ডিজিটেল ডেস্ক: লোকসভা নিৰ্বাচন চমুু চপাৰ লগে লগে দেশত তৎপৰ হৈছে বিৰোধী শিবিৰ৷ প্ৰধানমন্ত্ৰী মোদী আৰু বিজেপিৰ সমালোচনাত মুখৰ হৈ পৰিছে বিৰোধী৷ শেহতীয়াকৈ বিৰোধী শিবিৰৰ মাজত তৃতীয় মৰ্চা গঠনৰ কুচকাৱাজ চলিছে৷
বিৰোধীৰ তৃতীয় মৰ্চা গঠনৰ প্ৰসংগক লৈ মুখ খুলিছে কংগ্ৰেছে৷ কংগ্ৰেছৰ মতে তৃতীয় মৰ্চাই সহায়হে কৰিব বিজেপিক!
২০২৪ চনৰ লোকসভা নিৰ্বাচনত বিজেপিৰ বিৰুদ্ধে যুঁজ দিবলৈ কংগ্ৰেছে সমভাৱাপন্ন ধৰ্মনিৰপেক্ষ দলসমূহক চিনাক্ত, সংগঠিত আৰু একত্ৰিত কৰা উচিত৷ দলটোৱে আজি বিৰোধী ঐক্যৰ বাবে এক নতুন প্ৰচেষ্টাৰ অংশ হিচাপে এই মন্তব্য আগবঢ়ায়।
আমি ধৰ্মনিৰপেক্ষ আঞ্চলিক শক্তিসমূহক অন্তৰ্ভুক্ত কৰা উচিত যিসকলে আমাৰ আদৰ্শৰ সৈতে সন্মত। উমৈহতীয়া আদৰ্শগত ভিত্তিত এন ডি এৰ সৈতে এক ঐক্যবদ্ধ বিৰোধীৰ আৱশ্যকতা আছে। যিকোনো তৃতীয় শক্তিৰ উত্থানে বিজেপি/এন ডি এক সুবিধাহে প্ৰদান কৰিব বুলি দলটোৱে এক প্ৰস্তাৱত কয়।
শুকুৰবাৰে কংগ্ৰেছৰ ৮৫ সংখ্যক পূৰ্ণাংগ অধিৱেশনত ভাষণত কংগ্ৰেছ সভাপতি মল্লিকাৰ্জুন খৰ্গেই কয় যে দলটোৱে লোকসভা নিৰ্বাচনৰ বাবে সমভাৱাপন্ন দলসমূহৰ সৈতে মিত্ৰতা কৰিবলৈ বাট চাই আছে। প্ৰচলিত কঠিন পৰিস্থিতিত, কংগ্ৰেছ হৈছে দেশৰ একমাত্ৰ দল যি সক্ষম আৰু নিৰ্ণায়ক নেতৃত্ব প্ৰদান কৰিব পাৰে বুলি তেওঁ দৃঢ়তাৰে মন্তব্য কৰে।
ইতিমধ্যে কংগ্ৰেছে তেলেংগানাৰ মুখ্যমন্ত্ৰী কে চন্দ্ৰশেখৰ ৰাও, মহাৰাষ্ট্ৰৰ প্ৰাক্তন মুখ্যমন্ত্ৰী উদ্ধৱ থাকৰে আৰু নেচনেলিষ্ট কংগ্ৰেছ পাৰ্টি (এনচিপি)ৰ মুৰব্বী শাৰদ পাৱাৰকে ধৰি কেইবাজনো বিৰোধী নেতাৰ সৈতে আলোচনাত মিলিত হৈ বিজেপি বিৰোধী শক্তি গঢ়ি তুলিবলৈ প্ৰচেষ্টা অব্যাহত ৰাখিছে৷
Leave A Comment