক অৱস্থা ভাল নহয়। তেওঁৰ চিকিৎসাও চলি আছে। সেইবাবেই তেওঁক গ্ৰেপ্তাৰ কৰা হোৱা নাই।
Leave A Comment