আজিৰে পৰা আৰম্ভ অসম গ্ৰন্থমেলা, যোৰহাট জিলা ক্ৰীড়া সংস্থাৰ খেলপথাৰত বাছকবনীয়া গ্ৰন্থ সম্ভাৰেৰে সাজু বিপণী

এই সভাত সন্মানীয় অতিথিৰ আসন শুৱনি কৰিলে অসম প্ৰকাশন পৰিষদৰ উপাধ্যক্ষ, বিশিষ্ট অভিধান প্ৰণেতা সুমন্ত চলিহাই ৷ বিশেষ অতিথিৰূপে অংশগ্ৰহণ কৰিলে ওড়িষাৰ বিশিষ্ট সাহিত্যিক সুভাষ চন্দ্ৰ শতপথী, সাহিত্য অকাদেমি বঁটা প্ৰাপক বিশিষ্ট সাহিত্যিক, সাংবাদিক অনুৰাধা শৰ্মা পূজাৰী, কাজিৰঙা লোকসভা সমষ্টিৰ সাংসদ কামাখ্যা প্ৰসাদ তাছা আৰু বিশিষ্ট সাহিত্যিক ড° অদিতি বেজবৰুৱাই ৷ 

সভাখনত আমন্ত্ৰিত অতিথিৰূপে অংশগ্ৰহণ কৰিব যোৰহাট জিলা আয়ুক্ত জয় শিৱানীয়ে ৷ গ্ৰন্থমেলাৰ আটাইকেইটা দিনতে ভাষা-সাহিত্য-সংস্কৃতি-ইতিহাস আদি ভিন্ন বিষয়ক সামৰি আলোচনা সত্ৰ আয়োজনৰ দিহা কৰা হৈছে ৷ অনুষ্ঠিত হ’ব যুৱ লেখক সন্মিলন, লেখক-পাঠকৰ সমাৰোহ, কবি সন্মিলন গল্প আলাপ আদি ভিন্নসুৰী আকৰ্ষণীয় অনুষ্ঠান ৷ তদুপৰি প্ৰতি সন্ধিয়া ৫ বজাৰ পৰা বিদ্যালয়-মহাবিদ্যালয় সমূহৰ মাজত অনুষ্ঠিত কৰা হ’ব সাংস্কৃতিক প্ৰতিযোগিতা ৷ অহা ২৪ নৱেম্বৰত সামৰণী পৰিব অসম গ্ৰন্থমেলা, যোৰহাটৰ ৷ সামৰণী সভাত মুখ্য অতিথিৰূপে অংশগ্ৰহণ কৰিব শিক্ষামন্ত্ৰী তথা অসম প্ৰকাশন পৰিষদৰ অধ্যক্ষ ডাঃ ৰণোজ পেগুৱে ৷ কৰ্ণাটকৰ বিশিষ্ট কবি পি. মোহনে এই সভাত সন্মানীয় অতিথিৰূপে আৰু যোৰহাট বিধান সভা সমষ্টিৰ বিধায়ক হিতেন্দ্ৰনাথ গোস্বামীয়ে বিশিষ্ট অতিথিৰূপে অংশগ্ৰহণ কৰিব ৷ 

উল্লেখ্য যে অসম গ্ৰন্থমেলা, যোৰহাটত ৰাজ্যখনৰ আগশাৰীৰ বিভিন্ন প্ৰকাশন প্ৰতিষ্ঠানৰ লগতে ৰাজ্যৰ বাহিৰ প্ৰকাশন প্ৰতিষ্ঠানেও যোগদান কৰিব ৷ ইতিমধ্যে বিপণীৰ কাম সম্পূৰ্ণ হৈ উঠিছে ৷ আজিৰ পৰা বিপণীসমূহত উপলব্ধ হ’ল বাছকবনীয়া গ্ৰন্থ সম্ভাৰ ৷