• Image Credit: Internet

• Jul 18, 2021 | moderator

নতুন দিল্লীঃ কৰ’নাসৃষ্ট পৰিৱেশৰ বাবে ইংলেণ্ড দলৰ প্ৰথমশাৰীৰ ভালে কেইজন খেলুৱৈক হোম আইছ’লেচনত ৰখা হৈছিল। ৫গৰাকী খেলুৱৈৰ অভিষেক তথা ‘গ’-দলেৰে এদিনীয়া শৃংখলাত পাকিস্তানৰ মুখামুখি হয় ইংলেণ্ড। টি-২০ৰ প্ৰথম খেলত পাকিস্তানে পূৰ্ণোদ্যমেৰে ইংলেণ্ডৰ বিৰুদ্ধে থিয় দিছে। ইতিমধ্যে, প্ৰথম টি-২০ত ৩১ৰানৰ ব্যৱধানত পৰাভূত হৈছে ইংলেণ্ড। কিন্তু এদিনীয়া শৃংখলাত ইংলেণ্ডৰ পৰাক্ৰমত নতজানু হৈ পৰে পাকিস্তান। বাবৰ আজম নেতৃত্বাধীন পাকিস্তানে এদিনীয়াত হোৱাইটৱাছৰ পাছত টি-২০ত জয়ৰ স্বাদ লবলৈ সক্ষম হ’লেও মন ভৰা নাই প্ৰাক্তন তাৰকা ছোৱেইব আখতাৰৰ। সামাজিক মাধ্যমযোগে প্ৰতিক্ৰি্য়া ব্যক্ত কৰি তেওঁ কয়, ‘পাকিস্তানে টি-২০ বিশ্বকাপ জয়ী হ’লেও উছাহৰ কোনো কাৰণ নাই।কাৰণ,বাবৰ আজমৰ দল সঠিক পথত নাই।’

ইউটিউব চেনেলৰ জৰিয়তে ছোৱেইব আখতাৰৰ বিস্ফোৰক মন্তব্য, ‘পাকিস্তানে যদি এইবছৰ টি-২০ বিশ্বকাপ জয়ী হয়, তেতিয়াও মই হতবাক নহওঁ। পাকিস্তান দল সঠিক পথে আগবাঢ়ি্ছে বুলি মোৰ মনে ধৰা নাই। বাবৰ আজমে বিশ্বকাপ জয় হ’লেও মই কম, সিহঁত সঠিক পথত নাই। কাৰণ, টি-২০ আমাৰ লক্ষ্য নহয় বা হোৱা উচিত নহয়। এদিনীয়াত পাকিস্তানৰ দুৰ্বলতা দুৰ্ভাগ্যজনক।’
লগতে তেওঁ সদৰী কৰে যে, ‘টি-২০ত পাকিস্তান দুৰ্দান্ত। পাকিস্তানৰ তুলনাত কোনো ভাল নহয় টি-২০ত, ভাৰত বা আফগানিস্তান কোনেও নহয়। কিন্তু এদিনীয়াত একাধিক সমস্যাই দেখা দিছে। পাকিস্তানে ৫০ অ’ভাৰ খেলিব নোৱাৰে।’
উল্লেখ্য যে, চলিত বৰ্ষৰ শেষৰফালে আৰম্ভ হ’বলৈ গৈ আছে টি-২০ বিশ্বকাপ। ভাৰত-পাকিস্তানৰ মহাসমৰৰ বাবে আঙুলিৰ মূৰত দিন গণিছে ক্ৰীড়া অনুৰাগীয়ে। বিশ্বকাপৰ প্ৰাকক্ষণত প্ৰাক্তন তাৰকাগৰাকীৰ এই বিস্ফোৰক মন্তব্যত পাকিস্তান ক্ৰিকেট দলৰ মনোবল বাঢিব নে টুটিব সেয়া লক্ষ্যণীয় হ’ব।