দেশৰ ৰাজনীতিৰ বাবে বৃহৎ খবৰ, কংগ্ৰেছলৈ প্ৰশান্ত কিশোৰ!

• Image Credit: Internet

• Jul 14, 2021 | moderator

নতুন দিল্লী : অচিৰেই এক বৃহৎ পৰিৱৰ্তন আহিব পাৰে দেশৰ ৰাজনীতিলৈ। দেশৰ মূল বিৰোধী দল কংগ্ৰেছে দলত সৃষ্টি হোৱা জড়তা দূৰ কৰাৰ বাবে দলটোৱে শীঘ্ৰেই গ্ৰহণ কৰিব পাৰে বৃহৎ পদক্ষেপ। কংগ্ৰেছত যোগ দিব পাৰে দেশৰ এগৰাকী অতি প্ৰভাৱশালী নিৰ্বাচনী কৌশল নিৰ্ধাৰক প্ৰশান্ত কিশোৰে। দেশৰ ৰাজনীতিত একপ্ৰকাৰ চমৎকাৰিত্ব সংঘটিত কৰিবলৈ সক্ষম হোৱা প্ৰশান্ত কিশোৰ কংগ্ৰেছত যোগ দিয়াটো দেশৰ ৰাজনাতিৰ এক বৃহৎ ঘটনা হিচাপে চিহ্নিত হ’ব পাৰে।

প্ৰশান্ত কিশোৰে কংগ্ৰেছ সভাপতি ছোনীয়া গান্ধী, মহাসচিব প্ৰিয়ংকা গান্ধী আৰু প্ৰাক্তন সভাপতি ৰাহুল গান্ধীক সাক্ষাৎ কৰি আলোচনাত মিলিত হোৱাৰ পাছত এই সম্পৰ্কীয় চৰ্চা তীব্ৰ হৈ পৰিছে। উচ্চস্তৰীয় সূত্ৰই প্ৰশান্ত কিশোৰে কংগ্ৰেছত যোগ দিব পাৰে বুলি মন্তব্য কৰিছে। মঙলবাৰে দিল্লীত ৰাহুল গান্ধীৰ বাসভৱত প্ৰশান্ত কিশোৰৰে মিলিত হৈছিল কংগ্ৰেছৰ হাইকমাণ্ড। সূত্ৰটোৱে দাবী কৰিছে যে, প্ৰশান্ত কিশোৰৰ সৈতে ৰাজনৈতিক কৌশল নিৰ্ধাৰকজনৰ এই বৈঠক পঞ্জাব বা উত্তৰ প্ৰদেশৰ নিৰ্বাচনকেন্দ্ৰিক নাছিল বৰং তাতকৈ বৃহৎ এক বিষয় সন্দৰ্ভত আলোচনা কৰা হৈছিল। সূত্ৰটোৱে দাবী কৰা মতে ২০২৪চনৰ লোকসভা নিৰ্বাচনত কংগ্ৰেছৰ হৈ প্ৰশান্ত কিশোৰে এটা গুৰুত্বপূৰ্ণ ভূমিকা গ্ৰহণ কৰাৰ সম্ভাৱনা আছে। মন কৰিবলগীয়া যে, ২০১৪ চনত নৰেন্দ্ৰ মোদীৰ নেতৃত্বত বিজেপি দল শাসনলৈ অহাৰ আঁৰত প্ৰশান্ত কিশোৰৰ পৰিকল্পনা তথা কৌশলে বিশেষ ভূমিকা গ্ৰহণ কৰিছিল। তাৰ পাছতো একাধিক ৰাজ্যৰ বিধানসভা নিৰ্বাচনত প্ৰশান্ত কিশোৰৰ ‘মেজিক টাচ্চ’ৰ চমৎকাৰিত্ব প্ৰতিভাত হৈছিল। শেহতীয়াকৈ পশ্চিমবংগ বিধানসভা নিৰ্বাচনত প্ৰশান্ত কিশোৰৰ দিশ নিৰ্দেশাৰেই মমতা বেনাৰ্জীৰ তৃণমূলে মহাশক্তিধৰ বিজেপিক ওফৰাই দিবলৈ সক্ষম হৈছিল। তাৰ পাছৰ শেহতীয়া এই কুচকাৱাজ দেশৰ ৰাজনীতিৰ বাবে নতুন আলোড়নৰ বিষয় হোৱাৰ সম্ভাৱনা আছে।