মুখ্যমন্ত্ৰীৰ কেবিনেট বৈঠকত গুৰুত্বপূৰ্ণ সিদ্ধান্ত; ৰূপায়ন হ’ব অসম চুক্তিৰ ৬নং দফা

বুধবাৰে মুখ্যমন্ত্ৰীৰ কেবিনেট বৈঠকত অসম চুক্তি ৰূপায়নৰ ক্ষেত্ৰত গুৰুত্বপূৰ্ণ সিদ্ধান্ত গ্ৰহণ কৰিছে৷ অসম চুক্তিৰ ৬নং দফা সন্দৰ্ভত ন্যায়াধীশ বিপ্লৱ শৰ্মা সমিতিয়ে প্ৰদান কৰা ৬৭ টা পৰামৰ্শৰ ভিতৰত ৫৭ টা পৰামৰ্শ কাৰ্যকৰী কৰাৰ প্ৰতিশ্ৰুতি দিছে অসম চৰকাৰে। বুধবাৰে অনুষ্ঠিত কেবিনেট বৈঠকৰ পাছতে মুখ্যমন্ত্ৰী হিমন্ত বিশ্ব শৰ্মাই এই সিদ্ধান্ত সম্পৰ্কে সদৰি কৰিছে।

মুখ্যমন্ত্ৰীগৰাকীয়ে বিপ্লৱ শৰ্মা সমিতিয়ে প্ৰদান কৰা প্ৰতিবেদনৰ ওপৰত আলোচনা কৰি ২০২৫ চনৰ ১৫ এপ্ৰিলৰ ভিতৰত ৫৭ টা পৰামৰ্শ আছু আৰু অন্যান্য সংগঠনৰ সৈতে আলোচনাৰ মাধ্যমেৰে কাৰ্যকৰী কৰাৰ সিদ্ধান্ত গ্ৰহণ কৰিছে বুলি উল্লেখ কৰে। ডিমা হাছাও,কাৰ্বি আংলং, আৰু বড়ো স্বায়ত্তশাসিত অঞ্চলৰ দৰে ষষ্ঠ অনুসূচীৰ অঞ্চলসমূহৰ বাহিৰে সমগ্ৰ ৰাজ্যজুৰি প্ৰযোজ্য হ’ব ৫৭ টা পৰামৰ্শ৷ বাকী অঞ্চল সমূহৰ ক্ষেত্ৰত অধিক আলোচনাৰ প্ৰয়োজন বুলি সদৰি কৰিছে৷ 

উল্লেখনীয় যে অসম চুক্তিৰ ৬ নং দফাত ‘অসমৰ সাংবিধানিক, আইনী আৰু প্ৰশাসনিক ক্ষেত্ৰত সুৰক্ষা, অসমৰ আপুৰুগীয়া সম্পদৰাজি সাহিত্য, সংস্কৃতি তথা ভাষিক সুৰক্ষা, সংৰক্ষণ আৰু প্ৰচাৰ কৰা।’ বিষয়ে উল্লেখ আছে। অসমৰ মুখ্যমন্ত্ৰীগৰাকীয়ে সদৰি কৰা অনুসৰি অসম চুক্তিৰ ৬ নং দফাৰ প্ৰণয়নৰ বাবে প্ৰদান কৰা পৰামৰ্শৰ ৮৫% পৰামৰ্শ কাৰ্যকৰী কৰা হ’ব, বাকীখিনি প্ৰণয়ন কৰা কেন্দ্ৰ চৰকাৰৰ হাতত বুলি উল্লেখ কৰে।