স্বাস্থ্য বিভাগৰ পয়ালগা ছবি ; ই-ৰিক্সাতে সন্তান প্ৰসৱ গৰ্ভৱতী মহিলাৰ

জানিব পৰা মতে,ভাতনাপাইতি গাওঁৰ মৰ্জিনা বেগমক সন্তান প্ৰসৱৰ বাবে চিকিৎসালয়লৈ নিয়া বাট পথৰ দূৰৱস্থাৰ বাবে গাওখনলৈ নাযায় গাড়ী মটৰ বা এম্বুলেন্স৷ সেয়ে উপায়ন্তৰহৈ ভুক্তভোগী পৰিয়ালে ই-ৰিক্সা এখনকে ভাড়া কৰি আলোপতি ক্ষুদ্ৰ প্ৰাথমিক চিকিৎসালয়ত লৈ যোৱাত মাজবাটতে ই-ৰিক্সাত গৰ্ভৱতী মহিলা গৰাকীয়ে প্ৰসৱ কৰে এটি পুত্ৰ সন্তান৷

পিছত শিশুসহ অসুস্থ মাতৃক আলোপতি ক্ষুদ্ৰ প্ৰাথমিক চিকিৎসালয়ত ভৰ্তি কৰি প্ৰাথমিক চিকিৎসা প্ৰদানৰ অন্তত মাতৃ আৰু দেৱ শিশুটি সম্পূৰ্ণ সুস্থ বুলি পৰিয়ালৰ লোকে সদৰী কৰে৷ উল্লেখ্য যে,চেঙা সমষ্টিৰ বৃহত্তৰ চৰাঞ্চলত চিকিৎসালয় সমূহত পৰ্যাপ্ত সুবিধা উপলব্ধ নথকাৰ লগতে বাট পথৰ দুৰৱস্থা আৰু এম্বুলেন্স সেৱাৰ অভাৱত বিভিন্ন সময়ত ৰোগী বা গৰ্ভৱতী মহিলাক ঘোড়া গাড়ী,সাঙী বা ই-ৰিক্সাৰে অনা নিয়া কৰিবলগীয়া হোৱাত অনুৰূপ ঘটনা পূৰ্বতেও একাধিকবাৰ সংঘটিত হৈছিল৷

সেয়ে চৰাঞ্চলৰ বাট পথ সমূহৰ উন্নতি,স্বাস্থ্য কেন্দ্ৰ সমূহত পৰ্যাপ্ত সুবিধা উপলব্ধ কৰাৰ লগতে আলোপতি ক্ষুদ্ৰ প্ৰাথমিক স্বাস্থ্য কেন্দ্ৰত অতিৰিক্ত এম্বুলেন্সৰ যোগান ধৰিবলৈ বিভাগীয় কতৃপক্ষক দাবী জনাইছে স্থানীয় ৰাইজে৷