ডিজিটেল ডেস্ক : জম্মু আৰু কাশ্মীৰৰ প্ৰাক্তন মুখ্যমন্ত্ৰী তথা জম্মু আৰু কাশ্মীৰ নেচনেল কনফাৰেন্সৰ সভাপতি ফাৰুক আব্দুল্লাই কয় যে, মাতৃভাষা হৈছে ব্যক্তি এগৰাকীৰ সংস্কৃতি আৰু পৰিচয়ৰ এক অন্তৰ্নিহিত উপাদান, আৰু জম্মু আৰু কাশ্মীৰৰ ভাষিক বৈচিত্ৰ্য সুৰক্ষিত কৰাৰ বাবে সকলো প্ৰচেষ্টা কৰা উচিত৷ আন্তৰ্জাতিক মাতৃভাষা দিৱসত তেওঁৰ বাৰ্তাত আব্দুল্লাই কয় যে, বিদ্যালয়সমূহত শিক্ষাৰ মাধ্যম মাতৃভাষা হ’ব লাগিব, বিশেষকৈ গঠনমূলক পৰ্যায়ত। ই সৃষ্টিশীলতা আৰু ব্যক্তিত্ব বিকাশৰ অভিব্যক্তিৰ বাবে এক শক্তিশালী ভেটি স্থাপন কৰে। গঠনমূলক পৰ্যায়ত সৃজনশীলতাও বৃদ্ধি কৰে মাতৃভাষাই।
তেওঁ লগতে কয়, কাশ্মীৰী
ভাষাৰ ক্ষেত্ৰত ভাষাটো বিভিন্ন কবি, ঋষি, ভাষ্যবাদী আৰু ভাষাবিদসকলৰ দ্বাৰা হাজাৰ হাজাৰ বছৰধৰি ধ্ৰুপদী আৰু লোক সাহিত্যৰ সৈতে সমৃদ্ধ৷ বৃহৎ সংখ্যক চৰ্চাকাৰী থকা কাশ্মীৰীয়ে অষ্টম অনুসূচীত উল্লেখ কৰা ২২টা ভাষাৰ ভিতৰত এটা হোৱাৰ সৌভাগ্য লাভ কৰিছে৷ সেয়েহে, সময়ৰ আহ্বানমৰ্মে ভাষাটোক সুৰক্ষিত কৰিবলৈ আৰু প্ৰচাৰ কৰিবলৈ আমূল পদক্ষেপ লোৱাৰ প্ৰয়োজন।
জম্মু-কাশ্মীৰৰ কাশ্মীৰী, ডোগৰী, পঞ্জাবী আৰু অন্যান্য ভাষাসমূহ জীয়াই ৰখাত সহায় কৰাৰ বাবে এক ব্যাপক ৰণনীতিৰ আহ্বান জনাই শ্ৰীনগৰৰ সাংসদগৰাকীয়ে শিক্ষা খণ্ডত, বিশেষকৈ শিক্ষাৰ গঠনমূলক পৰ্যায়ত মাতৃভাষাক অগ্ৰাধিকাৰ দিবলৈও আহ্বান জনায়। আব্দুল্লাই অভিভাৱকসকলক তেওঁলোকৰ মাতৃভাষাক ঘৰত যোগাযোগৰ মাধ্যম হিচাপে ব্যৱহাৰ কৰিবলৈ আহ্বান জনায়৷ জম্মু-কাশ্মীৰত নিজৰ মাতৃভাষাত যোগাযোগ কৰাতো তেওঁলোক সকলোৰে বাবে গৌৰৱৰ বিষয় হ’ব লাগে বুলিও তেওঁ উল্লেখ কৰে৷
Leave A Comment