নাহৰকটীয়াঃ ‘সদৌ অসম ছাত্ৰ সন্থা’ৰ সাধাৰণ সম্পাদক শংকৰজ্যোতি বৰুৱাসহ এটা সজাতি দল শুকুৰবাৰে সন্ধিয়া নামৰূপ সাৰ কাৰখানাত উপস্থিত হৈ উদ্যোগটো পৰ্যবেক্ষণ কৰে৷ ৬০ৰ দশকৰ পৰা ৰাসায়নিক সাৰ যোগান ধৰি দেশৰ অৰ্থনীতিৰ ভেটি শক্তিশালী কৰি অহা এই উদ্যোগটোৰ বৰ্তমানৰ অৱস্থা একেবাৰে ৰুগ্ন৷ উদ্যোগটোৰ দ্বিতীয় গোটটোৰ ম্যাদ উকলি যোৱা যন্ত্ৰ-পাতিসমূহ বৰ্তমান কেইবাটাও দুৰ্ঘটনাৱশতঃ কাৰণত বন্ধ হৈ আছে। একেদৰে উদ্যোগটোৰ তৃতীয় গোটো মেৰামতিৰ বাবে বন্ধ হৈ বৰ্তমান উৎপাদন শূন্য হৈ আছে৷ উদ্যোগটো পৰিদৰ্শন কৰি ছাত্ৰ নেতাজনে কয় যে কেৱল ৰাজনৈতিক স্বাৰ্থ সিদ্ধিৰ বাবেহে নামৰূপ সাৰ কাৰখানাৰ বিষয়টো ৰাজনৈতিক নেতাসকলে ব্যৱহাৰ কৰি আহিছে৷
আজিৰেপৰা ১৫ বছৰৰ পূৰ্বে ২৬জুনত সেই সময়ৰ তদানীন্তন কেন্দ্ৰীয় সাৰ মন্ত্ৰী ৰামবিলাস পাচোৱানে নামৰূপত উপস্থিত হৈ সাৰ কাৰখানাৰ চতুৰ্থ গোট নিৰ্মাণ কৰাৰ কথা ঘোষণা কৰিছিল যদিও আজি পৰ্যন্ত সেয়া কামে-কাজে হৈ নুঠিল৷ কৃষি প্ৰধান ৰাজ্য অসমত অৰ্থনীতিৰ মেৰুদণ্ডস্বৰূপ এই সাৰ উদ্যোগটো কোনো কাৰণত যদি কাগজ কলৰ দৰে বন্ধ হ’ব লগা হয় তেন্তে সমগ্ৰ ৰাজ্যৰ কৃষি অৰ্থনীতি ভাঙি পৰিব বুলি ছাত্ৰ নেতাজনে কয়৷
ইয়াৰ উপৰি ২০০৬ চনৰ ২৬ জুনত ঘোষণা কৰা নামৰূপ সাৰ কাৰখানা বৰ্তমান প্ৰহসনলৈ ৰূপান্তৰ হোৱাত আজিৰেপৰা আছুৱে ক’লা দিৱস হিচাপে প্ৰতিবাদী কাৰ্যসূচী ৰূপায়ণ কৰিব৷
Leave A Comment