নতুন দিল্লীঃ কেইদিনমান পূৰ্বে মাতৃত্বৰ গৌৰৱ অৰ্জন কৰিছিল নুছৰত জাহানে। এতিয়া তেওঁৰ দ্বায়িত্বও বহুত। প্ৰতিমুহূৰ্ততে সন্তানক আগুৰি আছে মাতৃ নুছৰতে। বিশাল দ্বায়িত্বভাৰ বহন কৰা নুছৰতে ঢৌতে খৰটো মাৰি নিজ কৰ্মতো মনোনিৱেশ কৰা পৰিলক্ষিত হৈছে। শেহতীয়াকৈ ফেচবুকত অভিনেত্ৰীগৰাকীয়ে ফটোশ্বুটৰ ছবি প্ৰচাৰ কৰিছে। অভিনেত্ৰীগৰাকীৰ ফটোসমূহ সামাজিক মাধ্যমত ইতিমধ্যে ভাইৰেল হৈ পৰাৰ সমান্তৰালকৈ পুনৰ চৰ্চালৈ আহিছে নুছৰত জাহান। প্ৰসূতিৰ ভাগৰৰ কোনো চিন নাই নুছৰতৰ মুখ-মণ্ডলত। ৰূপ-লাৱণ্যৰে ফুটি উঠিছে নুছৰত। টলিউড গ্ল্যাম গাৰ্ল নুছৰতক দেখা পোৱা গ’ল এক আকৰ্ষণীয় ভংগীত।
অভিনেত্ৰীগৰাকীৰ ছবিখনে দেশবাসীৰ মাজত এক হাহাকাৰময় পৰিৱেশৰ সৃষ্টি কৰিছে। একাংশই নুছৰতক পুনৰ সমালোচনাৰ দৰবাৰত থিয় কৰাইছে। কিছুমানে যদি নুছৰতৰ পোছাকক লৈ প্ৰশ্ন উত্থাপন কৰিছে, আন কিছুমানে শিশুটিিৰ পিতৃৰ নাম সুধি উপহাস কৰিছে। কিন্তু ডেমকেয়াৰ নুছৰত। ট্ৰ’লকেন্দ্ৰিক কথা-বাৰ্তাক কেৰেপ নকৰা অভিনেত্ৰীগৰাকীয়ে স্বচ্ছন্দে কৰি গৈছে নিজৰ কাম। উল্লেখ্য যে, ২৬ আগষ্টত মাদাৰ টেৰেছাৰ জন্মদিনৰ দিনাখনে এটা পুত্ৰসন্তান জন্ম দিছিল নুছৰত জাহানে। নৱজাতকটিৰ ওজন আছিল ২.৯ কিলোগ্ৰাম। নৱজাকতটিৰ পিতৃ কোন তাকে লৈ সমালোচনাৰ সন্মুখীন হৈছিল নুছৰত। নুছৰতৰ সমৰ্থনত মাত মাতিছিল বিশিষ্ট সাহিত্যিক তছলিমা নাছৰিনে। সেয়া অতীত হ’লেও সামাজিক মাধ্যমত অভিনেত্ৰী গৰাকীৰ প্ৰৱেশে তীব্ৰ চাঞ্চল্যৰ সৃষ্টি কৰিছে। অৱশ্যে, এই বিতৰ্কক লৈ কোনো মন্তব্য প্ৰকাশ কৰাৰ পৰা বিৰত আছে অভিনেত্ৰীগৰাকী।
Leave A Comment