হিন্দী চিনেমাৰে সহজেই বিৰোধীক আক্ৰমণ কৰিছে বিজেপিয়ে “দ্য এক্সিডেণ্টেল প্ৰাইম মিনিষ্টাৰ”ৰ পৰা “ দ্য কাশ্মীৰ ফাইলছ”লৈ

চিনেমাক ৰাজনৈতিক হাথিয়াৰ হিচাপে ব্যৱহাৰ কৰাৰ উদাহৰণ বহুত আছে৷ ১৯১৭ চনত চোভিয়েট ইউনিয়নত , ১৯৩০ চনত নাজী বাহিনীয়েও ৰাজনৈতিক স্বাৰ্থ সফল কৰিবলৈ চিনেমাক ব্যৱহাৰ কৰিছিল৷ বৰ্তমান ষ্টেলীন, হিটলাৰৰ পথৰেই আগবাঢ়িছে প্ৰধানমন্ত্ৰী নৰেন্দ্ৰ মোডী তথা বিজেপি দল৷ প্ৰচাৰৰ বাবে এই দলটোৱে কোটি কোটি ৰাজহুৱা ধন ব্যয় কৰাৰো তথ্য আছে৷ শেহতীয়াকৈ দলটোৱে চিনেমাৰ জৰিয়তে ভাৰতৰ ইতিহাস বিকৃতকৰণৰ বাবে যি প্ৰচেষ্টা চলাই আছে সেইয়া সাধাৰণ জনতাই বুজিবই পৰা নাই৷ 

২০১৯ চনত মুক্তি লাভ কৰা “দ্য এক্সিডেণ্টেল প্ৰাইম মিনিষ্টাৰ” ছবিখনৰ জৰিয়তে এফালে কংগ্ৰেছ দলৰ অন্তঃকন্দল আৰু পৰিয়ালকেন্দ্ৰীক ৰাজনীতিৰ প্ৰতিচ্ছবি প্ৰতিফলিত কৰা হৈছিল৷ আনফালে কংগ্ৰেছ দলৰ প্ৰতি মানুহৰ মনত বিৰূপ মনোভাৱ সৃষ্টি কৰাত সফল হৈছিল বিজেপি দল। ইয়াৰোপৰি ভাৰতৰ প্ৰাক্তন প্ৰধানমন্ত্ৰী লাল বাহাদুৰ শাস্ত্ৰীৰ জীৱন ভিত্তিক বোলছবি “ দ্য তাচখণ্ড ফাইলছ ” ৰ জৰিয়তেও এটা বিৰোধী দলৰ দুৰ্বলতা সমূহ আঙুলিয়াই দেখুওৱা হৈছিল৷ 

বিভিন্ন সময়ত মুক্তি পোৱা বলীউডৰ ছবি সমূহৰ উপৰিও বহু বলীউডৰ অভিনেতা এতিয়া বিজেপি দলৰ অন্তভুৰ্ক্ত৷ বহু অভিনেতাই বিজেপি দলৰ ছত্ৰছায়াত প্ৰতক্ষ্য ৰাজনীতিত যোগদান কৰাৰ উপৰিও বহুতে মুকলিকৈ এই দলৰ প্ৰচাৰত নামি পৰিছে৷ এই ক্ষেত্ৰত অনুপম খেৰ, কংগনা ৰানাৱট আদিৰ নামেই প্ৰথমে মনলৈ আহে৷ 

তেলেংগানৰ মন্ত্ৰী কে টি ৰামা ৰাওয়ে অভিযোগ কৰিছিল যে, পোন্ধৰখন চিনেমাৰ জৰিয়তে বিজেপিয়ে নিজৰ সমৰ্থনত প্ৰচাৰ চলাইছে ৷ বিজেপি দলৰ স্বাৰ্থত নিৰ্মিত ছবিৰ কথা ক’লেই মনলৈ আহে “ The Kashmir Files” ৰ নাম৷দলীয় নেতা সকলে মুকলিকৈ এই ছবিৰ প্ৰচাৰ চলাবলৈ কুন্ঠাবোধ কৰা নাছিল৷ আনকি  কৰ্মচাৰী সকলক চিনেমাখন উপভোগ কৰিব পৰাকৈ চৰকাৰীভাৱে ছুটিও দিয়া হৈছিল৷ দলীয় স্বাৰ্থ অবিহনে চিনেমাখনৰ প্ৰতি  দলটোৰ ইমান অনুকম্পা নাথাকিলহেঁতেন৷ আনফালে কংগনা ৰানাৱটে মুখ্য চৰিত্ৰত অভিনয় কৰা  “Emergency” শীৰ্ষক ছবিখনৰ জৰিয়তেও যে এটা বিশেষ  দলৰ সমৰ্থনত জনমত গঢ়ি তোলাৰ যো-জা   চলোৱা হৈছে সেইয়া সহজেই অনুমেয়৷ 

ভাৰতীয় বোলছবি উদ্যোগটো বহু লোকৰ ত্যাগ আৰু কষ্টৰ ফচল৷ গতিকে এই উদ্যোগটো দলীয় স্বাৰ্থৰ উৰ্ধত৷ এটা দলৰ স্বাৰ্থত বাৰে বাৰে এই উদ্যোগটো ব্যৱহাৰ হৈ থাকিলে এই উদ্যোগৰ গৰিমা যে অতি সোনকালেই লোপ পাব সেইয়া নিশ্চিত৷ সমান্তৰালভাৱে , চিনেমাক ৰাজনৈতিক অস্ত্ৰ হিচাপে ব্যৱহাৰ কৰাৰ ফলত ভাৰতীয় গণতন্ত্ৰও অদূৰ ভৱিষ্যতে যথেষ্ট সংকটৰ সন্মুখীন হ’ব৷