ডিজিটেল ডেস্কঃ অসমৰ অন্যতম আন্তঃগাঁথনিমূলক প্ৰকল্প হিচাপে বিবেচিত গুৱাহাটী ৰিং ৰোড অহা চাৰি বছৰত বাস্তৱত পৰিণত হ’ব। চলিত মাহৰ শেষৰ ফালে নিবিদা সম্পূৰ্ণ হয় প্ৰকল্পটোৰ৷ প্ৰধানমন্ত্ৰী নৰেন্দ্ৰ মোডীৰ ৰাজ্য ভ্ৰমণৰ পূৰ্বে বৃহস্পতিবাৰে এই প্ৰকল্পটোৰ ভাৰতৰ ৰাষ্ট্ৰীয় ঘাইপথ প্ৰাধিকৰণক নিবিদা প্ৰদান কৰে।
ৰিং ৰোডৰ জৰিয়তে মহানগৰীৰ যান-জঁট হ্ৰাস কৰাৰ লগতে গুৱাহাটী অভিমুখে নযোৱা যাতায়তৰ বাবেও বাইপাছৰ ব্যৱস্থা কৰিব। ৰিং ৰোডে পশ্চিম বংগ বা বিহাৰ ফালৰ পৰা শিলচৰ, নাগালেণ্ড, মিজোৰাম, আৰু ত্ৰিপুৰালৈ অহা যাতায়তৰ বাবে বাইপাছৰ সুবিধা প্ৰদান কৰিব সেয়ে গুৱাহাটীত প্ৰৱেশ নকৰাকৈয়ে এই ৰাজ্য সমূহলৈ যাতায়ত কৰিব পাৰিব। ইয়াৰ ফলত গুৱাহাটী বাইপাছ আৰু যোৰাবাটলৈকে ঘাইপথ অংশত যানজঁট যথেষ্ট হ্ৰাস পাব।
উল্লেখ্য যে ৰিং ৰোডে গুৱাহাটীৰ আশে-পাশে থকা প্ৰধান ৰাষ্ট্ৰীয় ঘাইপথসমূহত যানজঁট লাঘৱ কৰিব, যাৰ ফলত শিলিগুৰি, শিলচৰ, যোৰহাট, তেজপুৰ, যোগীঘোপা, আৰু বৰপেটাকে ধৰি ডাঙৰ ডাঙৰ চহৰ আৰু নগৰসমূহক সংযোগ কৰা হ’ব।
২০২৪ চনৰ আগষ্ট মাহত কেন্দ্ৰীয় মন্ত্ৰীসভাই বিল্ড অপাৰেট টোল (বি অ’ টি) মোডত নিৰ্মাণ কৰিবলৈ অনুমোদন জনোৱা গুৱাহাটী ৰিং ৰোডে ২৭ নং ৰাষ্ট্ৰীয় ঘাইপথে ইষ্ট ৱেষ্ট কৰিড’ৰ যিটো উত্তৰ-পূব ভাৰতৰ দুৱাৰমুখত চলি থকা দীৰ্ঘ দূৰত্বৰ যাতায়তৰ সৈতে নিৰৱচ্ছিন্ন সংযোগ প্ৰদান কৰিব। কাজিৰঙা এলিভেটেড কৰিড’ৰ আৰু গহপুৰ আৰু নুমলীগড়ৰ মাজত পানীৰ তলৰ সুৰংগৰ লগতে আন এক গুৰুত্বপূৰ্ণ আন্তঃগাঁথনি প্ৰকল্প এই ৰিং ৰোড।
ৰিং ৰোড নিৰ্মাণৰ সময়সীমা নিযুক্তিৰ তাৰিখৰ পৰা ১৪৬০ দিন অৰ্থাৎ চাৰি বছৰ। প্ৰায় ৫৮০০ কোটি টকা ব্যয় হ’বলগীয়া ১২১ কিলোমিটাৰ দৈৰ্ঘ্যৰ এই প্ৰকল্পত ভূমি ব্যয়ৰ আধা অংশ ৰাজ্য চৰকাৰে বহন কৰিব।
ৰিং ৰোডটো তিনিটা ভাগত বিভক্ত বাইহাটা আৰু সোণাপুৰৰ মাজত ৫৬ কিলোমিটাৰ, যিটো হ’ব গ্ৰীণফিল্ড ষ্ট্ৰেচ আৰু চাৰিলেনযুক্ত প্ৰৱেশ নিয়ন্ত্ৰিত উত্তৰ গুৱাহাটী বাইপাছ। ইয়াৰ উপৰিও নাৰেংগীৰ সমীপৱৰ্তী কুৰুৱা আৰু টিনটুকুৰাৰ মাজত ব্ৰহ্মপুত্ৰ নদীৰ ওপৰত ছয় লেনযুক্ত ৩ কিলোমিটাৰ দৈৰ্ঘ্যৰ দলং নিৰ্মাণ কৰা হ’ব।
২৭ নং ৰাষ্ট্ৰীয় ঘাইপথত ৬৬ কিলোমিটাৰ দৈৰ্ঘ্যৰ ছেকচন বাইপাছ ব্ৰাউনফিল্ড হ’ব। এই প্ৰকল্পৰ অংশ হিচাপে জালুকবাৰীৰ পৰা যোৰাবাটৰ মাজৰ ২৬ কিলোমিটাৰ দৈৰ্ঘ্যৰ এটা পথ, বশিষ্ঠ পাৰ হৈ ছয় লেনযুক্ত পথলৈ ৰূপান্তৰিত কৰা হ’ব।
Leave A Comment