লোকসভাৰ পূৰ্বে সালসলনি বিচৰা নাই বিজেপিয়ে; ৰাষ্ট্ৰীয় কাৰ্যনিৰ্বাহকত সৰ্বসন্মতিক্ৰমে নড্ডাৰ কাৰ্যকাল বৃদ্ধি

 

দলটোৰ জ্যেষ্ঠ ৰণনীতিবিদ অমিত শ্বাহে আজি দলটোৰ ৰাষ্ট্ৰীয় কাৰ্যনিৰ্বাহক বৈঠকৰ দ্বিতীয় দিনৰ মাজতে কৰে এই বৃহৎ ঘোষণা৷

আশা কৰা হৈছিল যে নড্ডাৰ কাৰ্যকাল বৃদ্ধি কৰা হ'ব৷ কিয়নো, এই বছৰ নখন ৰাজ্যৰ বিধানসভা নিৰ্বাচন আৰু ২০২৪ত সাধাৰণ নিৰ্বাচন অনুষ্ঠিত হ'ব। এই নিৰ্বাচনসমূহৰ পূৰ্বে সলনি হোৱাটো বিচৰা নাই বিজেপিয়ে৷

বিজেপিৰ ৰাষ্ট্ৰীয় কাৰ্যনিৰ্বাহকে সৰ্বসন্মতিক্ৰমে দলৰ সভাপতি জেপি নড্ডাৰ কাৰ্যকাল ২০২৪ৰ জুনলৈকে বৃদ্ধি কৰাৰ সিদ্ধান্ত লৈছে বুলি অমিত শ্বাহে এখন সংবাদমেলত ঘোষণা কৰে। সংবাদমেলত তেওঁ কয়, আমি নিশ্চিত যে প্ৰধানমন্ত্ৰী নৰেন্দ্ৰ মোদী আৰু বিজেপি সভাপতি নড্ডাৰ অধীনত দলটোৱে ২০১৯তকৈ বৃহৎ জনাদেশৰ সৈতে ২০২৪ চনৰ লোকসভা নিৰ্বাচনত জয়ী হ'ব৷

কালি নড্ডাই উল্লেখ কৰিছিল যে দলৰ নেতাসকলে এই বছৰ নখন ৰাজ্যৰ বিধানসভা নিৰ্বাচনত বিজয় নিশ্চিত কৰিব লাগিব।

প্ৰধানমন্ত্ৰী মোদীয়ে বৈঠকৰ সামৰণি অধিৱেশনত দলটোৰ বাবে ৰাজনৈতিক ৰূপৰেখা প্ৰস্তুত কৰিব বুলি আশা কৰা হৈছে, য'ত কেন্দ্ৰীয় মন্ত্ৰী, বিজেপিশাসিত ৰাজ্যৰ মুখ্যমন্ত্ৰী আৰু সমগ্ৰ দেশৰ প্ৰায় ৩৫০জন শীৰ্ষস্থানীয় বিজেপি নেতা উপস্থিত আছে।