''মুছলিমক ঘৃণা কৰাটো ফেশ্বনত পৰিণত হৈছে! এদিন এই ঘৃণাৰ ৰাজনীতি নিশ্চয় বন্ধ হ’ব।’’- নাছিৰুদ্দিন শ্বাহ

শেহতীয়াকৈ এক সাক্ষাৎকাৰত প্ৰবীণ অভিনেতাগৰাকী দাবী কৰে যে দেশৰ নাগৰিকৰ মনত ইচ্ছাকৃতভাৱে মুছলমান সম্প্ৰদায়ৰ প্ৰতি ঘৃণা জগাই তোলা হৈছে।

শেহতীয়া এক সাক্ষাৎকাৰত নাছিৰুদ্দিনে কয়, "আজিৰ চিনেমা বা ধাৰাবাহিকত যি দেখুওৱা হৈছে সেয়া বাস্তৱত প্ৰতিফলিত হৈছে। সেইটোৱেই হৈছে ইয়াৰ মূলত ইছলামোফ’বিয়া। মাজে মাজে কিছুমান মুছলমান বিৰোধী চিন্তা আৰু ধাৰণা আমাৰ মূৰত সুমুৱাই দিয়া হৈছে। সামাজিক জীৱনত ইয়াৰ প্ৰতিফলন অহৰহ হৈ থাকে। মুছলমান ঘৃণা আজিকালি ফেশ্বন হৈ পৰিছে! আনকি, ক’ৰবাত ই শিক্ষিত লোকৰ মনতো প্ৰৱেশ কৰিছে। আমি ধৰ্মনিৰপেক্ষতাৰ কথা কওঁ, গণতন্ত্ৰৰ কথা কওঁ, তেন্তে সকলোতে ধৰ্মৰ প্ৰৱৰ্তন কিয়? যিসকলে ধৰ্মৰ স্বাৰ্থত ভোট লাভ কৰি আছে তেওঁলোকৰ বাবে নিৰ্বাচন আয়োগ কেৱল মৌন দৰ্শক!"

নাছিৰৰ প্ৰশ্ন, "আজি যদি কোনো মুছলমান নেতাই এই কাম কৰিলেহেঁতেন, যদি তেওঁ আল্লাহু আকবৰ শ্লোগানেৰে ৰাইজৰ পৰা ভোট বিচাৰিলেহেঁতেন, তেনেহ’লে সকলো উলট পালট হৈ গ’লহেঁতেন।’’

তেওঁ কয়- "নিৰ্বাচন আয়োগৰ এটা শব্দও কোৱাৰ সাহস নাই।'' দেশৰ প্ৰধানমন্ত্ৰীক আক্ৰমণ কৰে নাছিৰে। কয়- "শেহতীয়া নিৰ্বাচনত পৰাস্ত হ'লেও প্ৰধানমন্ত্ৰীয়ে নিজেই ধৰ্মৰ নামত ভোট বিচাৰে।"

বৰ্তমান পৰিস্থিতিক লৈ ক্ষুব্ধ যদিও নাছিৰুদ্দিন শ্বাহ ভৱিষ্যতক লৈ আশাবাদী। তেওঁ আশা কৰে, "এদিন এই ঘৃণাৰ ৰাজনীতি নিশ্চয় বন্ধ হৈ যাব।"