‘অপাৰেচন ল'টাছ’ ৰোধৰ পৰিকল্পনাৰে এইবাৰ ‘মিছন বিৰোধী’: নেতৃত্বত নীতিশ কুমাৰ

বিজেপিৰ সৈতে মিত্ৰতা ত্যাগ কৰি দেশৰ বিৰোধী ৰাজনীতিত নিজকে এক শক্তিশালী নেতা হিচাপে প্ৰক্ষেপ কৰাৰ পাছত নীতিশ কুমাৰে প্ৰধানমন্ত্ৰী পদৰ প্ৰাৰ্থীৰ বাবে প্ৰস্তুতি চলোৱা বুলি চৰ্চা চলি আহিছে।  পিছে গান্ধীক সাক্ষাৎ কৰি ওলাই অহাৰ পিছত কুমাৰে সাংবাদিকৰ সৈতে বাৰ্তালাপ কৰি প্ৰধানমন্ত্ৰী পদৰ বাবে তেওঁৰ কোনো উচ্চাকাংক্ষা নাই বুলি স্পষ্ট কৰি দিয়ে। সাংবাদিকৰ সন্মুখত বিজেপিৰ আগ্ৰাসী ৰাজনীতিৰ ইঙ্গিত দি কুমাৰে আঞ্চলিক দলসমূহক দুৰ্বল কৰাৰ এক সম্মিলিত প্ৰয়াস কৰা হৈছে বুলি অভিযোগ কৰে। এই পৰিকল্পনা ৰোধৰ বাবেই সাধাৰণ নিৰ্বাচনৰ পূৰ্বে বিৰোধীক একত্ৰিত কৰাৰ বাবে তেওঁ প্ৰয়াস কৰিছে বুলি মন্তব্য কৰে জেষ্ঠ নেতাগৰাকীয়ে। 

ইফালে ৰাহুল গান্ধীক সাক্ষাতৰ পাছতে কুমাৰে জনতা দল (চেকুলাৰ)ৰ মুৰব্বী এইচ.ডি. কুমাৰস্বামীকো সাক্ষাৎসাকে। কৰ্ণাটকত বিজেপিক ক্ষমতাৰ পৰা আঁতৰাই ৰখাৰ উদ্দেশ্যে ২০১৮ চনত কংগ্ৰেছ আৰু জনতা দল (চেকুলাৰ)- এ মিত্ৰজোঁট গঠন কৰি বিৰোধী মৰ্চা গঠনৰ প্ৰচেষ্টাত গতি দিছিল।

বিৰোধী ঐক্য শক্তিশালী কৰাৰ স্বাৰ্থতে বিহাৰৰ মুখ্যমন্ত্ৰীগৰাকীয়ে আজি আম আদমী পাৰ্টিৰ মুৰব্বী তথা দিল্লীৰ মুখ্যমন্ত্ৰী অৰবিন্দ কেজৰিৱালক সাক্ষাৎ কৰাৰ সম্ভাৱনা প্ৰকাশ  পাইছে। সম্প্ৰতি দেশৰ ৰাজনীতিত কংগ্ৰেছক পিছলৈ ঠেলি বিজেপিৰ সন্মুখত মুখ্য প্ৰত্যাহ্বান হিচাপে গঢ় লৈ উঠিছে কেজৰিৱালৰ আপ। গতিকে ‘মিছন বিৰোধী’ৰ সফল ৰূপায়নত কেজৰিৱালৰ অন্তৰ্ভুক্তি যথেষ্ট গুৰুত্বপূর্ণ হিচাপে বিবেচিত হৈছে।

আনহাতে বিগত সময়চোৱাত বিজেপি বিৰোধী গোটৰ অন্যতম প্ৰধান নেতা হিচাপে পৰিচিত নেচনেলিষ্ট কংগ্ৰেছ পাৰ্টিৰ মুৰব্বী শাৰদ পাৱাৰকো নীতিশ কুমাৰে সাক্ষাৎ কৰাৰ সম্ভাৱনা আছে। পাৱাৰে ২০১৯ চনৰ লোকসভা নিৰ্বাচনৰ সময়ত বিৰোধীক একত্ৰিত কৰাত মুখ্য ভূমিকা গ্ৰহণ কৰিছিল। তদুপৰি শেহতীয়া ৰাজনৈতিক অস্থিৰতাৰ পূৰ্বে মহাৰাষ্ট্ৰৰ শিৱসেনা নেতৃত্বাধীন চৰকাৰৰ অংশীদাৰো আছিল পাৱাৰ। দেশৰ ৰাজনীতিৰ বয়োজেষ্ঠ নেতাগৰাকীয়ে বিৰোধী ঐক্যৰ ওপৰত সদায়ে মত পোষণ কৰি আহিছে। 

তদুপৰি নীতিশ কুমাৰে চিপিআই(এম)ৰ সীতাৰাম য়েচুৰী, সমাজবাদী পাৰ্টিৰ মুৰব্বী অখিলেশ যাদৱ আৰু আইএনএলডিৰ মুৰব্বী ওম প্ৰকাশ চৌটালাকে ধৰি কেইবাজনো বিৰোধী নেতাক সাক্ষাৎ কৰাৰ সম্ভাৱনা আছে। উল্লেখ্য যে কুমাৰৰ পূৰ্বে তেলেংগানাৰ মুখ্যমন্ত্ৰীৰ কে চন্দ্ৰশেখৰ ৰাও আৰু তৃণমূল মুৰব্বী মমতা বেনাৰ্জীয়েও বিৰোধী শক্তিত একত্ৰিত কৰাৰ লক্ষ্যৰে প্ৰচেষ্টা চলাইছিল। কিন্তু কিছুদূৰ আগবঢ়াৰ পিছতে দুয়োগৰাকীৰ এই অভিযান স্তব্ধ হৈ পৰিছিল। এতিয়া নীতিশ কুমাৰৰ মিচন বিৰোধী অভিযান কিমানদূৰ সফল হ’ব সেয়া লক্ষ্যণীয় হ’ব।