মহাপুৰুষ শ্ৰীমন্ত শংকৰদেৱৰ মহাজীৱনৰ আধাৰত ৰচিত গ্ৰন্থৰ অসমীয়া ভাঙনি; সৰ্বগুণাকৰ অসম গ্ৰন্থমেলাত উন্মোচন!

আউনীআটী বিশ্ববিদ্যালয়ৰো আচাৰ্য ড° দেৱগোস্বামীয়ে ভাষণত কয় যে আজিৰ এই দিনটো পবিত্ৰ দিন বুলি অনুভৱ কৰিছোঁ৷ গুৰুজনা শ্ৰীমন্তশঙ্কৰদেৱৰ মহাজীৱনক কেন্দ্ৰ কৰি ৰচনা কৰা ‘সৰ্বগুণাকৰ’ গ্ৰন্থখন ইয়াত উন্মোচন কৰা হৈছে৷ এয়া সঁচাকৈয়ে বিৰল মূহুৰ্ত বুলি বিবেচনা কৰিছোঁ৷ মহাপুৰুষ শ্ৰীমন্তশঙ্কৰদেৱৰ জীৱন এখন মহাসমূদ্ৰৰ দৰে৷ সেই মহাসমুদ্ৰক এখন গ্ৰন্থত সামৰি লোৱাটো অতিশয় কষ্টসাধ্যকৰ কাম৷ এই কাম কৰি অসমীয়া জাতিলৈ অতুলনীয় বৰঙনি আগবঢ়ালে অৰূপ কুমাৰ দত্ত আৰু বন্দিতা ফুকনে৷ তেওঁ লগতে কয় যে শ্ৰীমন্তশঙ্কৰদেৱৰ গভীৰ আত্মদৰ্শন অসমীয়া জাতিৰো দৰ্শন৷ এনে এগৰাকী সন্ত, মহাপুৰুষ পৃথিৱীতে নাই যিয়ে আধ্যাত্মিকতা, কলা, শিল্প, নাটক, চিত্ৰ, ক্ৰীড়া , অৰ্থনীতি প্ৰতিক্ষেত্ৰৰে বিশেষজ্ঞ৷ মহাপুৰুষ জনাই মূলতঃ এইসকলো কাম সাধাৰণ মানুহৰ বাব কৰিছিল৷ তেওঁৰ দৰ্শন হৈছে “কুকুৰ শৃগাল গৰ্দভৰো আত্মাৰাম” অৰ্থাৎ সকলো জীৱন সমান৷ এই দৰ্শনৰ আধাৰতে মহাপুৰুষ জনাই মানুহৰ বাবে সৰ্বোত্তম কাম কৰি নিজকে সৰ্বগুণাকৰৰ পৰ্যায়লৈ উত্তৰিত কৰিছিল৷ 

কাহিনী-কথন শৈলীৰে ৰচনা কৰা এই গ্ৰন্থখনে গুৰুজনাক জানিবলৈ, বুজিবলৈ আৰু তেওঁৰ দৰ্শনক সকলোৱে আকোঁৱালি ল’ব পৰাকৈ নতুন দুৱাৰ মুকলি কৰিব৷ ইায়াত বিশিষ্ট অতিথিৰ আসন অলংকৃত কৰি সাহিত্য অকাদেমি বঁটা প্ৰাপক কথা-শিল্পী অনুৰাধা শৰ্মা পূজাৰীয়ে কয় যে পৰম্পৰাগতভাৱে মহাপুৰুষ শ্ৰীমন্তশঙ্কৰদেৱৰ বিষয়ে অসমৰ সকলোৱে বহু কথা জানে৷ কিন্তু গুৰুজনাক এগৰাকী সূত্ৰধাৰৰ দৰে নতুকৈ চোৱাৰ কৌশলে এই গ্ৰন্থখনক বিশিষ্ট কৰিছে৷ নাটকৰ সূত্ৰধাৰৰ সূচনাৰ কথা ওলালে সকলোৱে বাৰ্টল্ট্ ব্ৰেইখ্‌টৰ কথা কয়৷ কিন্তু ব্ৰেইখ্‌টৰ বহু শতিকা পূৰ্বে শ্ৰীমন্তশঙ্কৰদেৱে সূত্ৰধাৰক উলিয়াই আনিছিল৷ এয়াই শংকৰদেৱৰ সৰ্বোত্তম প্ৰতিভা৷ তেওঁ দৰাচলতে সমাজখনৰ ভাস্কৰ্যবিদ৷ এই গ্ৰন্থখনৰ জৰিয়তে আধুনিক শংকৰদেৱক আৱিষ্কাৰ কৰিব পাৰিব নতুন প্ৰজন্মই৷ আচলতে তেঁৱেই আধুনিক যাৰ সৰ্বকালৰ গ্ৰহণযোগ্যতা থাকে৷

সভাখনত বিশিষ্ট অতিথি হিচাপে অংশগ্ৰহণ কৰে দৈনিক জনমভূমি কাকতৰ সম্পাদক, বিশিষ্ট সাংবাদিক সঞ্জীৱ ফুকনে৷ তেওঁ ভাষণত কয় যে আজিৰ অনুষ্ঠানটো মণিকাঞ্চন সংযোগৰ অন্য এক ৰূপ৷ কাৰণ ইয়াত ইংৰাজী ভাষাত ৰচনা কৰা গ্ৰন্থখনৰ অসমীয়া অনুবাদ প্ৰকাশ হৈছে৷ বিশ্বভাষা আৰু অসমীয়া ভাষাত মহাপুৰুষ শ্ৰীমন্তশংকৰদেৱৰ মহাজীৱনৰ কাহিনী কোৱা হৈছে৷ অৰূপ কুমাৰ দত্ত আৰু বন্দিতা ফুকন দুয়োগৰাকী বশিষ্ট গ্ৰন্থকাৰৰো ‘সৰ্বগুণাকৰ’ পুথিখনৰ জৰিয়তে মণিকাঞ্চন সংযোগ ঘটিল৷ মহাপুৰুষ শংকৰদেৱে শ্বেইকছপীয়েৰৰো আগতে অসমভূমিত জন্মগ্ৰহণ কৰিছিল৷ কিন্তু আমাৰ দুৰ্ভাগ্য যে মহাপুৰুষজনাক আমি সেই পৰ্যায়লৈ নিব নোৱাৰিলোঁ৷ সাহিত্যৰথী লক্ষ্মীনাথ বেজবৰুৱাই শংকৰদেৱ চৰ্চা কৰাৰ পাছতহে গুৰুজনাক নতুনকৈ চাবলৈ আৰম্ভ কৰিছিল অসমীয়া মানুহে৷ শেহতীয়াকৈ অৰূপ কুমাৰ দত্তই ‘Saint Saviour Soul Society” গ্ৰন্থ ইংৰাজীত ৰচনা কৰি শংকৰদেৱ চৰ্চাক নতুন মাত্ৰা প্ৰদান কৰিলে ৷ বন্দিতা ফুকনেও এই গ্ৰন্থৰ অসমীয়া অনুবাদ কৰি মহৎ কাম কৰিলে৷ 

আন এগৰাকী বিশিষ্ট অতিথি, দৈনিক অসম কাকতৰ সম্পাদক, শিক্ষাবিদ ড° হিতেশ ডেকাই এইদৰে কয় যে জীৱন বৰ চমু৷ চমু সময়ৰ মাজতে আমি ইতিবাচক কাম কৰিব লাগিব৷ নৱ প্ৰজন্ম যাতে মাতৃভাষাৰ প্ৰতি আকৃষ্ট হ’ব পাৰে সেই পৰিৱেশ আমিয়ে গঢ়ি তুলিব লাগিব৷ মাতৃভাষা মাতৃদুগ্ধ সম৷ এই কথা অভিভাৱকসকলে বুজিব লাগিব৷ অৰূপ কুমাৰ দত্ত, বন্দিতা ফুকন কোন, তেওঁলোকে কি লিখিছে সেয়া আমাৰ নতুন প্ৰজন্মই জানিব লাগিব৷ নহ’লে ধ্ৰুপদী ভাষাৰ মৰ্যাদা বাতৰি কাকতৰ শিৰোনামৰ বাহিৰে আন একো নহব৷ 

গ্ৰন্থখনৰ অনুবাদক, বিশিষ্ট সাহিত্যিক বন্দিতা ফুকনে কয় যে বহু কিতাপ লিখিলোঁ৷ অনুবাদো কৰিলোঁ৷ কিন্তু এই গ্ৰন্থ অনুবাদ কৰাৰ অভিজ্ঞতা আৰু আনন্দ সুকীয়া৷ অৰূপ কুমাৰ দত্ত এগৰাকী প্ৰাজ্ঞ আৰু কৌশলী লেখক৷ তেওঁৰ ইংৰাজী ভাষাৰ প্ৰয়োগ চমকপ্ৰদ৷ মহাপুৰুষ শংকৰদেৱৰ মহাজীৱনক যি সুন্দৰ শৈলীৰে বৰ্ণনা কৰিছে সেয়া অসমীয়ালৈ ভাঙনি কৰাৰ কঠিন কাম মোৰ বাবে আনন্দদায়ক অভিজ্ঞতা হৈ ৰ’ব৷ সভাখনত পৌৰহিত্য কৰে নগালেণ্ড বিশ্ববিদ্যালয়ৰ আচাৰ্য, বিশিষ্ট সাংবাদিক ড° সমুদ্ৰগুপ্ত কাশ্যপে৷ তেওঁ ভাষণত কয় যে শ্ৰীমন্তশঙ্কৰদেৱ গুৰুজনাক কেন্দ্ৰ কৰি ইংৰাজীত আগতেও বহু কিতাপ ওলাইছে৷ তিনিশৰো অধিক গৱেষণা পত্ৰ আছে শ্ৰীমন্ত শংকৰদেৱৰ বিষয়ে৷ কিন্তু অৰূপ কুমাৰ দত্তই ৰচনা কৰা “Saint Saviuor Soul Society” গ্ৰন্থই অন্যৰূপত গুৰুজনাক জগতসভালৈ নিব ৷ বন্দিতা ফুকনে এই গ্ৰন্থৰ অসমীয়া ভাঙনিৰে অসমীয়া পাঠককো এই যাত্ৰাৰ অংশীদাৰ হোৱাৰ সুযোগ দিলে৷ “Saint Saviuor Soul Society” গ্ৰন্থৰ লেখক অৰূপ কুমাৰ দত্তৰ লগতে ৰাজ্যখনৰ ভালেসংখ্যক গৱেষক-পণ্ডিত, সাহিত্যিকে সভাখনত অংশগ্ৰহণ কৰে৷

গ্ৰন্থখন প্ৰকাশ কৰিছে ৰাজ্যখনৰ আগশাৰীৰ প্ৰকাশন গোষ্ঠী ‘অসম বুক হাইভ’এ৷ অসম গ্ৰন্থমেলা, গুৱাহাটীৰ শশী ফুকন সোঁৱৰণী প্ৰেক্ষাগৃহত উন্মোচন হোৱা গ্ৰন্থখনৰ দাম হৈছে ৩৬০ টকা৷