ডিজিটেল ডেস্ক: ‘মণিপুৰৰ পৰা ১৪ জানুৱাৰীত আৰম্ভ হ’বলগীয়া কংগ্ৰেছ নেতা ৰাহুল গান্ধীৰ ‘ভাৰত জোড়ো ন্যায় যাত্ৰা’ত দেশৰ মৌলিক সামাজিক, ৰাজনৈতিক আৰু অৰ্থনৈতিক বিষয়সমূহৰ ওপৰত গুৰুত্ব দিয়া হ’ব৷’— ‘ভাৰত জোড়ো ন্যায় যাত্ৰা’ৰ লোগো আৰু টেগলাইন মুকলি কৰি এই মন্তব্য দলটোৰ মুৰব্বী মল্লিকাৰ্জুন খৰ্গেৰ। খৰ্গেই শনিবাৰে ‘ভাৰত জোড়ো ন্যায় যাত্ৰা’ৰ টেগলাইন মুকলি কৰে৷ এই যাত্ৰাৰ টেগলাইন- ন্যায় নোপোৱালৈকে...
সংবাদমেলত কংগ্ৰেছ সভাপতিগৰাকীয়ে কয়, আমি ১৪ জানুৱাৰীৰ পৰা ‘ভাৰত জোড়ো ন্যায় যাত্ৰা’ আৰম্ভ কৰিবলৈ গৈ আছোঁ। ৰাহুল গান্ধীৰ নেতৃত্বত এই যাত্ৰা মণিপুৰৰ ইম্ফলৰ পৰা আৰম্ভ হ’ব আৰু মুম্বাইত সমাপ্ত হোৱাৰ আগতে দেশৰ ১৫খন ৰাজ্যৰ মাজেৰে পাৰ হ’ব। এই যাত্ৰাত ১১০খন জিলা, ১০০টা লোকসভা আসন আৰু ৩৩৭টা বিধানসভা সামৰি লোৱা হ’ব৷
ছ’চিয়েল মিডিয়া এক্সৰ জৰিয়তে ৰাহুল গান্ধীয়ে কয়, আমি ন্যায়ৰ শ্ল’গান দি অন্যায় আৰু অহংকাৰৰ বিৰুদ্ধে আমাৰ নিজৰ মানুহৰ মাজৰ পৰা আহিছোঁ। ৰাহুল গান্ধীয়ে পূৰ্বে তেওঁৰ নেতৃত্বত ভাৰত জোড়ো যাত্ৰাৰ এটা ভিডিঅ’ শ্বেয়াৰ কৰি কয়, মই সত্যৰ এই পথত শপত খাইছোঁ আৰু ন্যায়ৰ অধিকাৰ নোপোৱালৈকে যাত্ৰা অব্যাহত থাকিব।
এই যাত্ৰাই ৬৭ দিনত ৬,৭০০ কিলোমিটাৰৰো অধিক দূৰত্ব অতিক্ৰম কৰিব বুলি কংগ্ৰেছৰ মুখপাত্ৰ ধনঞ্জয় ঠাকুৰে উল্লেখ কৰে৷ এই যাত্ৰা ১৬-১৭ ফেব্ৰুৱাৰীৰ পাছত ছত্তীশগড়ত উপস্থিত হ’ব বুলি আশা কৰা হৈছে আৰু ই ৰাজ্যখনৰ পাঁচ দিনৰ ভিতৰত সাতখন জিলাক সামৰি ল‘ব, য'ত জনজাতীয় লোকৰ সংখ্যা প্ৰায় ৩২ শতাংশ৷
তেওঁ লগতে কয়, কংগ্ৰেছে ‘সত্যাগ্ৰহ’ক ৰাজহুৱা অধিকাৰৰ বাবে যুঁজিবলৈ এক শক্তিশালী অস্ত্ৰ বুলি গণ্য কৰে আৰু স্বাধীনতাৰ পাছৰ পৰা ভাৰত জোড়ো ন্যায় পদযাত্ৰা দেশৰ আটাইতকৈ বৃহৎ আৰু পৰিৱৰ্তনশীল সত্যাগ্ৰহ হিচাপে প্ৰমাণিত হ’ব।
ৰাজনৈতিক বিশেষজ্ঞসকলৰ মতে, কংগ্ৰেছে লোকসভা নিৰ্বাচনৰ পূৰ্বে যাত্ৰাৰ জৰিয়তে ছত্তীশগড়ত দলীয় কৰ্মীসকলৰ মনোবল বৃদ্ধি কৰিব বিচাৰিছে কিয়নো ৰাজ্যখনৰ শেহতীয়া বিধানসভা নিৰ্বাচনত দলটোৱে শোচনীয় পৰাজয়ৰ সন্মুখীন হৈছিল।
Leave A Comment