অসম চুক্তি ৰূপায়নৰ ৰোড মেপ প্ৰস্তুত কৰিবলৈ এতিয়াও বাকী ! অতুল বৰাৰ স্বীকাৰ

খিলঞ্জীয়াৰ সুৰক্ষাক লৈ প্ৰতাৰণা কৰি অহা চৰকাৰ খনে বুধবাৰে বিধানসভাৰ অধিৱেশন চলিথকা সময়তে কেবিনেট মন্ত্ৰী অতুল বৰাই এক বৃহৎ ঘোষণা কৰিছে৷ অতুল বৰাই অসম চুক্তি ৰূপায়নৰ বাবে অসম চৰকাৰে তিনিমাহৰ ভিতৰত বিস্তৃত পৰিকল্পনা প্ৰস্তুুত কৰিব বুলি ঘোষণা কৰে৷ অধিবেশনৰ প্ৰশ্নোত্তৰ সময়ত প্ৰশ্নৰ উত্তৰত কেবিনেট মন্ত্ৰী অতুল বৰাই কয় যে ‘তিনিমাহৰ ভিতৰত অসম চুক্তি ৰূপায়নৰ বিস্তৃত পৰিকল্পনা কেন্দ্ৰৰ হাতত জমা দিব পাৰিম বুলি আশাবাদী৷ অসম চুক্তি ৰূপায়নৰ কৰ্তৃত্ব কেন্দ্ৰৰ গৃহ মন্ত্ৰালয়ৰ হাততহে আছে৷ কেন্দ্ৰৰ গৃহ মন্ত্ৰালয়ৰ সহযোগিতা অবিহনে অসম চুক্তি ৰূপায়ন সম্ভৱ নহয়৷’ বুলি সদনত উল্লেখ কৰে৷

‘ন্যায়াধীশ বিপ্লপ কুমাৰ শৰ্মা নেতৃত্বত গঠিত সমিতিৰ পৰামৰ্শ অনুসৰি ৰাজ্য চৰকাৰে উপ-সমিতি গঠন কৰিছে৷ এই সমিতি সমূহে অসম চুক্তি কাৰ্যকৰী কৰাৰ ক্ষেত্ৰত আইনী আৰু সাংবিধানিক প্ৰত্যাহ্বানসমূহ দূৰ কৰাত গুৰুত্ব প্ৰদান কৰিব, বিশেষকৈ অসম চুক্তিৰ ৬ নং দফা সন্দৰ্ভত গুৰুত্ব প্ৰদান কৰা হ’ব।’ বুলি মন্ত্ৰী বৰাই সদনত সদৰি কৰে৷ 

‘বিপ্লাপ কুমাৰ শৰ্মা সমিতিৰ প্ৰতিবেদনত প্ৰদান কৰা পৰামৰ্শসমূহ কাৰ্যকৰী কৰিবলৈ কোনো ধৰণৰ সাংবিধানিক তথা আইনী বাধা নাহে তাৰ প্ৰতি লক্ষ্য ৰাখি উপ-সমিতিসমূহ গঠন কৰা হৈছিল।’ বুলিও বৰাই মন্তব্য কৰি কয় যে এতিয়ালৈকে চুক্তিখনৰ দফাসমূহৰ ওপৰত পুংখানুপুংখ আলোচনা কৰিবলৈ পাঁচখন বৈঠক অনুষ্ঠিত হৈ গৈছে, সম্প্ৰতি আন এখন বৈঠক চলি আছে বুলি উল্লেখ কৰে মন্ত্ৰী বৰাই৷

অবৈধ অনুপ্ৰৱেশৰ বিষয়ে সম্বোধন কৰি কেবিনেট মন্ত্ৰী গৰাকীয়ে কয় যে অসম চুক্তি স্বাক্ষৰিত হোৱাৰ পাছত বিগত ৩৯ বছৰত অসমত প্ৰৱেশ কৰা মুঠ ৩০,১১৩ জন অবৈধ বাংলাদেশী অনুপ্ৰৱেশকাৰীক বিতাড়িত কৰা হৈছে। এই সমস্যাসমূহ সমাধানৰ বাবে চৰকাৰে সক্ৰিয়ভাৱে কাম কৰি আছে বুলি সদৰি কৰে৷

বিৰোধী দলৰ নেতা দেৱব্ৰত শইকীয়াই অতুল বৰাই বৰাক সমালোচনা কৰি কয় যে এই সন্দৰ্ভত  অতুল বৰাই পৰ্যাপ্ত বিৱৰণ দিয়াত ব্যৰ্থ  বুলি অভিযোগ উত্থাপন কৰে। লগতে এন আৰ চি প্ৰক্ৰিয়া পুনৰ আৰম্ভ কৰাৰ দাবী উত্থাপন কৰি অসম চুক্তিৰ ৰূপায়ণৰ কৰিবলৈ দাবী উত্থাপন কৰে।

অসম চুক্তি ৰূপায়নত যে চৰকাৰ আগ্ৰহী নহয় অতুলবৰাই সদনত প্ৰদান কৰা ভাষ্য পৰা সহযেই অনুমেয়৷ বিজেপি নেতৃত্বাধীন ৰাজ্য চৰকাৰে অসম চুক্তি ৰূপায়নৰ বাবে কৰা ঘোষণা কাৰ্যকৰী কৰিব নে অনাগত সময়ৰ দৰে জনসাধাৰণক আভুৱা ভাৰি থাকিব   

সেয়া লক্ষণীয় হ’ব৷