ঘৃণাৰ বিপৰীতে ঐক্য: দেশৰ ঘৃণাপূৰ্ণ পৰিস্থিতি সন্দৰ্ভত প্ৰধানমন্ত্ৰী মোদীক নীৰৱতা ভংগৰ আহ্বান

• Image Credit: Internet

• Jan 11, 2022 | Deleted

ডিজিটেল ডেস্ক: ভাৰতৰ গণতান্ত্ৰিক ব্যৱস্থাটোৰ প্ৰতি যিমানেই সংকট আৰু সংশয় নামি আহিছে, সিমানেই দেশৰ উদিত শক্তিয়ে দেশৰ গণতান্ত্ৰিক প্ৰমূল্যক ৰক্ষা কৰিবলৈ আন্তৰিক প্ৰয়াস অব্যাহত ৰাখিছে৷ এইবাৰ ইণ্ডিয়ান ইনষ্টিটিউট অব্ মেনেজমেণ্টৰৰ ১৮৩ গৰাকী শিক্ষাৰ্থী, কৰ্মচাৰী আৰু শিক্ষক সদস্যই প্ৰধানমন্ত্ৰী নৰেন্দ্ৰ মোদীলৈ এখন পত্ৰ লিখিছে৷ য’ত তেওঁলোকে প্ৰধানমন্ত্ৰীক উদ্দেশ্যি লিখিছে, ঘৃণাপূৰ্ণ কণ্ঠস্বৰৰ ওপৰত আপোনাৰ নীৰৱতাই ৰাষ্ট্ৰৰ একতাৰ প্ৰতি ভাবুকি সৃষ্টি কৰিছে৷ আহমেদাবাদ আৰু বাংগালোৰৰ আইআইএমৰ ১৮৩গৰাকী শিক্ষাৰ্থী, কৰ্মচাৰী আৰু শিক্ষকসদস্যই প্ৰধানমন্ত্ৰী মোদীক আজি সমগ্ৰ ভাৰতত প্ৰতিধ্বনিত হোৱা হিংসাত্মক ঘটনাৰ বহুতো ‘ঘৃণাপূৰ্ণ'’ আহ্বানৰ ওপৰত নীৰৱতা ভংগ কৰিবলৈ আহ্বান জনাইছে৷

প্ৰধানমন্ত্ৰীৰ কাৰ্যালয়লৈ প্ৰেৰণ কৰা পত্ৰখনত আহমেদাবাদ (আইআইএম-এ) আৰু বাংগালোৰৰ (আইআইএম-বি) আইআইএমৰ ১৬ গৰাকী অনুষদ সদস্যসহ ১৮৩ গৰাকী স্বাক্ষৰকাৰী আছিল৷ পত্ৰখনত লিখা হৈছে এনেদৰে, মাননীয় প্ৰধানমন্ত্ৰী, আমাৰ দেশৰ বহুসাংস্কৃতিক গাঁথনিক মূল্য দিয়া আমাৰ সকলোৰে বাবে হতাশাজনক। মাননীয় প্ৰধানমন্ত্ৰী, আপোনাৰ নীৰৱতাই ঘৃণাপূৰ্ণ কণ্ঠস্বৰক উৎসাহিত কৰে আৰু আমাৰ দেশৰ ঐক্য আৰু অখণ্ডতাৰ প্ৰতি ভাবুকি সৃষ্টি কৰে৷ ‘আমাক বিভাজন কৰিব বিচৰা শক্তি’ৰ পৰা দেশক আঁতৰাই নিবলৈ আহ্বান জনাই পত্ৰখনত উল্লেখ কৰা হৈছে যে ভাৰতীয় সংবিধানে প্ৰতিজন নাগৰিকক ভয় আৰু লাজ অবিহনে যিকোনো ধৰ্ম পালন কৰাৰ অধিকাৰ প্ৰদান কৰে।

তেওঁলোকে লগতে লিখিছে, আমাৰ দেশত এতিয়া এক ভয়ৰ ভাব আছে, শেহতীয়া দিনবোৰত গীৰ্জাকে ধৰি উপাসনাস্থলীসমূহ ভাঙি চূৰমাৰ কৰা হৈছে, আৰু আমাৰ মুছলমান ভাই-ভনীসকলৰ বিৰুদ্ধে অস্ত্ৰ লোৱাৰ আহ্বান জনোৱা হৈছে। এই সকলোবোৰ দায়মুক্তভাৱে আৰু উপযুক্ত প্ৰক্ৰিয়াৰ কোনো ভয় নোহোৱাকৈ সম্পন্ন কৰা হয় বুলি পত্ৰখনত কোৱা হৈছে। পত্ৰযোগে তেওঁলোকে কয়, আমি বিশ্বাস কৰোঁ যে এখন সমাজে সৃষ্টিশীলতা, উদ্ভাৱন আৰু বিকাশৰ ওপৰত গুৰুত্ব দিব পাৰে, বা সমাজে নিজৰ ভিতৰত বিভাজন সৃষ্টি কৰিব পাৰে। আমি এনে এখন ভাৰত গঢ়ি তুলিব বিচাৰো যি বিশ্বত সামগ্ৰিকতা আৰু বৈচিত্ৰ্যৰ এক অনুকৰণ হিচাপে থিয় হৈ আছে। পত্ৰত স্বাক্ষৰকাৰীসকলে লিখিছে, আপোনাক আৰু আমাৰ নিৰ্বাচিত সদস্যসকলক আমাৰ মহান ৰাষ্ট্ৰক সংজ্ঞায়িত কৰা সহিষ্ণুতা আৰু বৈচিত্ৰ্যৰ সংস্কৃতি সংৰক্ষণ কৰিবলৈ অনুৰোধ জনাইছোঁ। ধৰ্ম, জাতিৰ পৰিচয়ৰ ওপৰত আধাৰিত সম্প্ৰদায়ৰ বিৰুদ্ধে ঘৃণামূলক ভাষণ আৰু হিংসাৰ আহ্বান গ্ৰহণযোগ্য নহয় বুলি প্ৰধানমন্ত্ৰীলৈ লিখা পত্ৰত তেওঁলোকে উল্লেখ কৰে৷