উৎসাহ-উদ্দীপনাৰে আৰম্ভ অসম গ্ৰন্থমেলা, যোৰহাট

এই অনুষ্ঠানত সন্মানীয় অতিথিৰ আসন শুৱনি কৰে অসম প্ৰকাশন পৰিষদৰ উপাধ্যক্ষ, বিশিষ্ট অভিধান প্ৰণেতা সুমন্ত চলিহাই ৷ তেওঁ ভাষণত কয়,“আজি ড° বাণীকান্ত কাকতীদেৱৰ জন্ম আৰু মৃত্যু দিৱস৷ আজি ভাষাবিদ ড° গোলোক চন্দ্ৰ গোস্বামীদেৱৰো জন্ম দিৱস ৷ অসমীয়া ভাষাটোক স্বকীয় ভাষা হিচাপে পৰিচয় দিয়াৰ ক্ষেত্ৰত এই দুয়োগৰাকী পণ্ডিতৰ অৱদান অপৰিসীম ৷ এইবাৰ অসমীয়া ভাষাই ধ্ৰুপদীৰ মৰ্যাদা লাভ কৰিলে৷ এয়া আমাৰ বাবে গৌৰৱ আৰু আনন্দৰ বতৰা ৷ গ্ৰন্থমেলা মানেই ভাষা-সাহিত্যৰ চৰ্চাৰ এখন নিৰ্ভৰযোগ্য থলী ৷ অসম গ্ৰন্থমেলা, যোৰহাটতো এই বিষয়ক আলোচনা সত্ৰৰ আয়োজন কৰা হৈছে ৷ আশা কৰিছোঁ এই অনুষ্ঠান সফলকাম হ’ব ৷” তেওঁ লগতে কয় যে ধ্ৰুপদীৰ স্বীকৃতি লাভে অসমীয়া ভাষাক ভৱিষ্যতৰ দিনবোৰত বিভিন্ন প্ৰকাৰে লাভান্বিত কৰিব ৷ অসমীয়া ভাষাৰ স্বতন্ত্ৰ পৰিচয় চৌদিশে প্ৰসাৰিত হ’ব ৷ সাহিত্যৰ মাজেৰে গ্ৰন্থই এই পৰিচয় কঢ়িয়াই নিব ৷ 

সভাখনত বিশেষ অতিথিৰূপে অংশগ্ৰহণ কৰে ওড়িষাৰ বিশিষ্ট সাহিত্যিক সুভাষ চন্দ্ৰ শতপথীয়ে ৷ ভাষণত তেওঁ কয়,“অসমীয়া ভাষাই ধ্ৰুপদীৰ মৰ্যাদা লাভৰ বাবে অসমবাসীক অভিনন্দন জ্ঞাপন কৰিছোঁ ৷ এয়া অসমীয়া ভাষাৰ বাবে ঐতিহাসিক প্ৰাপ্য ৷” মই বুৰঞ্জীৰ ছাত্ৰ তথা শিক্ষক হিচাপে দীৰ্ঘদিন ধৰি গ্ৰন্থমেলাৰ সৈতে জৰিত হৈ আছোঁ ৷ গ্ৰন্থমেলা হৈছে লেখক-পাঠক-প্ৰকাশকৰ সংযোগস্থলী আৰু বৌদ্ধিক অনুশীলনৰ থলী ৷ গ্ৰন্থ উদ্যোগৰ সৈতে জৰিত থকা সকলে অনুবাদৰ ওপৰত বিশেষ গুৰুত্ব প্ৰদান কৰা উচিত ৷ অনুবাদে ভাষা-সাহিত্যৰ সম্প্ৰসাৰণ ঘটায় ৷ অসমীয়া ভাষা-সাহিত্য, কলা-সংস্কৃতিৰ এক বিশ্বজনীন আৱেদন আছে৷ এইসমূহ জগতমুখী কৰাৰ পথ গ্ৰন্থৰ জৰিয়তেই নিৰ্ণয় কৰা সম্ভৱ ৷ প্ৰসংগক্ৰমে অসম চৰকাৰে ওড়িষাত থকা সাহিত্যৰথী লক্ষ্মীনাথ বেজবৰুৱাৰ গৃহ সংৰক্ষণৰ ব্যৱস্থা কৰা কাৰ্যক উচ্চ প্ৰশংসা কৰে ৷

আন এগৰাকী বিশেষ অতিথি, সাহিত্য অকাদেমি বঁটা প্ৰাপক বিশিষ্ট সাহিত্যিক-সাংবাদিক অনুৰাধা শৰ্মা পূজাৰীয়ে কয় যে অসমীয়া ভাষাক লৈ আমি এতিয়া আৰু শংকিত হৈ থকাৰ প্ৰয়োজন নাই ৷ধ্ৰুপদী স্বীকৃতিয়ে অসমীয়া ভাষাৰ শিপা যে মজবুত সেই কথাকে প্ৰমাণ কৰিলে ৷ লগতে তেওঁ কয়—“গ্ৰন্থৰ উত্তৰাধিকাৰী কোন হ’ব এয়া এতিয়াৰ ডাঙৰ প্ৰশ্ন ৷ আমাৰ বুকচেল্‌ফৰ কিতাপবোৰৰ দায়িত্ব ভৱিষ্যত প্ৰজন্মই ল’বনে ? ঘৰে-বাহিৰে ঠাই টুটি আহিছে ৷ গতিকে ভাল কিতাপ ৰাখিবলৈ ডাঙৰ পুথি ভঁৰাল, জিলা পুথি ভঁৰাল আদিত সেই ঠাই উলিয়াব লাগিব ৷ প্ৰযুক্তিয়ে বিভিন্ন বস্তু নোহোৱা কৰি দিলে ৷ চিঠি-পত্ৰৰ আদান-প্ৰদানৰ ঠাইত মেছেজ আহিল, গ্ৰীটিংছ কাৰ্ড হেৰাই গ’ল ৷ এয়া সঁচাকৈয়ে চিন্তাৰ বিষয় ৷” তেওঁ অন্য ভাষালৈ অসমীয়া ভাষাৰ ভাল কিতাপ অনুবাদৰ পোষকতা কৰি কয় যে পৃথিৱীত বেছিকৈ প্ৰচলিত ভাষাত অনুবাদ হ’লে ভাল, কাৰণ তেতিয়া অধিক মানুহে পঢ়াৰ সুযোগ লাভ কৰে ৷ এইক্ষেত্ৰত অনুবাদক আৰু প্ৰকাশক সকল সচেতন হ’ব লাগিব ৷ তেওঁ কয়—“ সত্যৰ সন্ধানেই সাহিত্য ৷ ইয়াত ৰাজনীতি নাই ৷ সাহিত্য প্ৰকৃতিৰ দৰেই স্বতন্ত্ৰ ৷” 

এই সভাত বিশেষ অতিথিৰ আসন অলংকৃত কৰে বিশিষ্ট সাহিত্যিক ড° অদিতি বেজবৰুৱাই ৷ তেওঁ কয় যে অসম গ্ৰন্থমেলাৰ আয়োজন যোৰহাটবাসীৰ বাবে অতি আনন্দৰ বতৰা ৷ কিতাপ আমাৰ বাবে অমূল্য সম্পদ ৷ গ্ৰন্থ হৈছে জ্ঞানৰ পথ দেখুওৱা পোহৰ ৷ গতিকে কিতাপৰ ভৱিষ্যতক লৈ আমিও দায়ৱদ্ধ হ’ব লাগিব ৷ 

সভাখনত বিশেষ অতিথিৰূপে অংশগ্ৰহণ কৰে কাজিৰঙা লোকসভা সমষ্টিৰ সাংসদ কামাখ্যা প্ৰসাদ তাছাই ৷ তেওঁ কয় “অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থাই অসম গ্ৰন্থমেলাৰ জৰিয়তে ৰাজ্যখনত কাৰ্যতঃ প্ৰজ্ঞাৰ উৎসৱ উদ্‌যাপন কৰিছে ৷ এয়া সমাজ-জীৱনৰ বাবে অতি গুৰুত্বপূৰ্ণ ৷” তেওঁ লগতে কয় যে চৰ্চা নোহোৱা হ’লে ভাষাই মৃত্যুৰ দিশে গতি কৰে ৷ আমাৰ ইয়াতো কাকত-আলোচনীৰ বিক্ৰী কমি অহা বুলি বিদ্বৎ সমাজৰ মাজত আলোচনা হৈ আহিছে ৷ দুখৰ বিষয় শিক্ষক সকলেই কিতাপ নপঢ়ে । এয়া শুভ লক্ষণ নহয় ৷ কিতাপ পঢ়াৰ আন্দোলন নতুনকৈ গঢ়ি তোলাৰ প্ৰয়োজন আহি পৰিছে ৷ আশা কৰোঁ গ্ৰন্থমেলাই এই আন্দোলনৰ বাট মুকলি কৰিব ৷” 

সদৌ অসম পুথি প্ৰকাশক আৰু বিক্ৰেতা সংস্থাৰ উপ সভাপতি বাহাৰুল ইছলাম চৈধুৰীয়েও সভাখনত অংশগ্ৰহণ কৰে ৷অসম প্ৰকাশন পৰিষদৰ সচিব প্ৰমোদ কলিতাৰ আদৰণী ভাষণেৰে আৰম্ভ হয় উদ্বোধনী সভাখন ৷ তেওঁ ভাষণ প্ৰসংগত কয়—“অসম গ্ৰন্থমেলাৰ জৰিয়তে গুৱাহাটী মহানগৰীৰ পৰা  বিভিন্ন প্ৰান্তলৈ গ্ৰন্থমেলা সম্প্ৰসাৰণ কৰাৰ প্ৰচেষ্টা অব্যাহত আছে ৷ অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থাৰ এই গ্ৰন্থ উৎসৱলৈ লেখক-পাঠক-প্ৰকাশকৰ ইতিবাচক সঁহাৰিয়ে আমাৰ পাথেয় ৷ অসমৰ বাহিৰতো, বাংগালুৰুত আমি গ্ৰন্থমেলা অনুষ্ঠিত কৰিব পাৰিছোঁ ৷ গ্ৰন্থৰ প্ৰতি মানুহৰ সমাদৰ বৃদ্ধি , ভাষা-সাহিত্যৰ চৰ্চা তথা বৌদ্ধিক কছৰৎ অধিক উন্নত কৰাৰ লক্ষ্য আৰু উদ্দেশ্যৰে মুখ্যমন্ত্ৰী ড° হিমন্ত বিশ্ব শৰ্মাৰ নিৰ্দেশনা-পৰামৰ্শ আৰু শিক্ষামন্ত্ৰী তথা প্ৰকাশন পৰিষদৰ অধ্যক্ষ ডাঃ ৰণোজ পেগুৰ আগ্ৰহ-পৰিকল্পনাৰ বাবেই অসম গ্ৰন্থমেলা অনুষ্ঠিত কৰাটো সম্ভৱ হৈ উঠিছে ৷ 

সমান্তৰালভাৱে গ্ৰন্থমেলাসমূহত অনুষ্ঠিত হৈ আহিছে সাহিত্য-সংস্কৃতি-ইতিহাস আদিৰ বিষয়ে ভিন্ন ভিন্ন আলোচনা সত্ৰ আৰু বিদ্যালয়-মহাবিদ্যালয়সমূহৰ মাজত সাংস্কৃতিক প্ৰতিযোগিতা ৷ প্ৰতিটো অনুষ্ঠানতে ৰাইজৰ সহযোগিতা আন্তৰিকতাৰে কামনা কৰিছোঁ ৷ আশা প্ৰকাশ কৰিছোঁ সকলোৰে সহযোগিতাৰে অসম গ্ৰন্থমেলা, যোৰহাট সাফল্যমণ্ডিত হ’ব ৷” উদ্বোধনী সভাৰ প্ৰাৰম্ভতে এটি সৰস্বতী বন্দনা পৰিৱেশন কৰি জোনাকী সংঘ বিদ্যালয়ৰ শিক্ষাৰ্থীসকল ভূয়সী প্ৰশংসিত হয় ৷ ইয়াৰ পাছতে সাংস্কৃতিক প্ৰতিযোগিতাৰ মনপৰশা কাৰ্যূচীয়ে মুখৰিত কৰি তোলে গ্ৰন্থমেলা প্ৰাংগণ ৷