ডিকৌ বানপীড়িতক ক্ষতিপূৰণ নিদিয়াৰ অভিযোগত চৰকাৰক দেৱব্ৰত শইকীয়াৰ তীব্ৰ সমালোচনা

নজিৰা, ২০ আগষ্ট: ৰাজ্যৰ জ্যেষ্ঠ কংগ্ৰেছ নেতা, নজিৰাৰ প্ৰাক্তন বিধায়ক তথা বিধানসভাৰ প্ৰাক্তন বিৰোধী দলপতি দেৱব্ৰত শইকীয়াই নজিৰা মহকুমাত ডিকৌ নদীৰ বানে ক্ষতিগ্ৰস্ত লোকসকলক ক্ষতিপূৰণ আৰু পুনৰ সংস্থাপনৰ ক্ষেত্ৰত ৰাজ্য আৰু কেন্দ্ৰীয় চৰকাৰৰ বিফলতাক লৈ তীব্ৰ সমালোচনা কৰিছে। ১৯ আগষ্টত শিমলুগুৰিৰ বৰদুৱাৰস্থিত নিজা বাসভৱনত অনুষ্ঠিত এক সংবাদমেলত তেওঁ এই গুৰুতৰ অভিযোগ উত্থাপন কৰে।

শইকীয়াই কয় যে ১৯ জুলাইৰ পৰা হোৱা ডিকৌ নদীৰ বিধ্বংসী বানে নজিৰা মহকুমাৰ বিভিন্ন অঞ্চলত প্ৰায় এমাহ ধৰি জনসাধাৰণক দুৰ্বিষহ যাতনা দিছে। তেওঁ অভিযোগ কৰে যে চৰকাৰে বানাক্ৰান্ত পৰিয়ালসমূহৰ লোকচান নিৰূপণ আৰু ক্ষতিপূৰণ প্ৰদানৰ ক্ষেত্ৰত বৈষম্যমূলক নীতি গ্ৰহণ কৰিছে। কংগ্ৰেছ নেতাগৰাকীয়ে দাবী কৰে যে ডিকৌ নদীৰ বানত দহ লাখৰো অধিক লোক ক্ষতিগ্ৰস্ত হৈছে আৰু বহু পৰিয়ালে তেওঁলোকৰ সৰ্বস্ব হেৰুৱাইছে।

“এই সংকটৰ সময়ত ৰাজ্য আৰু কেন্দ্ৰীয় চৰকাৰ ক'ত?” বুলি প্ৰশ্ন তুলি শইকীয়াই ক্ষোভ প্ৰকাশ কৰে। তেওঁ লগতে অভিযোগ কৰে যে চৰকাৰে ক্ষতিগ্ৰস্ত অঞ্চলসমূহৰ সঠিক মূল্যায়ন কৰাত ব্যৰ্থ হৈছে। প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহকে ধৰি জ্যেষ্ঠ বিজেপি নেতাসকলৰ অনুপস্থিতিৰ ওপৰতো তেওঁ প্ৰশ্ন উত্থাপন কৰে। শইকীয়াই চৰকাৰক বানাক্ৰান্তসকলৰ প্ৰতি অধিক সংবেদনশীল হ'বলৈ আৰু শীঘ্ৰে উপযুক্ত ব্যৱস্থা গ্ৰহণ কৰিবলৈ আহ্বান জনায়।