ইণ্ডিয়া মিত্ৰজোঁটত মেৰুকৰণ; সদনত বিৰোধীৰ ধৰ্ণাত আংশগ্ৰহণ নকৰিলে তৃণমূল কংগ্ৰেছে

কংগ্ৰেছৰ নেতৃত্বত বিৰোধী দলসমূহে আদানীৰ গ্ৰুপৰ অধ্যক্ষ গৌতম আদানিৰ বিৰুদ্ধে আমেৰিকাৰ অভিযোগনামা সন্দৰ্ভত আলোচনাৰ দাবীত বিগত দিনকেইটাৰ দৰে স্থগিত ৰখে সংসদ৷

বিৰোধী শিবিৰৰ প্ৰায় সকলো দলে সংসদ ভৱনৰ মূল প্ৰৱেশদ্বাৰৰ সন্মুখত প্ৰতিবাদত অংশগ্ৰহণ কৰে যদিও তৃণমূলৰ কংগ্ৰেছৰ সাংসদৰ অংশ গ্ৰহণ দেখা পোৱা নগ’ল। তৃণমূলৰ সাংসদ কীৰ্তি আজাদে  কয় যে আৰু বহু গুৰুত্বপূৰ্ণ বিষয় যেনে মুদ্ৰাস্ফীতিৰ দৰে কথাও আছে। বাকী বিৰোধী সকলে তৃণমূলৰ এই স্থিতিক মেৰুকৰণ বুলি অভিহিত কৰিছে। তৃণমূল দলটোৱে শীতকালীন অধিবেশন আৰম্ভণিৰ পৰাই কংগ্ৰেছদলৰ পৰা দূৰত্ব বজাই ৰখা পৰিলক্ষিত হৈছে৷

প্ৰসংগ ক্ৰমে ২০ নৱেম্বৰত আমেৰিকাৰ আদালতত আদানিৰ বিৰুদ্ধে ‘প্ৰমাণসহ অভিযোগনামা’ দাখিল কৰা হৈছিল। এই অভিযোগ নামাত আদানি আৰু তেওঁৰ ভতিজা সাগৰকে ধৰি সাতজন লোকৰ বিৰুদ্ধে ভাৰত চৰকাৰৰ বিভিন্ন মন্ত্ৰী আৰু আমোলাক সৌৰশক্তি প্ৰকল্পত ৰেহাই দিয়াৰ বিনিময়ত উৎকোচ দিয়াৰ অভিযোগ উত্থাপন কৰা হৈছে। শীতকালীন অধিবেশনৰ আৰম্ভণিৰে পৰাই কংগ্ৰেছকে ধৰি ‘ইণ্ডিয়া’ গোটৰ সদস্যসকলে দুৰ্নীতিৰ গোচৰৰ তদন্তৰ বাবে যুটীয়া সংসদীয় সমিতিগঠনৰ দাবী উত্থাপন কৰি আহিছে। কিন্তু তৃণমূল কংগ্ৰেছ অংশ গ্ৰহণৰ পাৰ বিৰত আছে। কংগ্ৰেছৰ সভাপতি মল্লিকাৰ্জুন খাৰ্গে আহ্বান কৰা বৈঠকতো অনুপস্থিত আছিল তৃণমূলৰ সাংসদসকল। 

এই সন্দৰ্ভত তৃণমূল কংগ্ৰেছৰ ৰাজ্যসভাৰ নেতা ডেৰেক অ’ব্ৰাইনে কয়, ‘সংসদত বিজেপিৰ দুৰ্নীতি উদঙাই দিয়াৰ সামগ্ৰিক কৌশলত সকলো একত্ৰিত হৈ আছো। কিন্তু দলসমূহৰ সেই কৌশল ৰূপায়ণৰ ধৰণ বেলেগ বেলেগ হ’ব পাৰে। 

কংগ্ৰেছৰ এক সূত্ৰই জনোৱা মতে, বুধবাৰে সাংসদ গৌৰৱ গগৈয়ে তৃণমূল কংগ্ৰেছৰ লোকসভাৰ নেতা সুদীপ বেনাৰ্জীক ফোন যোগে ধৰ্নাত উপস্থিত থাকিবলৈ অনুৰোধ জনাইছিল।যদিও সেই প্ৰস্তাৱ নাকচ কৰি তৃণমূলৰ সাংসদ গৰাকীয়ে কয় যে তৃণমূলৰ কাৰ্যনিৰ্বাহক সমিতিৰ বৈঠকত সিদ্ধান্ত লোৱা হৈছিল যে তেওঁলোকে বংগৰ প্ৰতি কেন্দ্ৰীয় বঞ্চনাকে ধৰি সাধাৰণ জনতাৰ স্বাৰ্থৰ সৈতে জড়িত মুঠ ছটা বিষয়ৰ সৈতে মোকাবিলা কৰিব। সেই তালিকাত আদানি গোচৰ নাই বুলি উল্লেখ কৰে।