ভাৰত-পাকিস্তানৰ মেচৰ বহু ঐতিহাসিক ঘটনাৰ সাক্ষী! প্ৰতিখন মেচ উপভোগ কৰিবলৈ বিশ্বৰ ইমূৰৰ পৰা সিমূৰলৈ ভ্ৰমিছে এইহাল দম্পত্তি

৬৮ বছৰীয়া জৈন জিৱানজী আৰু তেওঁৰ পত্নী ফাৰ্জানা জিৱানজী বৰ্তমান ছান ফ্ৰান্সিস্কোত থাকে। তেওঁলোকৰ মুঠ ১৪টা কোম্পানী আছে। যোৱা ২০ বছৰ ধৰি তেওঁ কেৱল ভাৰত-পাকৰ মেচ চাবলৈকে বিশ্ব ভ্ৰমণ কৰি আহিছে। 

সাংবাদিকক জৈনে কয়- ''শোৱেইব আখতাৰৰ বলত শচীনৰ হুক শ্বট মৰাৰ ছবিখন এতিয়াও মোৰ হৃদয়ত সতেজ হৈ আছে। টেষ্ট, এদিনীয়া, টি-২০ একো এৰা নাই। মই মোৰ ল’ৰাটোক ব্যৱসায়টো চম্ভালিবলৈ কৈছো৷ এতিয়া মোৰ জীৱনটো উপভোগ কৰাৰ সময়।’’

২০১৭ চনৰ চেম্পিয়নছ ট্ৰফীৰ ফাইনেলত ভাৰতক পৰাস্ত কৰি পাকিস্তানে ট্ৰফী তুলি লোৱা দেখি জৈনে আটাইতকৈ বেছি সুখী হৈছিল। তেওঁ ক'লে, "মোৰ পত্নী আৰু মই দুয়ো কান্দিছিলোঁ। সেই প্ৰতিযোগিতাত ভাৰত আছিল আটাইতকৈ শক্তিশালী দল।’’

মেলবৰ্ণত অনুষ্ঠিত হোৱা টি-২০ বিশ্বকাপত বিৰাট কোহলীৰ ইনিংছটো সৰ্বোচ্চ হিচাপে ৰাখিছে জৈনে। ষ্টেডিয়ামৰ গেলেৰীত তেওঁৰ আসনৰ কাষতে হেৰিছ ৰৌফৰ বলত বিৰাটৰ বিশাল ছয়টো আহি পৰিছিলহি। পাকিস্তানে পুনৰবাৰ ভাৰতক পৰাস্ত কৰিব বিচাৰিছিল টি-২০ বিশ্বকাপত। সেই আশাত কোহলীয়ে পানী ঢালি দিলে। তেওঁ ৫৩টা বলত ৮২ ৰান সংগ্ৰহ কৰি ভাৰতক অবিশ্বাস্য জয় প্ৰদান কৰে।

সেই মুহূৰ্তৰ এজন সাক্ষী হৈছে জৈন। তেওঁৰ ভাষাত "এনে টাইট মেচ মই খুব কমেইহে দেখিছো। কোনে শেষ হাঁহি মাৰিব সেয়া স্পষ্ট হোৱা নাছিল। ১৮ অভাৰলৈকে আমি নিশ্চিত আছিলো যে আমি জয়ী হৈছো। ইয়াৰ পিছত ক্ৰমান্বয়ে মেচখন বন্ধ হৈ গ’ল। ৰাউফে অভাৰত দুটা বিশাল ছয় দিয়াৰ পিছত মোৰ পত্নীয়ে চকুলো টুকিব নোৱাৰিলে। কিন্তু মই মুগ্ধ হৈ পৰিলোঁ। চেঞ্চুৰিয়ানত শচীনে অকলে মেচখন জিকোৱা দেখিছিলো। মেলবৰ্ণত তেওঁৰ উত্তৰাধিকাৰীক দেখিলোঁ। একেটা গঠনৰ দুটা বেলেগ বেলেগ মূৰ্তিৰ দৰে।''

এইবাৰ আহমেদাবাদত ভাৰত-পাক খেলখন চাই তেওঁ আটাইতকৈ বেছি আচৰিত হৈছিল। তেওঁৰ ভাষাত, "২০১৬ চনত মই কলকাতালৈ আহিও দেখিছিলো যে পাকিস্তানী ক্ৰিকেটাৰসকলে ভাল খেলিলে আদৰণি জনোৱা হৈছিল। আহমেদাবাদত ছিৰাজৰ বিৰুদ্ধে ইমাম-উল-হকে এটা অভাৰত তিনিটা চাৰি মাৰি দিয়াৰ পিছত এক লাখ দৰ্শক নিমাত হৈ পৰিল! সেইটোৰ ওপৰত যদিও কোনো অভিযোগ নাই।’