ডিজিটেল ডেস্ক: আজি অৰুণাচল প্ৰদেশৰ ৰাজ্যিক প্ৰতিষ্ঠা দিৱসত অংশ লৈ অসমৰ মুখ্যমন্ত্ৰী ড° হিমন্ত বিশ্ব শৰ্মাই কয় যে, এই বছৰৰ শেষৰফালে অৰুণাচল প্ৰদেশৰ সৈতে থকা সৰ্বাধিক সীমা সমস্যা সমাধান কৰা হ’ব আৰু এপ্ৰিলৰ পৰাই ইয়াৰ প্ৰক্ৰিয়া আৰম্ভ কৰা হ’ব। মুখ্যমন্ত্ৰীয়ে আজি ইটানগৰত অৰুণাচল প্ৰদেশৰ ৩৬ সংখ্যক ৰাজ্যিক দিৱসত ভাষণ প্ৰদান কৰি অৰুণাচল প্ৰদেশৰ লোকসভাৰ সাংসদ তথা কেন্দ্ৰীয় মন্ত্ৰী কিৰেন ৰিজিজুক সীমা সমস্যা বিষয়টো সম্পৰ্কত নেতৃত্ব ল’বলৈ আহ্বান জনায়। দুয়োখন ৰাজ্যই সমস্যাটো সৌহাৰ্দ্যপূৰ্ণভাৱে সমাধান কৰিবলৈ সক্ষম হ’ব বুলি মুখ্যমন্ত্ৰীগৰাকীয়ে আশা প্ৰকাশ কৰে৷
অৰুণাচল প্ৰদেশৰ জনসাধাৰণক আশ্বাস দি শৰ্মাই কয় যে, এপ্ৰিলৰ পৰা আমি আলোচনা প্ৰক্ৰিয়া আৰম্ভ কৰিম আৰু এই বছৰৰ ভিতৰতে অসম আৰু অৰুণাচল প্ৰদেশৰ মাজত সৰ্বাধিক সীমা বিবাদ সমাধান হ’ব৷ অসমে মেঘালয়ৰ সৈতে ছটা বিতৰ্কিত অঞ্চলত সৌহাৰ্দ্যপূৰ্ণভাৱে বসতি কৰিব পৰা পৰিৱেশ তৈয়াৰ কৰিছে আৰু এতিয়া অৰুণাচল প্ৰদেশৰ মুখ্যমন্ত্ৰী পেমা খাণ্ডুৰ সৈতেও সীমা সমস্যা সন্দৰ্ভত আলোচনা কৰি আছে বুলি ড° শৰ্মাই উল্লেখ কৰে৷
অসম আৰু অৰুণাচল প্ৰদেশৰ লোকসকলে সদায়েই এক ঘনিষ্ঠ সম্পৰ্ক আৰু বান্ধোনৰ মাজেৰে জীৱননিৰ্বাহ কৰি আহিছে। ৰাজ্যৰ সীমাই আমাক শাৰীৰিকভাৱে ভাগ কৰিলেও, আৱেগিকভাৱে আমি সকলো সংযুক্ত বুলি তেওঁ এটা টুইটযোগে মন্তব্য কৰে৷
Leave A Comment