নৰেশ টিকাইটৰ ঘোষণা: উত্তৰ প্ৰদেশৰ নিৰ্বাচনত সক্ৰিয় অংশগ্ৰহণ কৰিব বিদ্ৰোহী কৃষকে

• Image Credit: Internet

• Jan 13, 2022 | Deleted

ডিজিটেল ডেস্ক: ভাৰতীয় কিষাণ ইউনিয়নৰ সভাপতি তথা কৃষক বিদ্ৰোহৰ অন্যতম অগ্ৰণী নেতা নৰেশ টিকাইটে এটা ৰাষ্ট্ৰীয় স্বতন্ত্ৰ ডিজিটেল সংবাদ প্ৰতিষ্ঠানৰ সৈতে এক বাৰ্তালাপত মন্তব্য কৰিছে যে বিদ্ৰোহত অংশ লোৱা কৃষকসকলে পৰৱৰ্তী নিৰ্বাচনত বিজেপিক পৰাজিত কৰিব৷ তেওঁ লগতে কয় যে কেন্দ্ৰৰ দ্বাৰা কৃষকে পোৱা অপমান পাহৰিব নোৱাৰি৷ কিষাণ ইউনিয়নৰ সভাপতিয়ে উত্তৰ প্ৰদেশৰ ৰাজনীতিত কৃষক আন্দোলনৰ প্ৰভাৱৰ বিষয়ে সংবাদ প্ৰতিষ্ঠানটোৰে বাৰ্তালাপত মিলিত হৈছিল৷ বিদ্ৰোহত অংশ লোৱা কৃষকসকলে উত্তৰ প্ৰদেশৰ সমাগত বিধানসভা নিৰ্বাচনত সক্ৰিয় অংশগ্ৰহণ কৰাৰ উপৰি সামগ্ৰিকভাৱে নিৰ্বাচনটোত এক গুৰুত্বপূৰ্ণ ভূমিকা পালন কৰিব বুলিও সদৰি কৰে নৰেশ টিকাইটে৷

উল্লেখযোগ্য যে, প্ৰায় দুবছৰধৰি চলা কৃষক আন্দোলনৰ ফলত বিজেপি নেতৃত্বাধীন কেন্দ্ৰীয় চৰকাৰে তিনিখন বিতৰ্কিত কৃষি আইন প্ৰত্যাহাৰ কৰিবলৈ বাধ্য হৈছিল৷ কৃষি আইন প্ৰত্যাহাৰৰ পাছত সম্প্ৰতি নিৰ্বাচনমুখী উত্তৰ প্ৰদেশৰ নিৰ্বাচনৰ বাবে কৃষক সংগঠনসমূহে আন্দোলনটোৱে যি সূত্ৰ উলিয়াইছে, তাৰ ৰাজনৈতিক প্ৰভাৱ নিৰ্বাচনৰ ফলাফলত দেখাৰ পূৰ্ণ সম্ভাৱনা আছে। বিশেষকৈ, পশ্চিম উত্তৰ প্ৰদেশত ২০১৩ চনৰ মুজাফৰনগৰ সংঘৰ্ষৰ পাছত এক তিক্ত সম্পৰ্ক গঢ়ি উঠা জাট আৰু মুছলমানসকলৰ মাজত সৃষ্টি হোৱা একতাই বিজেপিৰ নিৰ্বাচনী সম্ভাৱনাক আঘাত কৰাৰ সম্ভাৱনা আছে৷

যদিও কৃষি আইন বাতিল কৰা হৈছে, তথাপিও কৃষক সংগঠনবোৰে বিধানসভা নিৰ্বাচনত ৰাজনৈতিকভাৱে বিজেপিৰ সৈতে যুঁজ দিয়াৰ প্ৰতিশ্ৰুতি দিছে। এই পটভূমিত ইয়াৰ উপৰিও সংবাদ প্ৰতিষ্ঠানটোৰ সাংবাদিকগৰাকীয়ে ভাৰতীয় কিষাণ ইউনিয়নৰ সভাপতি নৰেশ টিকাইটৰ সৈতে কৃষকৰ সমস্যা, উত্তৰ প্ৰদেশৰ ৰাজনীতিত কৃষক আন্দোলনৰ প্ৰভাৱ আৰু কেইবাটাও বিষয়ত কৃষক আন্দোলনৰ স্থিতি সম্পৰ্কত বুজিবলৈ এক সাক্ষাৎকাৰ গ্ৰহণ কৰিছিল৷