আঁতৰা নাই বান পৰিস্থিতিৰ জটিলতা: এতিয়াও আশ্ৰয় শিবিৰত ২ লক্ষাধিক লোক

ডিজিটেল ডেস্ক: ৰাজ্যৰ বান পৰিস্থিতিৰ জটিলতা এতিয়াও কমা নাই৷ চৌবিশ ঘণ্টাত পুনৰ ১০গৰাকী লোকৰ মৃত্যুৰ পাছতো আঁতৰা নাই বিপদাশংকা৷ শনিবাৰে অসমত ঠাইবিশেষে বান পৰিস্থিতি ভয়ংকৰ হৈ আছিল আৰু মৃত্যুৰ সংখ্যা ১১৮লৈ বৃদ্ধি পাইছিল আৰু কাছাৰ জিলাৰ শিলচৰ চহৰ একেৰাহে ষষ্ঠ দিনৰ বাবে জলমগ্ন হৈ আছিল৷  

বিগত চৌবিশ ঘণ্টাত বৰপেটা, ধুবুৰী, কৰিমগঞ্জ আৰু ওদালগুৰি জিলাৰ পৰা দুজনকৈ আৰু কাছাৰ আৰু মৰিগাঁৱৰ পৰা এজনকৈ লোকৰ মৃত্যু হৈছে বান পানী আৰু ভূমিস্খলনৰ ফলত। অসম ৰাজ্যিক দুৰ্যোগ ব্যৱস্থাপনা প্ৰাধিকৰণে (এএছডিএমএ) জাৰি কৰা বুলেটিনত কোৱা হৈছে যে বানৰ ফলত ক্ষতিগ্ৰস্ত মুঠ জনসংখ্যা ২৮খন জিলাত ৩৩.০৩ লাখলৈ হ্ৰাস পাইছে, যিটো আগৰ দিনৰ ৩০খন জিলাত ৪৫.৩৪ লাখ আছিল। কিছুমান জিলাত পৰিস্থিতি সামান্য উন্নত হৈছে, কিয়নো নদীৰ জলস্তৰ হ্ৰাস হোৱাৰ প্ৰৱণতা দেখুৱাইছে, যদিও ধুবুৰীত ব্ৰহ্মপুত্ৰ, আনহাতে নগাঁৱৰ কপিলী নদী বিপদসীমাৰ ওপৰেৰে বৈ আছে বুলি অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ বিষয়াসকলে সদৰী কৰে৷ 

কাছাৰৰ উপায়ুক্ত কীৰ্থি জল্লীয়ে কয়, কাছাৰ জিলা প্ৰশাসনে লোকসকলক সুৰক্ষিত স্থানলৈ স্থানান্তৰ কৰাৰ বাবে শিলচৰত উদ্ধাৰ অভিযানত নিয়োজিত হৈ আছে৷ অসুস্থ লোকসকলক চিকিৎসালয়লৈ স্থানান্তৰ কৰাত অগ্ৰাধিকাৰ দিয়া হৈছে৷ ভাৰতীয় বায়ু সেনাৰ হেলিকপ্টাৰৰ দ্বাৰা চহৰখনত খাদ্য, খোৱা পানীৰ বটল আৰু অন্যান্য অত্যাৱশ্যকীয় সামগ্ৰীৰ পেকেটবোৰ এয়াৰড্ৰপ কৰা হৈছে, আৰু পৰিস্থিতি উন্নত নোহোৱালৈকে এই প্ৰক্ৰিয়া অব্যাহত থাকিব বুলি তেওঁ সদৰী কৰে৷ 

শিলচৰত বানৰ প্লাৱন মেপিং কৰাৰ লগতে ক্ষতিগ্ৰস্ত লোকসকলক সাহায্য সামগ্ৰী প্ৰদান কৰাৰ বাবে দুটা ড্ৰোনৰ ব্যৱস্থা কৰা হৈছে। ইটানগৰ আৰু ভুবনেশ্বৰৰ ২০৭গৰাকী কৰ্মচাৰীৰ সৈতে এনডিআৰএফৰ আঠটা দল, লগতে ১২০গৰাকী কৰ্মচাৰীৰ সৈতে এটা সেনা গোট আৰু ডিমাপুৰৰ নখন নাও শিলচৰত ৰখা হৈছে। শিলচৰত খাদ্য, বিশুদ্ধ খোৱা পানী আৰু ঔষধৰ তীব্ৰ অভাৱত প্ৰায় তিনি লাখ লোক সংকটত আছে বুলি বিষয়াসকলে সদৰী কৰে৷ 

এএছডিএমএ বুলেটিন অনুসৰি ৰাজ্যখনত বানত আটাইতকৈ  ক্ষতিগ্ৰস্ত জিলা হৈছে বৰপেটা আৰু জিলাখনত ক্ষতিগ্ৰস্ত হৈছে ৮,৭৬,৮৪২গৰাকী লোক৷ তাৰ পাছত আছে নগাঁও (৫,০৮,৪৭৫), কামৰূপ (৪,০১,৫১২), নগাঁও (৫,০৩,৩০৮) আৰু ধুবুৰী (৩,৯৯,৯৪৫)।

এই জলপ্লাৱনে ৯৩টা ৰাজহ চক্ৰ আৰু ৩,৫১০খন গাঁৱক প্ৰভাৱিত কৰিছে, আনহাতে ২,৬৫,৭৮৮গৰাকী লোকে ৭১৭টা শিবিৰত আশ্ৰয় গ্ৰহণ কৰি আছে৷ শিবিৰত আশ্ৰয় নোলোৱা বানপীড়িত লোকসকলৰ মাজত ৪০৯টা ডেলিভাৰী পইণ্টৰ পৰা সাহায্য সামগ্ৰী বিতৰণ কৰা হৈছিল৷

একেদৰে, বাক্সা, বিশ্বনাথ, বঙাইগাঁও, চিৰাং, ডিব্ৰুগড়, দৰং, গোলাঘাট, হাইলাকান্দি আৰু কামৰূপকে ধৰি কেইবাটাও অঞ্চলত ভূমিস্খলন হোৱা বুলি জানিব পৰা গৈছে৷